ଭୁବନେଶ୍ୱର,୨୫ା୫(ବ୍ୟୁରୋ): ଓଡ଼ିଶାରେ ବିଭିନ୍ନ ଜିଲାରେ ଅଟକି ରହିଥିବା ବିହାରର ୧୦୯୮ଜଣ ଶ୍ରମିକଙ୍କୁ ନେଇ ଭୁବନେଶ୍ୱର-ଦାନାପୁର ଶ୍ରମିକ ସ୍ପେଶାଲ ଟ୍ରେନ୍ ବିହାର ଅଭିମୁଖେ ସୋମବାର ଯାତ୍ରା କରିଛି। ଅପରାହ୍ନ ୪ଟାରେ ଅତିରିକ୍ତ ଜିଲାପାଳ ପ୍ରଫୁଲ୍ଲ କୁମାର ସ୍ବାଇଁ ଭୁବନେଶ୍ୱର ନୂଆ ରେଳଷ୍ଟେଶନରେ ଉପସ୍ଥିତ ରହି ସବୁଜ ପତାକା ଦେଖାଇ ଏହି ଯାତ୍ରାର ଶୁଭାରମ୍ଭ କରିଥିଲେ।
ଏହି ଶ୍ରମିକମାନେ କୋରାପୁଟ, ନବରଙ୍ଗପୁର, ମାଲକାନଗିରି, କଳାହାଣ୍ଡି, ସମ୍ବଲପୁର, ବରଗଡ଼, ଢେଙ୍କାନାଳ, ଅନୁଗୋଳ, ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତ୍ସିଂହପୁର, କଟକ, ଖୋର୍ଦ୍ଧା, ନୟାଗଡ଼, କନ୍ଧମାଳ, ଗଜପତି, ଗଞ୍ଜାମ ଆଦି ୨୧ ଜିଲାରେ କାମ କରୁଥିଲେ। ସେମାନଙ୍କୁ ବସ୍ ଯୋଗେ ଭୁବନେଶ୍ୱର ନୂତନ ଷ୍ଟେଶନକୁ ଅଣାଯିବା ପରେ ଖୋର୍ଦ୍ଧା ଜିଲା ପ୍ରଶାସନ ପକ୍ଷରୁ ସମସ୍ତ ଶ୍ରମିକଙ୍କ ଡାକ୍ତରୀ ପରୀକ୍ଷା ସହ ଆବଶ୍ୟକ ଷ୍ଟାମ୍ପିଂ କରାଯାଇଥିଲା। ସବୁ କ୍ଷେତ୍ରରେ ସାମାଜିକ ଦୂରତ୍ୱ ଉପରେ ଗୁରୁତ୍ୱ ଦିଆଯାଇଥିଲା। ଖୋର୍ଦ୍ଧା ଜିଲାପାଳ ସିତାଂଶୁ କୁମାର ରାଉତଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମସ୍ତ କାର୍ଯ୍ୟ କରାଯାଇଥିବାବେଳେ ବହୁ ପ୍ରଶାସନିକ ଅଧିକାରୀ ଉପସ୍ଥିତ ଥିଲେ। ଅନ୍ୟପକ୍ଷରେ ରବିବାର ଭୁବନେଶ୍ୱରରୁ ଛତିଶଗଡ଼ର ରାୟପୁର ଅଭିମୁଖେ ଏକ ଶ୍ରମିକ ସ୍ପେଶାଲ ଟ୍ରେନ୍ ଯାଇଥିବାବେଳେ ମଙ୍ଗଳବାର ପ୍ରାୟ ୧୨୦୦ ଶ୍ରମିକଙ୍କୁ ଧରି ଉତ୍ତରପ୍ରଦେଶ ଅଭିମୁଖେ ଆଉଏକ ଟ୍ରେନ୍ ଯାତ୍ରା କରିବ ବୋଲି ପୂର୍ବତଟ ରେଳପଥ ପକ୍ଷରୁ ସୂଚନା ଦିଆଯାଇଛି।
ଓଡ଼ିଶା ଆସିଲାଣି ୧୧୬ ଶ୍ରମିକ ସ୍ପେଶାଲ ଟ୍ରେନ୍
୨୪ ତାରିଖ ସୁଦ୍ଧା ବିଭିନ୍ନ ରାଜ୍ୟରୁ ଓଡ଼ିଶାକୁ ମୋଟ ୧୦୦ଟି ଶ୍ରମିକ ସ୍ବତନ୍ତ୍ର ଟ୍ରେନ୍ ଆସିଥିବାବେଳେ ସୋମବାର ମହାରାଷ୍ଟ୍ର, ତାମିଲନାଡ଼ୁ, ସୁରଟ, ତେଲଙ୍ଗାନାର ହାଇଦ୍ରାବାଦ, ବାଙ୍ଗାଲୋର ଓ ଆନ୍ଧ୍ରପ୍ରଦେଶ ଆଦି ସ୍ଥାନରୁ ମୋଟ ୧୬ଟି ଟ୍ରେନ୍ ଓଡ଼ିଶାରେ ପହଞ୍ଚତ୍ଥିଲା। ଏହି ଟ୍ରେନ୍ଗୁଡ଼ିକ ଭୁବନେଶ୍ୱର, ଗଞ୍ଜାମ, ବାରିପଦା, ଭଦ୍ରକ, ବାଲେଶ୍ୱର, ବ୍ରହ୍ମପୁର ଆଦି ଷ୍ଟେଶନରେ ଅଟକିବା ପରେ ସେଠାରୁ ଶ୍ରମିକମାନଙ୍କୁ କ୍ୱାରାଣ୍ଟାଇନ୍ ସେଣ୍ଟରକୁ ନିଆଯାଇଥିଲା। ସେହିଭଳି ମଙ୍ଗଳବାର ତାମିଲନାଡୁ, ବାଙ୍ଗାଲୋର, ସୁରଟ, ଗୋଆ, ଅହମ୍ମଦାବାଦ ଓ ରାଜକୋଟରୁ ମୋଟ ୯ଟି ଟ୍ରେନ୍ ବାରିପଦା, ବାଲେଶ୍ୱର, ଖୋର୍ଦ୍ଧାରୋଡ୍, ବ୍ରହ୍ମପୁର, କଟକ ଓ ବଲାଙ୍ଗୀର ଷ୍ଟେଶନରେ ଅଟକିବ ବୋଲି ପୂର୍ବତଟ ରେଳପଥ ପକ୍ଷରୁ ସୂଚନା ଦିଆଯାଇଛି।
