କେନ୍ଦ୍ରାପଡ଼ା ଅଫିସ,୧୯ା୯: ଆନ୍ତର୍ଜାତିକ ଶିଶୁ ଶାନ୍ତି ପୁରସ୍କାର ଦୌଡ଼ରେ କେନ୍ଦ୍ରାପଡ଼ା ଜିଲା ରାଜନଗର ବ୍ଲକ ଅନ୍ତର୍ଗତ ପେଣ୍ଠ ପ୍ରୋଜେକ୍ଟ ଉଚ୍ଚ ବିଦ୍ୟାଳୟର ଅଷ୍ଟମ ଶ୍ରେଣୀ ଛାତ୍ରୀ ଶୁଭସ୍ମିତା ତ୍ରିପାଠୀ ସ୍ଥାନ ପାଇଛନ୍ତି । ଏହି ପୁରସ୍କାର ପାଇଁ ବିଶ୍ୱରୁ ୩୦୦୦ରୁ ଊର୍ଦ୍ଧ୍ୱ ଦରଖାସ୍ତ ଆସିଥିବା ବେଳେ ମୋଟ ୧୧୯ ଜଣ ଦୌଡ଼ରେ ରହିଛନ୍ତି । ଏଥିରେ ଦେଶର ବିଭିନ୍ନ ରାଜ୍ୟରୁ ମୋଟ ୧୦ ଜଣଙ୍କ ନାମ ରହିଥିବା ବେଳେ ଓଡ଼ିିଶାରୁ ଏକମାତ୍ର ପ୍ରାର୍ଥନୀ ଭାବେ ପେଣ୍ଠ ଗ୍ରାମର ଶୁଭସ୍ମିତାଙ୍କ ନାମ ରହିଛି । ଏ ସମ୍ପର୍କରେ ନେଚର୍ସ କ୍ଲବ ସଭାପତି ବିରଜା ପ୍ରସାଦ ପତି କୁହନ୍ତି, ଆନ୍ତର୍ଜାତିକ ସ୍ବେଚ୍ଛାସେବୀ ସଂଗଠନ କିଡ୍ସ ରାଇଟ୍ସ୍ ପକ୍ଷରୁ ପ୍ରତିବର୍ଷ ଏହି ପୁରସ୍କାର ପ୍ରଦାନ କରାଯାଏ । ଶିଶୁ ଅଧିକାର ପାଇଁ ଲଢ଼େଇ କରୁଥିବା ଶିଶୁ ପ୍ରତିଭାଙ୍କୁ ଏହି ପୁରସ୍କାର ମିଳୁଥିବା ବେଳେ ଆସନ୍ତା ୩୦ରେ ପୁରସ୍କାର ପାଇଁ ଯୋଗ୍ୟ ବିବେଚିତ ପ୍ରତିଭାଙ୍କ ନାମ ଘୋଷଣା ହେବ । ଏନେଇ ସ୍ଥାନୀୟ ଅଞ୍ଚଳରେ ଉତ୍କଣ୍ଠା ପ୍ରକାଶ ପାଇଛି। ବିରଜାଙ୍କ କହିବାନୁସାରେ,କେନ୍ଦ୍ରାପଡା ଜିଲାରେ ଶିଶୁ ଅଧିକାର ପାଇଁ ଶୁଭସ୍ମିତାଙ୍କ ଅନେକ ଅବଦାନ ରହିିଛି। ଏହି ଅଞ୍ଚଳରେ ଜୀବନ ଜୀବିକା ନିର୍ବାହ କରିବା କଷ୍ଟସାଧ୍ୟ ହୋଇଥିବା ବେଳେ ଶିଶୁଙ୍କ ପାଠପଢ଼ା ପ୍ରତି ଗୁରୁତ୍ୱ ଦିଆଯାଏ ନାହିଁ। ଏଭଳିସ୍ଥିତିରେ ଶିକ୍ଷା ଦ୍ୱାରା ପରିବାରର ଆର୍ଥିକ ସ୍ଥିତି ଭବିଷ୍ୟତରେ ଉଜ୍ଜ୍ୱଳ ହୋଇପାରିବ ବୋଲି ଭରସା ଦେଇ ଶୁଭସ୍ମିତା ସ୍କୁଲପ୍ରତି ପିଲାଙ୍କ ମନରେ ଆଗ୍ରହ ସୃଷ୍ଟି କରିଥାନ୍ତି। ସେ ନିଜସ୍ବ ଉଦ୍ୟମରେ ଶିକ୍ଷା ପ୍ରତି ବିମୁଖ ଥିବା ୪ ପରିବାରର ଶିଶୁଙ୍କୁ ସ୍କୁଲକୁ ଆଣିବାରେ ସକ୍ଷମ ହୋଇଛନ୍ତି । ସେହିପରି ତାଙ୍କ ଉଦ୍ୟମରେ ୩ ଜଣ ଛାତ୍ରୀଛାତ୍ରଙ୍କ ପାଠପଢ଼ାରେ ଅଗ୍ରଗତି ହୋଇଛି । ଏପରି ପ୍ରତିଭା ସମ୍ପର୍କରେ ଜଣାପଡ଼ିିବା ପରେ ଶୁଭସ୍ମିତାଙ୍କ ଜୀବନାଦର୍ଶକୁ ନେଚର୍ସ କ୍ଲବ ପକ୍ଷରୁ ଦିଲ୍ଲୀସ୍ଥିତ ସେଭ୍ ଦ ଚିଲଡ୍ରେନ ଅନୁଷ୍ଠାନକୁ ପଠାଯାଇଥିଲା । ଏହାପରେ ଆନ୍ତର୍ଜାତିକ ଶିଶୁ ଶାନ୍ତି ପୁରସ୍କାର ଦୌଡ଼ରେ ଭାରତରୁ ମନୋନୀତ ହୋଇଥିତ୍ବା ୧୦ ଜଣଙ୍କ ମଧ୍ୟରେ ଶୁଭସ୍ମିତା ସ୍ଥାନ ପାଇଥିଲେ ବୋଲି ସେ କହିଛନ୍ତି।
