ଓ୍ବେଷ୍ଟଇଣ୍ଡିଜ୍ ଗସ୍ତ ପାଇଁ ଭାରତୀୟ ଦଳ ଘୋଷଣା କରାଯାଇଛି। ଏହି ଗସ୍ତ ପାଇଁ ଭାରତୀୟ ଦଳରେ ଅନେକ ନୂଆ ଚେହେରା ସ୍ଥାନ ପାଇଛନ୍ତି। ସେମାନଙ୍କ ମଧ୍ୟରୁ ନବଦୀପ ସଇନି ଅନ୍ୟତମ। ୨୦୧୯ ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ପକ୍ଷରୁ ଖେଳୁଥିବା ନବଦୀପ ଓ୍ବେଷ୍ଟଇଣ୍ଡିଜ୍ ଗ୍ରସ୍ତରେ ଉଭୟ ଏକଦିବସୀୟ ଏବଂ ଟି-୨୦ ଦଳରେ ସ୍ଥାନ ପାଇଛନ୍ତି। ଦିଲ୍ଲୀ ପକ୍ଷରୁ ରଣଜୀ ଖେଳୁଥିବା ନବଦୀପ ଦ୍ରୁତ ଗତିରେ ବୋଲିଂ ସାଙ୍ଗକୁ ସଠିକ୍ ଲାଇନ୍ରେ ବଲ୍ ପକାଇବା ଯୋଗୁ ତାଙ୍କୁ ଦଳରେ ଚୟନ କରାଯାଇଛି। ଆଇପିଏଲରେ ମଧ୍ୟ ସେ ତାଙ୍କ ପ୍ରତିଭା ଦେଖାଇସାରିନ୍ତି। ୨୦୧୭-୧୮ ରଣଜୀ ସିଜିନ୍ରେ ଦିଲ୍ଲୀକୁ ଫାଇନାଲ ପହଞ୍ଚାଇବାରେ ନବଦୀପଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ସେ ୮ଟି ମ୍ୟାଚରୁ ୩୪ ଓ୍ବିକେଟ ନେଇଥିଲେ। କ୍ରିକେଟ ସଫଳତା ପାଇବା ପାଇଁ ତାଙ୍କୁ ଖୁବ୍ ପରିଶ୍ରମ କରିବାକୁ ପଡିଥିଲା। ମାତ୍ର ୨୦୦ ଟଙ୍କା ପାଇଁ ସେ ଗଳି କ୍ରିକେଟ ଟୁର୍ନାମେଣ୍ଟରେ ଭାଗ ନେଉଥିଲେ। ୨୦୧୩ ପର୍ଯ୍ୟନ୍ତ ଲେଦର୍ ବଲରେ ନୁହେଁ, ଟେନିସ୍ ବଲରେ ସେ ବୋଲିଂ କରୁଥିଲେ। ପୂର୍ବତନ ଭାରତୀୟ ଖେଳାଳି ଗୌତମ ଗମ୍ଭୀର ଏକ ଘରୋଇ କ୍ରିକେଟ ଲିଗ୍ରେ ନବଦୀପଙ୍କୁ ଭେଟିଥିଲେ। ତାଙ୍କ ପ୍ରତିଭାକୁ ଚିହ୍ନି ତାଙ୍କୁ ପ୍ରଥମେ ନେଟ୍ରେ ଅଭ୍ୟାସ ପାଇଁ ଡାକିଥିଲେ। ପରେ ତାଙ୍କୁ ଦୁଇହଳ ଜୋତା ଦେଇଥିଲେ। ପ୍ରତିଦିନ ସେ ଫିରୋଜ ଶାହ କୋଟଲାକୁ ଅଭ୍ୟାସ ପାଇଁ ଆସନ୍ତି। ଶେଷରେ ହରିୟାଣାର ହୋଇଥିଲେ ମଧ୍ୟ, ଦିଲ୍ଲୀ ପାଇଁ ରଣଜୀ ଖେଳିବାକୁ ଇଚ୍ଛା ପ୍ରକାଶ କରିଥିଲେ।
