ନୂଆଦିଲ୍ଲୀ,୬।୫(ପି.ଟି.): ବିଶ୍ୱକପ୍ ବିଜେତା ପୂର୍ବତନ ହକି ଗୋଲକିପର ଅଶୋକ ଦିଓ୍ବାନ ଏବେ ସୁସ୍ଥ ଅଛନ୍ତି। ସେ ଏବେ ଆମେରିକାରୁ ସ୍ବଦେଶ ଫେରିବେ। କରୋନା ଭାଇରସ ମହାମାରୀ କାରଣରୁ ସେ ଆମେରିକାରେ ଫସି ରହିଥିଲେ ଓ ସ୍ବାସ୍ଥ୍ୟାବସ୍ଥାରେ ଅବନତୀ ହେବା କାରଣରୁ ସମସ୍ୟାର ସମ୍ମୁଖୀନ ହୋଇଥିଲେ। ଫଳରେ ଗତମାସ ଆମେରିକାରୁ ଭାରତ ଫେରିବା ପାଇଁ ସେ ସାହାଯ୍ୟ ମାଗିଥିଲେ। ଭ୍ରମଣଜନିତ କଟକଣା ଯୋଗୁ ସେ ଆମେରିକାରେ ରହିଯାଇଥିଲେ। ତେବେ ବର୍ତ୍ତମାନ ସେ ସୁସ୍ଥ ଅଛନ୍ତି ଓ ଖୁବ୍ଶୀଘ୍ର ଭାରତ ଫେରିବେ ବୋଲି ଦିଓ୍ବାନ ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ)କୁ ସୂଚନା ଦେଇଛନ୍ତି।
୬୫ ବର୍ଷୀୟ ଦିଓ୍ବାନଙ୍କ ସ୍ବାସ୍ଥ୍ୟାବସ୍ଥା ଖରାପ ହୋଇଥିଲା। ସେ ଆମେରିକାରେ ଫସି ରହିଥିବା ବେଳେ ଆଇଓଏ ଅଧ୍ୟକ୍ଷ ନରିନ୍ଦର ବାତ୍ରାଙ୍କୁ ସହାଯ୍ୟ ପାଇଁ ଓ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଇବା ପାଇଁ ଅନୁରୋଧ ଜଣାଇଥିଲେ। କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ତାଙ୍କ ସମସ୍ୟା ଓ ଅନୁରୋଧ ସମ୍ପର୍କରେ ବୈଦେଶିକ ମନ୍ତ୍ରଣାଳୟକୁ ଅବଗତ କରାଇଥିଲେ। ଭଗବାନଙ୍କ ଦୟାରୁ ଏବେ ମୋର ସ୍ବାସ୍ଥ୍ୟ ଭଲ ଅଛି। ସ୍ବଦେଶ ଫେରିବା ପାଇଁ ଭାରତୀୟ ଦୂତାବାସ ସହ ପଞ୍ଜୀକରଣ କରାଇଛି। ଦୂତାବାସ ତରଫରୁ ମଧ୍ୟ ସକାରାତ୍କମ ଖବର ପାଇଛି ବୋଲି ଦିଓ୍ବାନ ବାତ୍ରାଙ୍କୁ ଜଣାଇଛନ୍ତି।
୧୯୭୫ ବିଶ୍ୱକପ୍ ବିଜେତା ଦିଓ୍ବାନ କ୍ରୀଡ଼ାମନ୍ତ୍ରୀ କିରେନ ରିଜିଜୁ ଓ ଆମେରିକାରେ ଭାରତୀୟ ରାଜଦୂତ ତରନଜିତ ସିଂ ସାନ୍ଧୁଙ୍କୁ କୃତଜ୍ଞତା ଜଣାଇଛନ୍ତି। ସମୟୋଚିତ ସାହାଯ୍ୟ ପାଇଁ ଭାରତୀୟ ଗଣମାଧ୍ୟମ ସହ ସେ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ଉଲ୍ଲେଖଥାଉ କି, ଦିଓ୍ବାନ ୧୯୭୬ ଅଲିମ୍ପିକ୍ସ ଦଳରେ ମଧ୍ୟ ସାମିଲ ହୋଇଥିଲେ। ସେ ଗତ ଡିସେମ୍ବରରେ ନିଜ ପୁଅଙ୍କୁ ଦେଖିବା ଓ ତାଙ୍କ ସହ ସମୟ ବିତାଇବା ପାଇଁ ଆମେରିକାର ସାକ୍ରାମେଣ୍ଟୋ ଯାତ୍ର କରିଥିଲେ। ସେ ଏପ୍ରିଲ ୨୦ ତାରିଖରେ ଭାରତ ଫେରିବା କାର୍ଯ୍ୟକ୍ରମ ଥିଲେ ମଧ୍ୟ କରୋନା ଭାଇରସ ପାଇଁ ଯାତ୍ର ଜନିତ କଟକଣା ଯୋଗୁ ଭାରତ ଫେରିପାରି ନ ଥିଲେ।
