ଭୁବନେଶ୍ୱର,୨୦।୮(ବ୍ୟୁରୋ): ରାଜ୍ୟ କଂଗ୍ରେସର ସମସ୍ତ ନେତାଙ୍କୁ ଦିଲ୍ଲୀରୁ ଡାକରା ଆସିଛି। ଆସନ୍ତା ୨୨ରେ ନେତାମାନେ ଦିଲ୍ଲୀ ଯିବେ। ଦଳର ହାଇକମାଣ୍ଡଙ୍କ ପାଖରୁ ଏହି ଡାକରା ଆସିଥିବା ପରିପ୍ରେକ୍ଷୀରେ ମଙ୍ଗଳବାର କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ହାଇକମାଣ୍ଡଙ୍କ ସହ ଆଲୋଚନା ବେଳେ ପିସିସି ସଭାପତି ପରିବର୍ତ୍ତନ ନ କରିବାକୁ କହିବୁ। ଆଗକୁ ପୌର ନିର୍ବାଚନ ଅଛି। ଏଣୁ ଏବେ ନିରଞ୍ଜନ ପଟ୍ଟନାୟକଙ୍କୁ ନହଟାଇବାକୁ କହିବୁ। ତୃଣମୂଳସ୍ତରରେ କର୍ମୀମାନେ ଏକାଠି ଅଛନ୍ତି, ଉପରେ ନେତା ବିଭାଜିତ। ନିର୍ବାଚନ ବେଳେ ନିରଞ୍ଜନ କର୍ମୀଙ୍କୁ ଏକାଠି କରିବାରେ ସମୟ ଦେଇଛନ୍ତି। ତେଣୁ ଶରତ, ଜୟଦେବ ଓ ନିରଞ୍ଜନ ଏକାଠି ହେଲେ ଦଳ ସୁଦୃଢ଼ ହେବ ବୋଲି ତାରା କହିଛନ୍ତି।
ପ୍ରକାଶଯୋଗ୍ୟ, ଦିଲ୍ଲୀ ଗସ୍ତ କାଳରେ କଂଗ୍ରେସର ଏକ ବଡ଼ ବୈଠକ ବସିବ। ଏଥିରେ ଏଆଇସିସି ଅଧ୍ୟକ୍ଷ ଚୟନ ଓ ସାଙ୍ଗଠନିକସ୍ତରରେ ବଡ଼ ଧରଣର ଅଦଳବଦଳ ହେବା ନେଇ ଆଲୋଚନା ହେବ ବୋଲି ଚର୍ଚ୍ଚା ହେଉଛି।
