ଜାକର୍ତ୍ତା,୨୯ା୪: ଇଣ୍ଡୋନେସିଆ ନିର୍ବାଚନ ଭୋଟ ଗଣତିବେଳେ କାର୍ଯ୍ୟ ଚାପରେ ୨୭୨ ଜଣଙ୍କ ମୃତ୍ୟୁ ହୋଇଛି। ଏକ ସଙ୍ଗେ ରାଷ୍ଟ୍ରପତି ନିର୍ବାଚନ ସହ ଜାତୀୟ ପାର୍ଲାମେଣ୍ଟ ଓ ଆଞ୍ଚଳିକ ପାର୍ଲାମେଣ୍ଟ ଲାଗି ନିର୍ବାଚନ ହୋଇଥିଲା। ଦୀର୍ଘ ସମୟ ଧରି ଭୋଟ୍ ଗଣତିରେ କର୍ମଚାରୀମାନେ କ୍ଲାନ୍ତ ହୋଇପଡିଥିଲେ। ଶନିବାର ରାତି ସୁଦ୍ଧା ୨୭୨ ନିର୍ବାଚନ କର୍ମଚାରୀଙ୍କ ମୃତ୍ୟୁ ଘଟିଥିବାବେଳେ ୧,୮୭୮ ଜଣ ଅସୁସ୍ଥ ହୋଇପଡ଼ିଛନ୍ତି। ହାତରେ ବହୁ ଘଣ୍ଟାଧରି କୋଟି କୋଟି ବାଲଟ୍ପେପର୍ ଗଣିବାରୁ ସେମାନେ ଥକିପଡିବା ସହ ଅସୁସ୍ଥ ହୋଇପଡ଼ିଥିଲେ ବୋଲି ଜଣେ ଅଧିକାରୀ ପ୍ରକାଶ କରିଛନ୍ତି।
ଏପ୍ରିଲ ୧୭ ତାରିଖରେ ୨୬ କୋଟି ଲୋକଙ୍କ ପାଇଁ ପ୍ରଥମ ଥର ଲାଗି ଇଣ୍ଡୋନେସିଆର ରାଷ୍ଟ୍ରପତି ନିର୍ବାଚନ, ସଂସଦୀୟ ନିର୍ବାଚନ ଓ ବିଧାନସଭା ନିର୍ବାଚନ ଏକକାଳୀନ ଗୋଟିଏ ଦିନରେ କରାଯାଇଥିଲା। ଅଧିକ ବ୍ୟୟ ରୋକିବା ଲାଗି ପ୍ରଶାସନ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଥିଲା। ଭୋଟଗ୍ରହଣ ଶାନ୍ତିପୂର୍ଣ୍ଣଭାବେ ଶେଷ ହୋଇଥିଲାବେଳେ ପ୍ରାୟ ୮୦ ପ୍ରତିଶତ ମତଦାନ କରାଯାଇଥିଲା। ପ୍ରାୟ ୧୯.୩ ନିୟୁତ ଭୋଟର ଏଥିରେ ଅଂଶଗ୍ରହଣ କରିଥିଲେ। ନିର୍ବାଚନ କର୍ମଚାରୀମାନେ ଭୋଟ୍ଲାଗି ଦୂରଦୂରାନ୍ତକୁ ଯିବା ଓ ଦୀର୍ଘ ସମୟଧରି ବିଶ୍ରାମ ନ ପାଇ ବାଲଟ୍ପେପର୍ ଗଣିବା ଯୋଗୁଁ ଅସୁସ୍ଥ ହୋଇପଡ଼ିଥିଲେ ବୋଲି ନିର୍ବାଚନ କମିଶନଙ୍କ ମୁଖପାତ୍ର ଆରିଫ ପ୍ରିୟୋ ସୁଶାନ୍ତୋ ପ୍ରକାଶ କରିଛନ୍ତି। ଗତ ୨୩ ତାରିଖରେ ସ୍ବାସ୍ଥ୍ୟମନ୍ତ୍ରୀ ନିର୍ବାଚନରେ ନିୟୋଜିତ କର୍ମଚାରୀଙ୍କୁ ସମସ୍ତ ଚିକିତ୍ସା ସୁବିଧା ଯୋଗାଇ ଦେବାକୁ ସର୍କୁଲାର ଜାରି କରିଥିଲେ। ଅର୍ଥ ମନ୍ତ୍ରଣାଳୟ ତରଫରୁ ମୃତ୍ୟୁବରଣ କରିଥିବା ନିର୍ବାଚନ କର୍ମଚାରୀଙ୍କ ପରିବାରକୁ ଅନୁକମ୍ପାମୂଳକ ସହାୟତା ପ୍ରଦାନ କରାଯିବା ଲାଗି ପ୍ରୟାସ କରାଯାଉଥିବା ସୁଶାନ୍ତୋ କହିଛନ୍ତି।
