ବାଗଦାଦ,୬ା୧୦(ପି.ଟି.): ଇରାକରେ ସରକାର ବିରୋଧୀ ବିକ୍ଷୋଭ ଶନିବାର ପଞ୍ଚମ ଦିନରେ ପହଞ୍ଚତ୍ଥିବାବେଳେ ମୃତ୍ୟୁସଂଖ୍ୟା ୧୦୦ ଛୁଇଁଲାଣି। ଏଥିସହିତ ୪୦୦୦ ଲୋକ ଆହତ ହୋଇଛନ୍ତି। ଦକ୍ଷିଣ ଇରାକର ବିଭିନ୍ନ ସହରକୁ ମଧ୍ୟ ବିକ୍ଷୋଭ ବ୍ୟାପିଲାଣି। ପ୍ରଧାନମନ୍ତ୍ରୀ ଆଦେଲ୍ ଅବ୍ଦେଲ ମହଦିଙ୍କ ଇସ୍ତଫା ଦାବି କରିଛନ୍ତି ଶିହା ସମ୍ପ୍ରଦାୟର ମୁଖ୍ୟ ମୌଲବୀ ମକତଦା ସଦ୍ର। ବ୍ୟବସ୍ଥା ବଦଳିବା ଦରକାର ବୋଲି ବିକ୍ଷୋଭକାରୀ କହିଛନ୍ତି।
ଏହି ତୈଳ ସମୃଦ୍ଧ ରାଷ୍ଟ୍ରରେ ବେରୋଜଗାରି ଓ ଦୁର୍ନୀତିର ଅତ୍ୟଧିକ ବୃଦ୍ଧି ସାଙ୍ଗକୁ ଆର୍ଥତ୍କ ସ୍ଥିତି ଖରାପ ହେବାରେ ଲାଗିଛି। ଲୋକଙ୍କୁ ଉପଯୁକ୍ତ ସେବା ମିଳୁନାହିଁ, ଯାହା ସେମାନଙ୍କୁ କ୍ଷୁବ୍ଧ କରିଛି। ଏହାର ପ୍ରତିବାଦରେ ମଙ୍ଗଳବାରଠାରୁ ସେଠାରେ ସରକାର ବିରୋଧୀ ବିକ୍ଷୋଭ ଜାରି ରହିଛି। ବିକ୍ଷୋଭକାରୀଙ୍କ ନ୍ୟାୟସଙ୍ଗତ ଦାବିକୁ ବିଚାରକୁ ନିଆଯାଉଛି ବୋଲି ପ୍ରଧାନମନ୍ତ୍ରୀ ମହଦି କହିବା ସହ ସେମାନଙ୍କୁ ଶାନ୍ତ ରହିବାକୁ ଅନୁରୋଧ କରିଛନ୍ତି। ଏହା ସତ୍ତ୍ୱେ ହଜାର ହଜାର ବିକ୍ଷୋଭକାରୀ ରାଜରାସ୍ତାକୁ ଓହ୍ଲାଇ ସରକାରଙ୍କ ବିରୋଧରେ ବିକ୍ଷୋଭ ଶୋଭାଯାତ୍ରା କରିଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ବାଗ୍ଦାଦ୍ରେ କର୍ଫ୍ୟୁ ଜାରି ହୋଇଥିଲା। ଶନିବାର ରାଜଧାନୀରୁ ଦିନ ବେଳା କର୍ଫ୍ୟୁକୁ ଉଠାଇଦିଆଯାଇଛି। ଇଣ୍ଟରନେଟ ସଂଯୋଗ ମଧ୍ୟ ଛିନ୍ନ କରାଯାଇଛି। ତାହରିର୍ ସ୍କୋୟାର ଅଭିମୁଖେ ଅଗ୍ରସର ହେଉଥିବା ବିକ୍ଷୋଭକାରୀଙ୍କୁ ଘଉଡ଼ାଇବା ପାଇଁ ସୁରକ୍ଷା ବାହିନୀ ପକ୍ଷରୁ ଗୁଳିଚାଳନା କରାଯାଇଥିଲା।
ଆର୍ଥତ୍କ ପରିଚାଳନାରେ ସରକାର ବିଫଳ ହୋଇଥିବାବେଳେ ଦୁର୍ନୀତି ସବୁ ସୀମା ଟପିଗଲାଣି। ଏହାକୁ ବିରୋଧ କରି ବାଗଦାଦ ଓ ଅନ୍ୟ ସହରରେ ହଜାର ହଜାର ଯୁବକ ବିକ୍ଷୋଭରେ ସାମିଲ ହୋଇଛନ୍ତି। ଦଳମତ ନିର୍ବିଶେଷରେ ସବୁ ଧର୍ମ ଓ ସମ୍ପ୍ରଦାୟର ଲୋକେ ବିକ୍ଷୋଭକୁ ସମର୍ଥନ କରିଛନ୍ତି। ଫଳରେ ମହଦି ସରକାର ଅଡୁଆରେ ପଡିଯାଇଛନ୍ତି। ବିଭିନ୍ନ ସ୍ଥାନରେ ସୁରକ୍ଷା କର୍ମୀ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଦେଖାଦେଇଛି। ବିକ୍ଷୋଭକାରୀଙ୍କୁ ଘଉଡାଇବା ପାଇଁ ପୋଲିସ ଗୁଳି ଚଳାଇବା ସହ ଲୁହବୁହା ବାଷ୍ପ ଓ ପାଣି ମାଡ଼ କରୁଛି। ଇରାକ ମାନବାଧିକାର ହାଇକମିଶନଙ୍କ ତଥ୍ୟ ଅନୁଯାୟୀ ପାଖାପାଖି ୧୦୦ ବିକ୍ଷୋଭକାରୀଙ୍କ ମୃତ୍ୟୁ ହେବା ସହ ଅନେକ ଆହତ ହୋଇଛନ୍ତି। ଶତାଧିକ ପ୍ରତିବାଦକାରୀଙ୍କୁ ଗିରଫ କରାଯାଇଛି। ବାଗଦାଦ ସମେତ ନସିରିୟା, ଆମରା, ନଜାଫ୍ ଓ ହିଲ୍ଲା ସହରରେ କର୍ଫ୍ୟୁ ଜାରି ହୋଇଛି।
