ନୂଆଦିଲ୍ଲୀ,୨୨ା୫(ପି.ଟି.): ଏକ୍ଜିଟ୍ ପୋଲ୍ଗୁଡ଼ିକ ଭାଜପା ସପକ୍ଷରେ ଜନମତ ରହିଥିବା ଭବିଷ୍ୟବାଣୀ କରିଥିବାବେଳେ ୫ ହିନ୍ଦୀଭାଷୀ ରାଜ୍ୟ ଉପରେ ଭରସା କରିଛି ଗୈରିକ ଦଳ। ୨୦୧୪ ସାଧାରଣ ନିର୍ବାଚନରେ ଉତ୍ତରପ୍ରଦେଶ, ବିହାର, ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ର ୧୮୫ ଆସନ ମଧ୍ୟରୁ ଭାଜପାକୁ ୯୦% ଅର୍ଥାତ୍ ୧୬୫ଟିରେ ସଫଳତା ମିଳିଥିଲା। ଏଥର ମଧ୍ୟ ବିହାର, ମଧ୍ୟପ୍ରଦେଶ ଓ ରାଜସ୍ଥାନରେ ଭାଜପାର ପ୍ରଦର୍ଶନ ଭଲ ରହିବ ବୋଲି ଅଧିକାଂଶ ସର୍ଭେ ସଂସ୍ଥା ପକ୍ଷରୁ କୁହାଯାଇଛି। ଛତିଶଗଡ଼ରେ କଂଗ୍ରେସ ଓ ଭାଜପା ମଧ୍ୟରେ କଡ଼ା ଟକ୍କର ହେବ ବୋଲି ଅନୁମାନ କରାଯାଉଛି। ସେହିପରି ଉତ୍ତରପ୍ରଦେଶରେ ଗତଥର ଭାଜପା ୮୦ ଆସନ ମଧ୍ୟରୁ ୭୧ ଆସନରେ ସଫଳତା ପାଇଥିବାବେଳେ ଏଥର ଏସ୍ପି-ବିଏସ୍ପି ମେଣ୍ଟ ଯୋଗୁ ୩୩-୬୫ଟି ସିଟ୍ ଦଖଲ କରିବ ବୋଲି କୁହାଯାଉଛି। ତେଣୁ ୫ ରାଜ୍ୟରେ ଭାଜପାକୁ ଏଥର ୮୯ ଆସନରେ ସନ୍ତୁଷ୍ଟ ହେବାକୁ ପଡ଼ିବ ବୋଲି କେତେକ ସଂସ୍ଥା ଆକଳନ କରିଛନ୍ତି। ଅନ୍ୟ କେତେକ ଏକ୍ଜିଟ୍ ପୋଲ୍ର ହିସାବକୁ ଧରିନିଆଗଲେ ଏହି ସଂଖ୍ୟା ୧୪୪କୁ ଛୁଇଁବ। ସେହିପରି ଓଡ଼ିଶା ଏବଂ ପଶ୍ଚିମବଙ୍ଗରେ ଦଳର ପ୍ରଦର୍ଶନ ଉପରେ ମଧ୍ୟ ଭାଜପା ନେତା ଆଶାବାଦୀ ଥିବା ଜଣାପଡ଼ିଛି।
