ମୁମ୍ବାଇ,୧୩।୩- ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ)ର ୧୩ତମ ସଂସ୍କରଣ ଚଳିତ ମାସ ୨୯ ତାରିଖରୁ ଆରମ୍ଭ ହେବ ନାହିଁ। ବିଶ୍ୱର ସବୁଠୁ ବିତ୍ତଶାଳୀ ଲିଗ୍ ଏପ୍ରିଲ ୧୫ ତାରିଖ ପର୍ଯ୍ୟନ୍ତ ସ୍ଥଗିତ ହୋଇଯାଇଛି। ବିସିସିଆଇ ପକ୍ଷରୁ ଜାରି ହୋଇଥିବା ବିଜ୍ଞପ୍ତିରେ କୁହାଯାଇଛି, ଜନସାଧାରଣ ଓ ଅଂଶୀଦାରଙ୍କ ସ୍ବାସ୍ଥ୍ୟକୁ ନଜରରେ ରଖି ଆବଶ୍ୟକ ପଦକ୍ଷେପ ନେଇଛୁ। ଏ ସମ୍ପର୍କରେ ବିସିସିଆଇ କେନ୍ଦ୍ର ଓ ରାଜ୍ୟ ସରକାର, ଯୁବ ବ୍ୟାପାର ଓ କ୍ରୀଡ଼ା, ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସହ କାର୍ଯ୍ୟ କରିବ। ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସାଧାରଣ ସମ୍ପାଦକ ଜୟ ଶାହାଙ୍କ ମଧ୍ୟରେ ବିସିସିଆଇର ମୁଖ୍ୟ କାର୍ଯ୍ୟାୟଳରେ ଅନୁଷ୍ଠିତ ବୈଠକରେ ଏହି ନିଷ୍ପତ୍ତି ନିଆଯାଇଛି। ସେମାନଙ୍କୁ ବିସିସିଆଇର ଅପରେଶନ୍ସ ଓ ଲଜିଷ୍ଟିକ ଦଳ ସହାୟତା କରିଥିଲେ। ଆଇପିଏଲ ଗଭର୍ନିଂ କାଉନ୍ସିଲ ବୈଠକ ଶନିବାର ମୁମ୍ବାଇଠାରେ ହେବାର ଅଛି। ଏହି ବୈଠକ ପୂର୍ବରୁ ବିସିସିଆଇ କର୍ମକର୍ତ୍ତା ଓ ଆଇପିଏଲ ଗଭର୍ନିଂ କାଉନ୍ସିଲ ସମସ୍ତ ଫ୍ରାଞ୍ଚାଇଜ ଓ ଅଂଶୀଦାରଙ୍କୁ ଭେଟିବେ ବୋଲି ଆଶା କରାଯାଉଛି। ଆଇପିଏଲକୁ ଦୁଇ ସପ୍ତାହ ପାଇଁ ସ୍ଥଗିତ କରିବା ଦ୍ୱାରା ବିସିସିଆଇକୁ ସ୍ଥିତି ପରକ୍ଷୀବା ପାଇଁ ସମୟ ମିଳିବ। ଦରକାର ପଡ଼ିଲେ ପୁଣି ଥରେ ସ୍ଥଗିତ କିମ୍ବା ବାତିଲ କରିବା ନେଇ ନିଷ୍ପତ୍ତି ହୋଇପାରେ।
