ଗୋଆ,୩୧ା୧୨: କ୍ରିକେଟ୍ ଦୁନିଆର ମହାନ ଖେଳାଳି ସଚିନ ତେନ୍ଦୁଲକରଙ୍କ ଝିଅ ସାରା ତେନ୍ଦୁଲକର ଏବେ ଚର୍ଚ୍ଚାରେ। ନିକଟରେ ସାରାଙ୍କର ଏକ ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବା ପରେ ଏହାକୁ ନେଇ ଇଣ୍ଟରନେଟ୍ରେ ହଇଚଇ ସୃଷ୍ଟି ହୋଇଛି। ଗୋଆର ରାସ୍ତାରେ ସାରା ହାତରେ ବିଅର ବୋତଲ ଧରି ବୁଲୁଥିବାର ଏହି ଭିଡିଓରେ ଦେଖିବାକୁ ମିଳିଛି।
ନୂଆ ବର୍ଷ ପାଳନ ପାଇଁ ସାରା ତେନ୍ଦୁଲକର ଏବେ ଗୋଆରେ ଅଛନ୍ତି। ନିଜ ବନ୍ଧୁମାନଙ୍କ ସହ ସମୟ ବିତାଉଥିବା ବେଳେ ସାରାଙ୍କର ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ସେ ଏକ ଲାଲ୍ ରଙ୍ଗର ଡ୍ରେସ୍ ପିନ୍ଧି ହାତରେ ଏକ ବିଅର ବୋତଲ ଧରି ଚାଲୁଥିବାର ଦେଖାଯାଉଛନ୍ତି।
ଏହି ଭିଡିଓ ଭାଇରାଲ୍ ହେବା ପରେ ସୋସିଆଲ ମିଡିଆ ବ୍ୟବହାରକାରୀ ଦୁଇ ଭାଗରେ ବିଭକ୍ତ ହୋଇଯାଇଛନ୍ତି। କିଛି ଲୋକ ସାରାଙ୍କୁ ସମାଲୋଚନା କରି କହିଛନ୍ତି ଯେ, ସଚିନ ତେନ୍ଦୁଲକର ନିଜ କ୍ୟାରିୟରରେ କେବେ ମଦ କିମ୍ବା ସିଗାରେଟ୍ ବ୍ରାଣ୍ଡକୁ ପ୍ରୋତ୍ସାହିତ କରିନାହାଁନ୍ତି, କିନ୍ତୁ ତାଙ୍କ ଝିଅ ସର୍ବସାଧାରଣ ସ୍ଥାନରେ ମଦ ବୋତଲ ଧରି ବୁଲୁଛନ୍ତି।
ଅନ୍ୟପଟେ ଅନେକ ପ୍ରଶଂସକ ସାରାଙ୍କ ସମର୍ଥନରେ ବାହାରିଛନ୍ତି। ସେମାନଙ୍କ କହିବା କଥା ଯେ ସାରା ଜଣେ ସାବାଳିକା ଏବଂ ନିଜ ଛୁଟି ଦିନରେ ସେ ନିଜ ଇଚ୍ଛା ଅନୁସାରେ ସମୟ ବିତାଇବାର ପୂର୍ଣ୍ଣ ଅଧିକାର ରଖନ୍ତି।
ରିପୋର୍ଟ ଅନୁଯାୟୀ, ସାରା ଗୋଆର ଜଣାଶୁଣା ଆର୍ଟିଷ୍ଟ ସିଦ୍ଧାର୍ଥ କେଲକର ଏବଂ ତାଙ୍କର ଭାବି ଭାଉଜ ସାନିଆ ଚଣ୍ଡୋକଙ୍କ ସହ ଛୁଟି କାଟୁଛନ୍ତି। ସାରା କେବଳ ସଚିନଙ୍କ ଝିଅ ଭାବେ ନୁହେଁ, ବରଂ ଜଣେ ସଫଳ ଉଦ୍ୟୋଗୀ ଭାବେ ମଧ୍ୟ ନିଜର ପରିଚୟ ସୃଷ୍ଟି କରିଛନ୍ତି। ସେ ‘ସଚିନ ତେନ୍ଦୁଲକର ଫାଉଣ୍ଡେସନ’ର ନିର୍ଦ୍ଦେଶିକା ହେବା ସହ ଲଣ୍ଡନରୁ ନ୍ୟୁଟ୍ରିସନରେ ମାଷ୍ଟର୍ସ ଡିଗ୍ରୀ ହାସଲ କରିଛନ୍ତି।
