ଜାତିସଂଘ,୧୬ା୭(ପି.ଟି.): ବିଶ୍ୱରେ ୮୨କୋଟିରୁ ଊର୍ଦ୍ଧ୍ୱ ଲୋକ କ୍ଷୁଧା, ଖାଦ୍ୟାଭାବ ଏବଂ ଅପପୁଷ୍ଟିର ଶିକାର ହୋଇଥିବା ଜାତିସଂଘ ରିପୋର୍ଟରେ ପ୍ରକାଶ ପାଇଛି। ୨୦୧୫ରୁ ଖାଦ୍ୟ ଅଭାବ ବୃଦ୍ଧି ପାଇବାରେ ଲାଗିଛି। ୨୦୩୦ ସୁଦ୍ଧା ଜାତିସଂଘର ପୋଷଣୀୟ ଉନ୍ନୟନ ଲକ୍ଷ୍ୟ ପୂରଣକୁ ଦୃଷ୍ଟିରେ ରଖିଲେ ଏହି ଧାରା ବିପରୀତ ବୋଲି ସୂଚନା ମିଳୁଛି। ୨୦୩୦ ବେଳକୁ ବିଶ୍ୱର କୌଣସି ବି ଲୋକ ଭୋକ ଉପାସରେ ରହିବେ ନାହିଁ ପ୍ରସଙ୍ଗ ‘ଅତ୍ୟନ୍ତ ଆହ୍ବାନକାରୀ’ ବୋଲି ଉକ୍ତ ରିପୋର୍ଟରେ କୁହାଯାଇଛି।
ଆଫ୍ରିକାରେ ୨୦ପ୍ରତିଶତ ଲୋକ ଅପପୁଷ୍ଟିର ଶିକାର ହୋଇଥିବାବେଳେ ଏସିଆରେ ୧୨ପ୍ରତିଶତରୁ ଅଧିକ ଏବଂ ଲାଟିନ ଆମେରିକା ଓ ପ୍ରଶାନ୍ତ ମହାସାଗରୀୟ ଅଞ୍ଚଳରେ ୭ପ୍ରତିଶତ ଲୋକ ଅପପୁଷ୍ଟିର ଶିକାର ହୋଇଛନ୍ତି। ବିଶ୍ୱର କିଛି ଅଞ୍ଚଳର ଲୋକେ ଖାଦ୍ୟ ସଂକଟର ସମ୍ମୁଖୀନ ହୋଇଛନ୍ତି। ସାମଗ୍ରିକ ଭାବରେ ବିଶ୍ୱରେ ୨୦୦କୋଟିରୁ ଊର୍ଦ୍ଧ୍ୱ ଲୋକ ଖାଦ୍ୟ ଅଭାବର ସମ୍ମୁଖୀନ ହୋଇଛନ୍ତି। ଜାତିସଂଘର ଖାଦ୍ୟ ଓ କୃଷି ସଂଗଠନ ପକ୍ଷରୁ ମିଳିଥିବା ସୂଚନା ଅନୁଯାୟୀ, ବର୍ତ୍ତମାନର ଏହି ଧାରା ବଜାୟ ରହିଲେ ୨୦୩୦ ସୁଦ୍ଧା ଅନେକ ଶିଶୁ ଅପପୁଷ୍ଟିର ଶିକାର ହେବେ ଏବଂ ‘କେହି ଜଣେ ଭୋକରେ ରହିବେ ନାହିଁ’ ଲକ୍ଷ୍ୟ ପୂରଣ ହୋଇପାରିବ ନାହିଁ। ବର୍ତ୍ତମାନ ପାଖାପାଖି ୧୪କୋଟି ୯୦ଲକ୍ଷ ଶିଶୁଙ୍କର ଅଭିବୃଦ୍ଧି ଖାଦ୍ୟ ଅଭାବରୁ ବିଳମ୍ବ ହେଉଛି। ଉକ୍ତ ରିପୋର୍ଟରେ ପୁଣି କୁହାଯାଇଛି, ପୃଥିବୀର ସବୁ ଅଞ୍ଚଳରେ ମେଦ ବହୁଳତା ତଥା ଅଧିକ ଓଜନଯୁକ୍ତ ଲୋକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ବିଶେଷକରି ସ୍କୁଲ ଯିବା ବୟସର ପିଲା ଏବଂ ବୟସ୍କ ବ୍ୟକ୍ତି ଅଧିକ ସଂଖ୍ୟାରେ ଏହାର ଶିକାର ହେଉଛନ୍ତି।
