ଆନନ୍ଦପୁର,୧୭। ୪ (ସ୍ବ.ପ୍ର.)- କେନ୍ଦୁଝର ଜିଲା ଘସିପୁରା ନିର୍ବାଚନ ମଣ୍ଡଳୀର ରାମଚନ୍ଦ୍ରପୁର ଠାରେ ଜୀବନ ବିନ୍ଦୁ କାର୍ଯ୍ୟକ୍ରମ ବିଜୁ ପଟ୍ଟନାୟକଙ୍କ ଶ୍ରାଦ୍ଧବାର୍ଷିକୀ ଅବସରରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ଘସିପୁରା ବିଧାୟକ ବଦ୍ରି ନାରାୟଣ ପାତ୍ରଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଏହି ରକ୍ତଦାନ ଶିବିର ଅନୁଷ୍ଠିତ ହୋଇଥିଲା। କୋଭିଡ-୧୯ ପାଇଁ ଦେଶରେ ଲକ୍ ଡାଉନ ପରିସ୍ଥିତି ବଳବତ୍ତର ରହିଥିବାରୁ ସାମାଜିକ ଦୂରତାକୁ ଲକ୍ଷ୍ୟ ରଖାଯାଇ ଏହି କାର୍ଯ୍ୟକ୍ରମ ସୁପରିଚାଳନା କରାଯାଇଥିଲା। ବିଧାୟକ ପାତ୍ର ବିଜୁ ବାବୁଙ୍କ ଫଟୋଚିତ୍ରରେ ମାଲ୍ୟାର୍ପଣ ପୂର୍ବକ ଧୂପ ଦୀପ ପ୍ରଦାନ କରି ଜୀବନ ବିନ୍ଦୁ କାର୍ଯ୍ୟକ୍ରମର ଶୁଭ ଉଦ୍ଘାଟନ କରିଥିଲେ। ଏହି ରକ୍ତଦାନ ଶିବିରରେ ଘସିପୁରା ବିଡିଓ ଅସିତ୍ କୁମାର ମହାନ୍ତି ଉପସ୍ଥିତ ରହି ରକ୍ତଦାତା ମାନଙ୍କୁ ଉତ୍ସାହିତ କରିଥିଲେ। ଏହି ଅବସରରେ ରାମଚନ୍ଦ୍ରପୁର ଥାନା ପୋଲିସ ଉପସ୍ଥିତ ରହି ସାମାଜିକ ଦୂରତା, ଉପସ୍ଥିତ ରକ୍ତଦାତାମାନଙ୍କ ମାସ୍କ ବ୍ୟବହାର ଉପରେ ଦୃଷ୍ଟି ଦେଇଥିଲେ। ଘସିପୁରା ବିଜେଡି ସଭାପତି ମନ୍ମଥ ରାଉତଙ୍କ ସଂଯୋଜନାରେ ଆୟୋଜିତ ଜୀବନ ବିନ୍ଦୁ କାର୍ଯ୍ୟକ୍ରମରେ ଜିଲା ପରିଷଦ ଉପାଧ୍ୟକ୍ଷ ଅକ୍ଷୟ କୁମାର ସାହୁ, ଦଳୀୟ କର୍ମୀ ପ୍ରଦୀପ କୁମାର ସାହୁ, ମଦନ ମୋହନ ସାହୁ, ସନ୍ତୋଷ କୁମାର ଜେନା, କାଳନ୍ଦୀ ଚରଣ ସାହୁ ପ୍ରମୁଖଙ୍କ ସହିତ ଦଳୀୟ କର୍ମୀ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ୮୩ ୟୁନିଟ୍ ରକ୍ତ ସଂଗ୍ରହ କରାଯାଇଥିଲା।
