ବ୍ରହ୍ମପୁର ଅଫିସ୍,୨୦।୫: ବ୍ରହ୍ମପୁର ବଡ଼ ମେଡ଼ିକାଲ ପରିସରରେ ଥିବା ଆଞ୍ଚଳିକ ନିଦାନ କେନ୍ଦ୍ର(ଆର୍ଡିସି)ରେ ରୋଗୀଙ୍କୁ ଶୋଷଣ ଏବଂ ଦୁର୍ବ୍ୟବହାର କରାଯାଉ ଥିବା ନେଇ ସୋମବାର ଅଭିଯୋଗ ହୋଇଛି । ମାନବ ଅଧିକାର ସୁରକ୍ଷା ମଞ୍ଚ ଏଭଳି ଅଭିଯୋଗ ଆଣି ଆର୍ଡିସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି ।
ଅଭିଯୋଗ ଅନୁଯାୟୀ, ଆର୍ଡିସିରେ ରୋଗୀଙ୍କୁ ଶୋଷଣ କରାଯାଉଛି। କିଛି କର୍ମଚାରୀ ରୋଗୀଙ୍କୁ ଅତି ଖରାପ ଭାଷାରେ ଗାଳିଗୁଲଜ କରୁଛନ୍ତି । ରିପୋର୍ଟ ନେବା ପାଇଁ ରୋଗୀଙ୍କୁ ଘଣ୍ଟାଘଣ୍ଟା ଅପେକ୍ଷା କରିବାକୁ ପଡ଼ୁଛି। ରୋଗୀଙ୍କ ସଂଖ୍ୟା ବଢ଼ୁଥିବା ବେଳେ ତଦନୁଯାୟୀ ରକ୍ତ ଓ ମୂତ୍ର ନମୁନା ପରୀକ୍ଷା ଠିକ୍ ଭାବେ କରାଯାଉ ନାହିଁ। ଏଣୁ ଆର୍ଡିସିକୁ ପୂର୍ଣ୍ଣ ଭାବେ କାର୍ଯ୍ୟକ୍ଷମ, ତୁରନ୍ତ ରିପୋର୍ଟ ପ୍ରଦାନ, ସିସି କ୍ୟାମେରା ଲଗାଇବା, ମହିଳା ଓ ବରିଷ୍ଠ ନାଗରିକଙ୍କ ପାଇଁ ସ୍ବତନ୍ତ୍ର ଧାଡ଼ି ବ୍ୟବସ୍ଥା, ଠିକ୍ ସମୟରେ କେନ୍ଦ୍ର ଖୋଲିବା ଆଦି ଦାବିରେ ବିକ୍ଷୋଭ କରାଯାଇଛି। ଏ ନେଇ ଅଧ୍ୟକ୍ଷଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ମଞ୍ଚର ସଂଯୋଜକ ଅବନୀ କୁମାର ଗୟା, ମହେଶ୍ୱର ବାଡ଼ତ୍ୟା, ପ୍ରମୁଖ ଏଥିରେ ସାମିଲହୋଇ ଥିଲେ।
