ଓ୍ବାଶିଂଟନ,୧୮।୬: ବିଶ୍ୱର ସବୁଠାରୁ ଅଧିକ ଜନସଂଖ୍ୟା ଥିବା ଦେଶ ମଧ୍ୟରେ ଚାଇନାର ସ୍ଥାନ ଏକ ନମ୍ବରରେ ଥିବା ବେଳେ ଏହା ପଛକୁ ରହିଛି ଭାରତ। ଚାଇନା ତା’ର ଜନସଂଖ୍ୟା ହ୍ରାସ କରିବାକୁ ବିଭିନ୍ନ ଯୋଜନା ପ୍ରସ୍ତୁତ କରିଥିବା ବେଳେ ଭାରତ ଏ ଦିଗରେ ସେମିତି କିଛି ଆଖିଦୃଶିଆ ପଦକ୍ଷେପ ନେଉ ନ ଥିବା ପ୍ରକାଶ। ନିକଟରେ ଜାତିସଂଘର ଏକ ରିପୋର୍ଟ ଅନୁଯାୟୀ, ଆସନ୍ତା ୮ ବର୍ଷ ମଧ୍ୟରେ ଭାରତ ଯଦି ଏଦିଗରେ ସେମିତି କିଛି ପଦକ୍ଷେପ ନ ନିଏ ତେବେ ଏହା ଚାଇନାର ଜନସଂଖ୍ୟାକୁ ଟପିଯିବ ବୋଲି ଅନୁମାନ କରାଯାଇଛି। ଜାତିସଂଘର ଆର୍ଥିକ ଏବଂ ସାମାଜିକ ମାମଲାର ପପୁଲେଶନ ଡିଭିଜନ ଦି ଓ୍ବାର୍ଲଡ ପପୁଲେଶନ ପ୍ରୋଜେକ୍ଟ ୨୦୧୯ ହାଇଲାଇଟ୍ସ ପ୍ରକାଶିତ କରିଛି। ଏହି ରିପୋର୍ଟ ଅନୁଯାୟୀ, ଆସନ୍ତା ୩୦ ବର୍ଷ ମଧ୍ୟରେ ବିଶ୍ୱ ଜନସଂଖ୍ୟାରେ ଅରବ ସଂଖ୍ୟକ ବୃଦ୍ଧି ହେବ। ତେବେ ବିଶ୍ୱ ଜନସଂଖ୍ୟାରେ ଯେଉଁ ବୃଦ୍ଧି ହେବ ଏହାର ଅଧାରୁ ଅଧିକ ଭାରତ, ନାଇଜେରିଆ, ପାକିସ୍ତାନ, ଡେମୋକ୍ରେଟିକ ରିପବ୍ଲିକ ଅଫ୍ କଙ୍ଗୋ, ଇଥିଓପିଆ, ତାଞ୍ଜାନିଆ, ଇଣ୍ଡୋନେସିଆ, ମିଶ୍ର ଓ ଆମେରିକାରେ ହେବ ବୋଲି ଅନୁମାନ କରାଯାଇଛି। ଏମାନଙ୍କ ମଧ୍ୟରୁ ଭାରତରେ ସର୍ବାଧିକ ଜନସଂଖ୍ୟା ରହିବ ବୋଲି କୁହାଯାଉଛି।
