ବ୍ରହ୍ମପୁର ଅଫିସ,୯ା୬-କୋଭିଡ୍-୧୯ ମୁକାବିଲା ତଥା ସଂକ୍ରମଣରୁ କରୋନା ଯୋଦ୍ଧାଙ୍କୁ ସୁରକ୍ଷା ଦେବା ଉଦ୍ଦେଶ୍ୟରେ ଗୋଟିଏ ପରେ ଗୋଟିଏ ଉଦ୍ଭାବନକରି ଏବେ ସାରା ଦେଶରେ ବ୍ରହ୍ମପୁର ଆଇଟିଆଇ ଅନ୍ୟ ଆଇଟିଆଇ ପାଇଁ ଉଦାହରଣ ପାଲଟିଛି। ସୋମବାର ପୁଣି ଆଉ ଏକ ଉଦ୍ଭାବନ ପାଇଁ ଚର୍ଚ୍ଚାକୁ ଆସିଛି। ବ୍ରହ୍ମପୁର ଆଇଟିଆଇ କରୋନା ଯୋଦ୍ଧାଙ୍କ ପାଦ ତଥା ଜୋତାକୁ ସାନିଟାଇଜ କରିବା ନେଇ ଆଇଟିଆଇ ଉଦ୍ଭାବନ କରିଛି ୟୁଭିସି ସୋଲ ସାନିଟାଇଜର। ସୋମବାର ଆଇଟିଆଇ ପରିସରରେ ଓଡିଶା ସ୍କିଲ୍ ଡେଭଲପମେଣ୍ଟ ଅଥରିଟି ଅଧ୍ୟକ୍ଷ ସୁବ୍ରତୋ ବାଗ୍ଚି ଭିଡିଓ କନଫେରେନ୍ସ ଯୋଗେ ଏହାର ଶୁଭାରମ୍ଭ କରିଥିଲେ। ଏହି ସାନିଟାଇଜର ଦ୍ୱାରା ମାତ୍ର ୮ ରୁ ୧୦ ସେକେଣ୍ଡ ମଧ୍ୟରେ ଜୋତାକୁ ସମ୍ପୂର୍ଣ୍ଣ ବିଶୋଧନ କରିହେବ। ଏହି ସାନିଟାଇଜର ମେଶିନରେ ସେନ୍ସର ଓ ଅତିବାଇଗଣି ରଶ୍ମୀର ବ୍ୟବହାର କରାଯାଇଛି। ଏହାର ପ୍ରସ୍ତୁତି ପାଇଁ ୬ ହଜାର ରୁ ୭ ହଜାର ଟଙ୍କା ଖର୍ଚ୍ଚ ହୋଇଥିବା ଅନୁଷ୍ଠାନ ପକ୍ଷରୁ କୁହାଯାଇଛି। ଉଦ୍ଘାଟନ ଅବସରରେ ଶୀତଳାପଲ୍ଲୀସ୍ଥିତ ଟାଟା କୋଭିଡ୍ ହସ୍ପିଟାଲକୁ ଅନୁଷ୍ଠାନର ଅଧ୍ୟକ୍ଷ ଡ.ରଜତ କୁମାର ପାଣିଗ୍ରାହୀ ପ୍ରଥମ ୟୁଭିସି ସୋଲ ସାନିଟାଇଜର ମେଶିନ ପ୍ରଦାନ କରିଥିଲେ। ଏହି ଅବସରରେ ଆଇଜର ନିର୍ଦ୍ଦେଶକ କେ.ଭି. ଆର. ଚାରୀ, ଟାଟା କୋଭିଡ୍ ହସ୍ପିଟାଲ ନୋଡାଲ ଅଫିସର ଡ଼ା ଉମାଶଙ୍କର ମିଶ୍ରଙ୍କ ସମେତ ଆଇଟିଆଇର ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ।
ସୂଚନାଯୋଗ୍ୟ, ଆଇଟିଆଇ ଇତିମଧ୍ୟରେ କୋଭିଡ୍-୧୯ ମୁକାବିଲା ପାଇଁ ଫେସ୍ସିଲ, ଏରସଲ ବକ୍ସ, ସ୍ବୟଂଚାଳିତ ହ୍ୟାଣ୍ଡ ସାନିଟାଇଜର, ପାଦ ଚାଳିତ ହ୍ୟାଣ୍ଡ ସାନିଟାଇଜର, ୟୁଭିସି ସାନିଟାଇଜର ମେଶିନ ଉଦ୍ଭାବନ କରି ସାରାଦେଶର ଅନ୍ୟ ଆଇଟିଆଇ ପାଇଁ ଉଦାହରଣ ସୃଷ୍ଟି କରିଛି।
