ବ୍ରହ୍ମଗିରି,୧୧।୬(ଡି.ଏନ.ଏ.)- ଦିନ କେଇଟା ପରେ ଓଡ଼ିଶାର ଗଣ ପର୍ବ ରଜ ଉତ୍ସବ। ଏହି ଉତ୍ସବକୁ ନେଇ ପ୍ରତିଟି ଶକ୍ତି ପୀଠ ହୋଇଥାଏ ଚଳଚଞ୍ଚଳ। ଏହି ଶକ୍ତପୀଠଗୁଡ଼ିକ ମଧ୍ୟରୁ ବ୍ରହ୍ମଗିରି ବାଲି ହରଚଣ୍ଡୀ ପୀଠ ଅନ୍ୟତମ। ଉକ୍ତ ପୀଠରେ ୪ ଦିନ ଧରି ରଜ ଉତ୍ସବ ପାଳନ ହୋଇଥାଏ। କିନ୍ତୁ ଚଳିତବର୍ଷ କରୋନା ଯୋଗୁ ରଜ ଉତ୍ସବରେ ରୋକ ଲଗାଯାଇଛି। ଗୁରୁବାର ବ୍ରହ୍ମଗିରି ତହସିଲଦାର କିଶୋର କୁମାର ପଣ୍ଡାଙ୍କ ଅଧ୍ୟକ୍ଷତାରେ ବ୍ରହ୍ମଗିରି ଥାନା ଅଧିକାରୀ ମନୋଜ କୁମାର ଶତପଥୀ, ମନ୍ଦିର ପରିଚାଳନା କମିଟିର ସଦସ୍ୟ ଲକ୍ଷ୍ମୀଧର ପୂଜାରୀ, ନୀଳମଣି ସୁଆର ଓ ସମସ୍ତ ପୂଜକଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ମା’ଙ୍କ ରଜ ପର୍ବ ଓ ଜନସମାଗମକୁ ଦୃଷ୍ଟିରେ ରଖି ଉକ୍ତ ପୀଠରେ ୧୪୪ ଧାରା ଜାରି କରାଯିବା ସହ କେବଳ ସେବାୟତମାନଙ୍କୁ ନେଇ ରଜ ପର୍ବର ନୀତିକାନ୍ତି କରାଯିବ ବୋଲି ନିଷ୍ପତ୍ତି ହୋଇଛି। ଠାକୁରାଣୀଙ୍କୁ ସାଧାରଣ ଦର୍ଶନ ସହ ଉକ୍ତ ପୀଠରେ ରଜମୌଜ ବା ବଣଭୋଜି ପାଇଁ ସମ୍ପୂର୍ଣ୍ଣ ବାରଣ କରାଯିବ। ଏହି ରଜ ଉତ୍ସବ ପାଳନ ଅବସରରେ ଆସନ୍ତା ୧୩ ତାରିଖ ମଧ୍ୟରାତ୍ରରୁ ୨୦ତାରିଖ ମଧ୍ୟରାତ୍ର ପର୍ଯ୍ୟନ୍ତ ୧୪୪ ଧାରା ଜାରି ରହିବ ବୋଲି ତହସିଲଦାର ପଣ୍ଡା ସୂଚନା ଦେଇଛନ୍ତି।
