ବିରିଡି, ୨୨।୨ (ଡି.ଏନ୍.ଏ.): ପବିତ୍ର ଶିବଚତୁଦ୍ଦଶୀ ତିଥି ଅବସରରେ ଶୁକ୍ରବାର ହାଜିପୁରସ୍ଥିତ ପବିତ୍ର ଧ୍ୟାନକୁଦ ଶ୍ରୀଜଗନ୍ନାଥ ମନ୍ଦିରରୁ ଜଗନ୍ନାଥଙ୍କ ଚଳନ୍ତି ପ୍ରତିମା ଶ୍ରୀ ମଦନମୋହନ ସେବାୟତମାନଙ୍କ ସହ ଏକ ବିରାଟ ପଟୁଆରରେ ବାଜା, ବାଣ, ରୋଶଣିରେ ଚାନ୍ଦପୁରସ୍ଥିତ ଅଷ୍ଟଶମ୍ଭୁ ଶିବ ମନ୍ଦିରକୁ ଆସିଥିଲେ। ଶ୍ରୀଜଗନ୍ନାଥ ମନ୍ଦିରରେ ସନ୍ଧ୍ୟା ଅଳତି ପରେ ମଦନମୋହନଙ୍କୁ ବିମାନରେ ବିଜେ କରାଯାଇ ଅଷ୍ଟଶମ୍ଭୁ ଶିବ ମନ୍ଦିରକୁ ନିଆଯାଇଥିଲା। ଅଷ୍ଟଶମ୍ଭୁ ମନ୍ଦିରର ସେବାୟତମାନେ ମଦନମୋହନଙ୍କୁ ପାଛୋଟି ନେଇଥିଲେ। ଯଥା ସ୍ଥାନରେ ମଦନମୋହନଙ୍କୁ ଉପବିଷ୍ଟ କରାଇ ପୂଜାର୍ଚ୍ଚନା କରାଯିବା ପରେ ମହାଦେବଙ୍କ ଅଭିଷେକ କାର୍ଯ୍ୟ ଆରମ୍ଭ ହୋଇଥିଲା। ଶେଷ ପର୍ଯ୍ୟାୟରେ ଶ୍ରୀ ମଦନମୋହନଙ୍କ ସମ୍ମୁଖରେ ହୋମ କାର୍ଯ୍ୟ କରାଯାଇ ପରିଶେଷରେ ମହାଦୀପ ଉଠାଯାଇଥିଲା। ମହାଦୀପ ଉଠିବା ପରେ ଶ୍ରୀମଦନମୋହନ ଧ୍ୟାନକୁଦ ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ।
