ରୋଜେୟୁ,୫ା୭: ବାଂଲାଦେଶ ବିପକ୍ଷ ଦ୍ୱିତୀୟ ଅନ୍ତର୍ଜାତୀୟ ଟି୨୦ କ୍ରିକେଟ ମ୍ୟାଚ୍ରେ ଓ୍ବେଷ୍ଟଇଣ୍ଡିଜ ୩୫ ରନ୍ରେ ବିଜୟ ହାସଲ କରିଛି। ଓ୍ବିଣ୍ଡସର ପାର୍କଠାରେ ଖେଳାଯାଇଥିବା ମ୍ୟାଚ୍ରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଓ୍ବେଷ୍ଟଇଣ୍ଡିଜ ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ହରାଇ ୧୯୩ ରନ୍ କରିଥିଲା।
ରୋଭମାନ ପାଓ୍ବେଲ ୨୮ ବଲ୍ରୁ ୨ ଚୌକା ଓ ୬ ଛକା ସହ ୬୧ ରନ୍ କରି ଅପରାଜିତ ରହିଥିଲେ। ଅନ୍ୟମାନଙ୍କ ମଧ୍ୟରେ ଓପ୍ନର ବ୍ରାଣ୍ଡନ କିଙ୍ଗ୍ ୪୩ ବଲ୍ରେ ୫୭ ରନ୍, ଅଧିନାୟକ ନିକୋଲାସ ପୁରନ ୩୦ ବଲ୍ରେ ୩୪ ରନ୍ କରିଥିଲେ। ଭ୍ରମଣକାରୀ ଦଳର ବାମହାତୀ ପେସର ଶୋରିଫୁଲ୍ ଇସ୍ଲାମ ୪ ଓଭରରେ ୪୦ ରନ୍ ଦେଇ ୨ ଉଇକେଟ ଅକ୍ତିଆର କରିଥିଲେ।
ଜବାବରେ ବାଂଲାଦେଶ ୬ ଉଇକେଟ ହରାଇ ୧୫୮ ରନ୍ କରିଥିଲା। ଦଳର ଆରମ୍ଭ ଉତ୍ସାହଜନକ ନ ଥିଲା। ଦଳ ୨୩ ରନ୍ରେ ୩ ଉଇକେଟ ହରାଇ ସଙ୍କଟରେ ପଡ଼ିଥିଲା। ଟପ୍ ସ୍କୋରର ଶକିବ ଅଲ ହସନ ୫୨ ବଲ୍ରୁ ୬୮ ରନ୍ କରି ଅପରାଜିତ ରହିଥିଲେ। ସେ ୫ ଚୌକା ଓ ୩ ଛକା ଲଗାଇଥିଲେ। ମ୍ୟାଚ୍ରେ ସେ ବ୍ୟକ୍ତିଗତ ସର୍ବାଧିକ ରନ୍ ସଂଗ୍ରହ କରିଥିଲେ। ଘରୋଇ ଦଳର ସଫଳ ବୋଲର ପେସର ରୋମାରିଓ ଶେଫର୍ଡ ତାଙ୍କ ୪ ଓଭର ବୋଲିଂରେ ୨୮ ରନ୍ ବିନିମୟରେ ୨ ଉଇକେଟ ଅକ୍ତିଆର କରିଥିଲେ। ଓ୍ବେଷ୍ଟଇଣ୍ଡିଜ ୩୫ ରନ୍ରେ ସହଜ ବିଜୟ ହାସଲ କରିବା ସହ ୩ ମ୍ୟାଚ୍ବିଶିଷ୍ଟ ସିରିଜରେ ୧-୦ରେ ଅଗ୍ରଣୀ ଲାଭ କରିଛି।
