ଲଣ୍ଡନ,୨୫।୬(ପି.ଟି.)- ଅଷ୍ଟ୍ରେଲିଆ ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚ୍ ପୂର୍ବରୁ ଇଂଲଣ୍ଡ ଖେଳାଳି ଜୋରଦାର ଅଭ୍ୟାସ କରିଛନ୍ତି। ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ଅଭ୍ୟାସ ସେସନ ଅବସରରେ ନେଟ୍ସରେ ଇଂଲଣ୍ଡ ବ୍ୟାଟ୍ସମ୍ୟାନଙ୍କୁ ବୋଲିଂ କରିଥିଲେ। ଏହା ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। କ୍ରିକେଟର ମକ୍କା କୁହାଯାଉଥିବା ଲଡର୍ସ ଗ୍ରାଉଣ୍ଡରେ ଅର୍ଜୁନ ନିଜ ରନ୍ ଅପ୍ ଚହ୍ନିତ କରି ଜୋରଦାର ବୋଲିଂ କରିଥିବାର ଲକ୍ଷ୍ୟ କରାଯାଇଥିଲା। ଏକ କମଳା ରଙ୍ଗର ଟି ଶାର୍ଟ ପରିଧାନ କରି ଅର୍ଜୁନବୋଲିଂ କରୁଥିବା ବେଳେ ଇଂଲଣ୍ଡର ସ୍ପିନ୍ ବୋଲିଂ ପରାମର୍ଶଦାତା ସାକଲିନ୍ ମୁସ୍ତାକଙ୍କ ତାଙ୍କୁ ନିରୀକ୍ଷଣ କରୁଥିଲେ। ଇଂଲଣ୍ଡ ପାଇଁ ଅର୍ଜୁନ ପ୍ରଥମଥର ଲାଗି ଏପରି ବୋଲିଂ କରିନାହାନ୍ତି। ପୂର୍ବରୁ ୨୦୧୫ରେ ୧୫ ବର୍ଷ ବୟସରେ ଅର୍ଜୁନ ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଆଶେସ ଟେଷ୍ଟ ପୂର୍ବରୁ ଇଂଲଣ୍ଡ ନେଟ୍ ବୋଲରଙ୍କ ଗ୍ରୁପ୍ରେ ସାମିଲ ହୋଇଥିଲେ ଓ ବୋଲିଂ କରିଥିଲେ। ୧୯ ବର୍ଷରେ ପଦାର୍ପଣ କରିଥିବା ଅର୍ଜୁନ ଏମ୍ସିସି ୟଙ୍ଗ କ୍ରିକେଟର୍ସ ତରଫରୁ ସରେ ସେକେଣ୍ଡ ଏକାଦଶ ବିପକ୍ଷରେ ଖେଳିଥିଲେ। ଗତ ସପ୍ତାହରେ ହାଇ ଓ୍ବିକମ୍ବରେ ଅନୁଷ୍ଠିତ ଏହି ମ୍ୟାଚ୍ରେ ଅଂଶଗ୍ରହଣ କରି ସେ ୧୧ ଓଭର ବୋଲିଂ କରି ୫୦ ରନ ବ୍ୟୟ କରିବା ସହ ୨ ଉଇକେଟ ଅକ୍ତିଆର କରିଥିଲେ। ସେ ଗତବର୍ଷ ଶ୍ରୀଲଙ୍କା ବିପକ୍ଷ ୧୯ ବର୍ଷରୁ କମ୍ ଯୁବ ଟେଷ୍ଟରେ ଭାରତ ତରଫରୁ ପ୍ରତିନିଧିତ୍ୱ କରିଥିଲେ। ଗତମାସ ସେ ମୁମ୍ବାଇ ଟି୨୦ ଲିଗ୍ରେ ଆକାଶ ଟାଇଗର୍ସ ତରଫରୁ ଖେଳିଥିଲେ। ୨୦୧୭-୧୮ କୁଚ୍ ବିହାର ଟ୍ରଫିରେ ସେ ମୁମ୍ବାଇ ୧୯ ବର୍ଷରୁ କମ୍ ଦଳ ତରଫରୁ ପ୍ରତିନିଧିତ୍ୱ କରି ୧୯ଟି ଉଇକେଟ ହାସଲ କରିଥିଲେ।
