ପୁରୀ ଅଫିସ, ୨୭ା୫: ବାତ୍ୟାରେ ପୁରୀ ଜିଲାରେ ବିଦ୍ୟୁତ୍ ବିଭାଗର ସବୁଠୁ ଅଧିକ କ୍ଷତି ହୋଇଛି। ଯୁଦ୍ଧକାଳୀନ ଭିତ୍ତିରେ ପୁନରୁଦ୍ଧାର କାମ ଚାଲୁଥିଲେ ମଧ୍ୟ ଏ ପର୍ଯ୍ୟନ୍ତ ଜିଲାର ଅନେକ ଅଞ୍ଚଳ ଅନ୍ଧାର ରହିଛି। ତଥାପି ୨,୦୦୦ରୁ ଊର୍ଦ୍ଧ୍ୱ ଲୋକ ବିଦ୍ୟୁତ୍ ଯୋଗାଣକୁ ସ୍ବାଭାବିକ କରିବାରେ ନିୟୋଜିତ ଅଛନ୍ତି। ବର୍ତ୍ତମାନ ପ୍ରବଳ ଗୁଳୁଗୁଳି ହେଉଥିବାରୁ ଲୋକେ ଅସ୍ତବ୍ୟସ୍ତ ହୋଇପଡୁଛନ୍ତି। ବିଦ୍ୟୁତ୍ ପହଞ୍ଚତ୍ ନ ଥିବାରୁ ମଝିରେ ମଝିରେ କେତେକ ଅଞ୍ଚଳରେ ଉତ୍ତେଜନା ପ୍ରକାଶ ପାଉଛି। ତେବେ ଏଭଳି ସମୟରେ ଧୈର୍ଯ୍ୟ ଧରି ପୁନରୁଦ୍ଧାର କାମରେ ସହଯୋଗ କରିବାକୁ ସେସୁର ବରିଷ୍ଠ ଅଧିକାରୀ ପ୍ରଦୀପ ସାହୁ କହିଛନ୍ତି।
ବର୍ତ୍ତମାନ ସୁଦ୍ଧା ବିଦ୍ୟୁତ୍ ଯୋଗାଣ ସ୍ଥିତି ସମ୍ପର୍କରେ ସୋମବାର ଗଣମାଧ୍ୟମକୁ ସୂଚନା ଦେଇ ସାହୁ କହିଛନ୍ତି, ପୁରୀ ଜିଲାରେ ପୁରୀ ଡିଭିଜନରେ ପ୍ରାୟ ୧ଲକ୍ଷ ୫୦ ହଜାର ଗ୍ରାହକ ଅଛନ୍ତି। ସେଥିମଧ୍ୟରୁ ପୁରୀ ସହର ଏବଂ ଉପକଣ୍ଠ ଅଞ୍ଚଳରେ ୬୩,୦୦୦ ଉପଭୋକ୍ତା ରହିଛନ୍ତି। ବର୍ତ୍ତମାନ ସୁଦ୍ଧା ୪୩,୦୦୦ ପରିବାରକୁ ବିଦ୍ୟୁତ୍ ସଂଯୋଗ ଦିଆସରିଛି। ଆସନ୍ତା ୨/୩ ଦିନ ମଧ୍ୟରେ ସବୁ ଗ୍ରାହକଙ୍କ ପାଖରେ ବିଦ୍ୟୁତ୍ ପହଞ୍ଚାଇବାର ଲକ୍ଷ୍ୟ ରଖିଛୁ। ପୁରୀ ସହର ଏବଂ ଏହାର ଆଖପାଖ ଅଞ୍ଚଳକୁ ବାଦ୍ ଦେଲେ ସାକ୍ଷୀଗାପାଳ, ଚନ୍ଦନପୁର, କଣାସ, ଗୋପ, ବ୍ରହ୍ମଗିରି, ସାତଶଙ୍ଖ, ଡେଲାଙ୍ଗ, ସାତପଡ଼ା ପ୍ରଭୃତି ଅଞ୍ଚଳରେ ୯୫,୦୦୦ ଗ୍ରାହକ ରହିଛନ୍ତି। ବର୍ତ୍ତମାନ ସୁଦ୍ଧା ଏହିସବୁ ଅଞ୍ଚଳରେ ୩,୦୦୦ ଗ୍ରାହକଙ୍କୁ ସଂଯୋଗ ଦିଆଯାଇଛି। ମୁଖ୍ୟତଃ ବଜାରଗୁଡ଼ିକୁ ବିଦ୍ୟୁତ୍ ଯୋଗାଣ ହୋଇଛି। ଅନ୍ୟପକ୍ଷରେ ପୁରୀ ଡିଭିଜନରେ ଥିବା ୧୫ଟି ୩୩ କେଭି ସବ୍ଷ୍ଟେଶନକୁ ସଂଯୋଗ ଦିଆସରିଛି। ତେଣୁ ଆଗକୁ କାମ ଆହୁରି ତ୍ୱରାନ୍ବିତ ହେବ। ତେବେ ଜୁନ୍ ମାସ ଶେଷ ଆଡକୁ ଅର୍ଥାତ୍ ରଥଯାତ୍ରା ପୂର୍ବରୁ ସମ୍ପୂର୍ଣ୍ଣ ଜିଲାକୁ ବିଦ୍ୟୁତ୍ ଯୋଗାଣ ସ୍ବାଭାବିକ କରିବା ଲାଗି ଆଶା ରଖିଛୁ। ଏହାକୁ ନଜରରେ ରଖି ଯୁଦ୍ଧକାଳୀନ ଭିତ୍ତିରେ କାମ ଚାଲିଛି। ତେବେ ବର୍ତ୍ତମାନ ଖରା ବଢୁଥିବାରୁ ଏବଂ ଆଗକୁ ଯଦି ବର୍ଷା ହୁଏ ତେବେ କାମରେ ବାଧା ଉପୁଜିପାରେ ବୋଲି ସାହୁ କହିଛନ୍ତି। ସାହୁ ଆହୁରି ମଧ୍ୟ କହିଛନ୍ତି, ନବକଳେବର ସମୟରେ ପୁରୀରେ ବିଦ୍ୟୁତ୍ ଭିତ୍ତିଭୂମିକୁ ସୁଦୃଢ କରାଯାଇଥିଲା। ୮୦ କିମି ଭୂତଳ କେବୁଲ ପଡିଥିବାରୁ ଆଜି ବିଦ୍ୟୁତ୍ ଯୋଗାଣ ଶୀଘ୍ର ସମ୍ଭବ ହୋଇପାରୁଛି। ନଚେତ୍ ବାତ୍ୟାରେ ପୁରୀ ଜିଲାରେ ବିଭାଗର ଯେଉଁ ପରିମାଣର କ୍ଷୟକ୍ଷତି ହୋଇଥିଲା ବିଦ୍ୟୁତ୍ ଯୋଗାଣ ପାଇଁ ପ୍ରାୟ ୨ ମାସ ସମୟ ଲାଗିଯାଇଥାନ୍ତା ବୋଲି ସାହୁ କହିଛନ୍ତି।
