ନୂଆଦିଲ୍ଲୀ,୩।୬: ଭାରତୀୟ ଅର୍ଥ ବ୍ୟବସ୍ଥା ବର୍ତ୍ତମାନ ସଙ୍କଟ ସ୍ଥିତି ଦେଇ ଗତି କରୁଛି। ରେଟିଙ୍ଗ ଏଜେନ୍ସି ମୁଡିସ୍ ଭାରତର ରେଟିଂକୁ ସୋମବାର ଖସାଇଦେଇଛି। ବର୍ତ୍ତମାନ ନୀତି ନିର୍ଦ୍ଧାରଣ ଏବଂ ଏହାକୁ ଲାଗୁ କରିବା କଷ୍ଟକର ହୋଇ ପଡିବ ବୋଲି ଏହି ରେଟିଂ ଏଜେନ୍ସି ଏହାର ରିପୋର୍ଟରେ ଉଲ୍ଲେଖ କରିଛି। ସରକାର ସବୁ କିଛି ସମ୍ଭାଳିବା ଲାଗି ପ୍ରୟାସ ଜାରି ରଖିଛନ୍ତି ହେଲେ କରୋନା ଯୋଗୁ ଉପୁଜିଥିବା ସ୍ଥିତି ଗମ୍ଭୀର ରହିଛି। ଆତ୍ମନିର୍ଭର ପ୍ୟାକେଜରେ ସରକାର ଏମ୍ଏସ୍ଏମ୍ଇ ଲାଗି ବ୍ୟବସ୍ଥା କରିଛନ୍ତି। ହେଲେ ନିକଟରେ ଆସିଥିବା ଏକ ରିପୋର୍ଟ ଚିନ୍ତାକୁ ବଢାଇ ଦେଇଛି।
ଅଲ ଇଣ୍ଡିଆ ମାନୁଫାକ୍ଚରର୍ସ ଅର୍ଗାନାଇଜେଶନ ରିପୋର୍ଟ ମୁତାବକ ୩୫% ଏମ୍ଏସ୍ଏମ୍ଇ ଏବଂ ୩୭ ଆତ୍ମନିର୍ଭର ବ୍ୟକ୍ତି ସେମାନଙ୍କ କାରବାର ବନ୍ଦ କରିବା ସ୍ଥିତି ଆସିଛି। ସରକାର ଯେଉଁ ଭଳି ପଦକ୍ଷେପ ଘୋଷଣା କରିଛନ୍ତି ତା’ର ଲାଭ ଲୋକଙ୍କ ନିକଟକୁ ପହଞ୍ଚି ନ ଥିବା ରିପୋର୍ଟରେ କୁହାଯାଇଛି। କ୍ଷୁଦ୍ର ଶିଳ୍ପ ସହିଥିବା କ୍ଷତିକୁ ଭରଣା କରିବା ଲାଗି ପଦକ୍ଷେପ ପର୍ଯ୍ୟାପ୍ତ ନୁହେଁ ବୋଲି ଶିଳ୍ପ ବିଶେଷଜ୍ଞ କହିଛନ୍ତି। କ୍ଷୁଦ୍ର ଶିଳ୍ପ ସହ ଜଡିତ ୪୬ ବ୍ୟକ୍ତିବିଶେଷଙ୍କୁ ନେଇ ହୋଇଥିବା ଅଧ୍ୟୟନ ମୁତାବକ କ୍ଷତି ଯୋଗୁ କମ୍ପାନୀଗୁଡିକର ଅଣ୍ଟା ଭାଙ୍ଗିଯାଇଥିବା କହିଛନ୍ତି। ୩୨% କହିଛନ୍ତି ଯେ, କ୍ଷତିର ଭରଣା କରିବା ଲାଗି ଅନ୍ତତଃ ପକ୍ଷେ ୬ ମାସ ସମୟ ଲାଗିବ। ୧୨% କହିଛନ୍ତି ସବୁ କିଛି ଟ୍ରାକ୍କୁ ଆସିବା ଲାଗି ୩ ମାସ ସମୟ ଲାଗିପାରେ।
ଦେଶରେ ୬.୫ କୋଟି ଏମ୍ଏସ୍ଏମ୍ଇ ରହିଛି। ଏହି କମ୍ପାନୀଗୁଡିକରେ ୧୫ କୋଟି ଲୋକ କାମ କରୁଛନ୍ତି। ଦେଶର ଅର୍ଥ ବ୍ୟବସ୍ଥାକୁ ଏହି ଶିଳ୍ପଗୁଡିକ ପ୍ରମୁଖ ଯୋଗଦାନ ରଖୁଥିବା ବେଳେ ଶିଳ୍ପ ବନ୍ଦ ହୋଇଗଲେ ସ୍ଥିତିକୁ ସମ୍ଭାଳିବା କଷ୍ଟକର ବ୍ୟାପାର ହୋଇ ପଡିବ। ଦେଶର ଜିଡିପିରେ ଏମ୍ଏସ୍ଏମ୍ଇଗୁଡିକର ଯୋଗଦାନ ୩୦% ରହିଛି। ଉକ୍ତ କ୍ଷେତ୍ରରେ ଲୋକମାନେ କାମ କରୁଥିବାରୁ ଖର୍ଚ୍ଚ ମଧ୍ୟ କରୁଛନ୍ତି। ଯଦି କାମ ବନ୍ଦ ହୋଇଯାଏ ତେବେ ତା’ର ପ୍ରଭାବ ଖର୍ଚ୍ଚ ଉପରେ ପଡିବ। ବର୍ତ୍ତମାନ ଚାହିଦା ପ୍ରଭାବିତ ଥିବାରୁ ଯଦି ୩୩% କମ୍ପାନୀ ବନ୍ଦ ହୋଇଯାଏ ତେବେ ଏହା ଅର୍ଥ ବ୍ୟବସ୍ଥା ଲାଗି ବହୁ ନକରାତ୍ମକ ପ୍ରଭାବ ପକାଇବ ବୋଲି ରିପୋର୍ଟରେ କୁହାଯାଇଛି
