ବ୍ରହ୍ମପୁର ଅଫିସ,୯ା୧୨-ବ୍ରହ୍ମପୁର ସିଟି ବସଷ୍ଟାଣ୍ଡର ମରାମତି ତଥା ପୁନଃନିର୍ମାଣ କାର୍ଯ୍ୟକୁ ନେଇ ଅନିଶ୍ଚିତତା ଦେଖାଦେଇଛି । ଗତ ୨୬ ତାରିଖରେ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ବସଷ୍ଟାଣ୍ଡ ପରିସରର ବିଭିନ୍ନ ରାସ୍ତା ମରାମତି ପାଇଁ ଜେସିବି ଦ୍ୱାରା ଖୋଳାଯାଇଛି। ମାତ୍ର ଏହାର ଦୁଇ ସପ୍ତାହ ପରେ ବି ନିର୍ମାଣ କାର୍ଯ୍ୟ ଆରମ୍ଭ ହୋଇନାହିଁ। ଅନ୍ୟପକ୍ଷରେ ବସଷ୍ଟାଣ୍ଡ ପରିସର ମୁଖ୍ୟରାସ୍ତାରେ ଅଯଥାରେ ଖୋଳାଯାଇଥିବା ଗର୍ତ୍ତ ପୂରଣ ଦିଗରେ କୌଣସି ପଦକ୍ଷେପ ନିଆଯାଉ ନ ଥିବା ଅଭିଯୋଗ ହେଉଛି । ପ୍ରସ୍ଥାନ ପଥରେ ଥିବା କାଓକାଚରକୁ ତରବରିଆ ଭାବେ ବିଡିଏ ଖୋଳି ଦେଇଥିବାରୁ ସେଠାରେ ଯାତ୍ରୀମାନେ ଜାଣି ନ ପାରି ପଡିଯାଇ ଆହତ ହେଉଛନ୍ତି । ଏହାସତ୍ତ୍ୱେ ବିଡିଏ ତଥା ପ୍ରଶାସନ ପକ୍ଷରୁ ମରାମତି କାର୍ଯ୍ୟ ଆରମ୍ଭ କରା ନଯିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଯାତ୍ରୀମାନେ ପ୍ରତିକ୍ରିୟା ପ୍ରକାଶ କରି କହିଛନ୍ତି। ବସଷ୍ଟାଣ୍ଡ ତଥା ସିଟି ବସଷ୍ଟାଣ୍ଡ ପୁନଃନିର୍ମାଣ ନିମନ୍ତେ ବସଷ୍ଟାଣ୍ଡ ଦୁଇ ମାସ ପାଇଁ ସମ୍ପୂର୍ଣ୍ଣ ବନ୍ଦ କରାଯିବ ବୋଲି ବିଡିଏ ପକ୍ଷରୁ ଗତ ନଭେମ୍ବର ୨୬ ତାରିଖରେ ନୋଟିସ ଜାରି କରାଯାଇଥିଲା । ହଳଦିଆପଦରରୁ ସମସ୍ତ ଘରେଇ ବସ୍ ଚଳାଚଳ କରିବାକୁ ଉକ୍ତ ନୋଟିସରେ ଦର୍ଶାଯାଇଥିଲା । ଗଞ୍ଜାମ ଜିଲା ଘରୋଇ ବସ ମାଲିକ ସଂଘ ପକ୍ଷରୁ ଏହାକୁ ତୀବ୍ର ବିରୋଧ କରାଯିବା ଓ ବନ୍ଦ ଡାକରା ଦିଆଯାଇଥିଲା। ଏହାପରେ ପରିବହନ ମନ୍ତ୍ରୀ ପଦ୍ମନାଭ ବେହେରାଙ୍କ ଅଧ୍ୟକ୍ଷତାରେ ଭୁବନେଶ୍ୱରଠାରେ ଏହି ସମସ୍ୟାର ସମାଧାନ ନିମନ୍ତେ ଜତ ୨୮ ତାରିଖରେ ଏକ ବୈଠକ ହୋଇଥିଲା। ବ୍ରହ୍ମପୁର ସିଟି ବସଷ୍ଟାଣ୍ଡକୁ ଅଧା ଅଞ୍ଚଳରୁ ବସ ଚଳାଚଳ କରିବା ସହ ଆଉ ଅଧା ଅଞ୍ଚଳରେ ବିଡିଏ ପକ୍ଷରୁ ମରାମତି କାର୍ଯ୍ୟ ଆରମ୍ଭ କରିବାକୁ ଉକ୍ତ ବୈଠକରେ ନିଷ୍ପତ୍ତି ନିଆଯାଇଥିଲା। ତେବେ ଦୁଇ ସପ୍ତାହ ପରେ ବି ବିଡିଏ ପକ୍ଷରୁ ମରାମତି କାର୍ଯ୍ୟ ଆରମ୍ଭ କରାଯାଇ ନ ଥିବା ବସ ମାଲିକ ସଂଘ ପକ୍ଷରୁ ଅଭିଯୋଗ ହୋଇଛି ା ବୈଠକରେ ନିଷ୍ପତ୍ତି ପ୍ରକାରେ ବସ ମାଲିକ ସଂଘ ପକ୍ଷରୁ ସମସ୍ତ ପ୍ରକାର ସହଯୋଗ କରାଯାଉଛି ା ବସଷ୍ଟାଣ୍ଡରେ ପ୍ରତ୍ୟେକ ବସ ମାତ୍ର ଅଧଘଣ୍ଟାଏ ପାଇଁ ରହି ଗନ୍ତବ୍ୟସ୍ଥଳକୁ ଯାଉଛି ା ଏପରିକି ରାତ୍ରି ସମୟରେ ବସଷ୍ଟାଣ୍ଡ ପରିସରରେ କୌଣସି ଘରୋଇ ବସ ରହୁନାହିଁ। ଏହାସତ୍ତ୍ୱେ ବିଡିଏ ପକ୍ଷରୁ ମରାମତି କାର୍ଯ୍ୟ ଓ ଖୋଳାଯାଇଥିବା ଗର୍ତ୍ତ ପୂରଣ ଦିଗରେ କୌଣସି ପଦକ୍ଷେପ ଗ୍ରହଣ କରୁ ନ ଥିବା ବସ ମାଲିକ ସଂଘର ସଧାରଣ ସମ୍ପାଦକ ସୁବାସ ଚନ୍ଦ୍ର ପଟ୍ଟନାୟକ କହିଛନ୍ତି ା ବସ ମାଲିକଙ୍କ ବନ୍ଦ ପାଳନ ବେଳେ ବିଡିଏ ତଥା ପ୍ରଶାସନ ଜିଦ କରି ବସଷ୍ଟାଣ୍ଡ ପ୍ରସ୍ଥାନ ପଥ ସମେତ ବସଷ୍ଟାଣ୍ଡ ପରିସରର ବିଭିନ୍ନ ରାସ୍ତାରେ ଗଭୀର ଗର୍ତ୍ତ କରିଥିଲା ା କିନ୍ତୁ ବୈଠକରେ ସିଟି ବସଷ୍ଟାଣ୍ଡର ଅଧା ଅଞ୍ଚଳରୁ ବସ ଚଳାଚଳ ନେଇ ନିଷ୍ପତ୍ତି ପରେ ମଧ୍ୟ ଖୋଳା ଯାଇଥିବା ରାସ୍ତାର ମରାମତି ତଥା ଗର୍ତ୍ତ ପୂରଣ ଦିଗରେ କୌଣସି ପଦକ୍ଷେପ ନିଆଯାଇ ନଥିବା ସାଧାରଣ ସମ୍ପାଦକ ଅଭିଯୋଗ କରିଛନ୍ତି ା ତୁରନ୍ତ ମରାମତି କାର୍ଯ୍ୟ ଆରମ୍ଭ କରିବା ସହ ଗର୍ତ୍ତ ପୂରଣ ଦିଗରେ ପଦକ୍ଷେପ ନେବାକୁ ବସ ମାଲିକ ସଂଘ ଦାବି କରିଛି ା
ନଚେତ ଆଗାମୀ ଦିନରେ ପୁଣି ସଂଘ ଆନ୍ଦୋଳନକୁ ଓହ୍ଲାଇବ ବୋଲି ସାଧାରଣ ସମ୍ପାଦକ ଚେତାବନୀ ଦେଇଛନ୍ତି ା
