ଭୁବନେଶ୍ୱର,୧୪।୯(ସ୍ପୋଟର୍ସ ବ୍ୟୁରୋ)-
ସ୍ଥାନୀୟ ପଟିଆସ୍ଥିତ ୬ ପକେଟ୍ସଠାରେ ଚାଲିଥିବା ଫାଲ୍କନ ଚିଲିକା ଇଷ୍ଟ ଜୋନ୍ ସ୍ନୁକର ଚାମ୍ପିୟନଶିପ୍ ଶୁକ୍ରବାର ନବମ ଦିବସରେ ପହଞ୍ଚିଛି। ଟୁର୍ନାମେଣ୍ଟର ଫାଇନାଲ ମୁକାବିଲା ସ୍ପଷ୍ଟ ହୋଇଛି। ଶନିବାର ଟାଇଟଲ ପାଇଁ ଫାଇନାଲ ମୁକାବିଲାରେ ଓଡ଼ିଶାର ସୁବ୍ରତ ଦାସ ଓ ପଶ୍ଚିମବଙ୍ଗର ଶାହାବାଜ ଆଦିଲ ଖାଁ ପରସ୍ପରକୁ ଭେଟିବେ। ଶୁକ୍ରବାର ଖେଳାଯାଇଥିବା ଦ୍ୱିତୀୟ ସେମିଫାଇନାଲ ମ୍ୟାଚ୍ରେ ସୁବ୍ରତ ଓଡ଼ିଶାର ଅନ୍ୟତମ ଖେଳାଳି ଆକାଶ ମହାପାତ୍ରଙ୍କୁ ୫-୧ (୫୯- ୫୭, ୫୯- ୩୨, ୬୩- ୬୭, ୬୦- ୩୫, ୬୧- ୧୭, ୪୦- ୧୪)ରେ ହରାଇ ଫାଇନାଲରେ ପ୍ରବେଶ କରିଛନ୍ତି। ଏହାପୂର୍ବରୁ ଖେଳାଯାଇଥିବା ପ୍ରଥମ ସେମିଫାଇନାଲରେ ଶାହାବାଜ ନିଜ ରାଜ୍ୟର ମନୀଷ ଜୈନଙ୍କୁ ୫-୩ (୬୨- ୨୭, ୪୭- ୭୬, ୩୦- ୫୬, ୪୭- ୩୪, ୭୨-୦, ୪୨- ୭୨, ୧୨୦-୦, ୬୯- ୨୬)ରେ ହରାଇ ଫାଇନାଲକୁ ଉଠିଛନ୍ତି। ଶନିବାର ଅପରାହ୍ନ ୩ଟାରେ ଫାଇନାଲ ବେଷ୍ଟ ଅଫ୍ ୧୧ ଫ୍ରେମ୍ରେ ଖେଳାଯିବ।
ପୂର୍ବରୁ ସୁବ୍ରତ ଓ ଶାହାବାଜ ପରସ୍ପରକୁ ୨ଥର ଭେଟିଛନ୍ତି। ଉଭୟ ଗୋଟିଏ ଲେଖାଏ ମ୍ୟାଚରେ ବିଜୟୀ ହୋଇଛନ୍ତି। ନ୍ୟାଶନାଲ ୨୦୧୨ ମିଟ୍ରେ ସୁବ୍ରତ ଗ୍ରୁପ୍ ପର୍ଯ୍ୟାୟରେ ଶାହାବାଜଙ୍କୁ ୩-୧ରେ ହରାଇଥିଲେ। ଅନ୍ୟପଟେ ୨୦୧୯ ନ୍ୟାଶନାଲରେ ଶାହାବାଜ ୫-୩ରେ ସୁବ୍ରତଙ୍କୁ ପରାସ୍ତ କରିଥିଲେ। ଶାହାବାଜ ଏବେ ମୁସଲିମ୍ ଇନ୍ଷ୍ଟିଚ୍ୟୁଟ ଅଫ୍ କୋଲକାତାରେ ଅଭ୍ୟାସ କରୁଛନ୍ତି। ସେହିପରି ସୁବ୍ରତ କଟକ କ୍ଲବରେ ଅଭ୍ୟାସ କରି ଆସୁଛନ୍ତି। ସେମିଫାଇନାଲରେ ସୁବ୍ରତ ଅତି ସହଜରେ ବିଜୟୀ ହୋଇଥିଲେ। ତେବେ ଶାହାବାଜଙ୍କୁ ସଂଘର୍ଷ କରିବାକୁ ପଡିଥିଲା।
