ବରଗଡ଼ ଅଫିସ୍,୮।୫: ଲକ୍ ଡାଉନ୍ କଟକଣା ଯୋଗୁ ପ୍ରବାସୀ ଶ୍ରମିକଙ୍କ ଦୁଃଖ ବଢ଼ି ଯାଇଛି । ସେମାନେ ଘରକୁ ଫେରିବାକୁ ଚାହୁଁଥିଲେ ମଧ୍ୟ ସେଥିରେ ବହୁ ହଟହଟାର ସମ୍ମୁଖୀନ ହେଉଛନ୍ତି। କିଏ ଚାଲି ଚାଲି ତ ଆଉ କେହି ସାଇକେଲ ଯୋଗେ ଫେରୁଥିବା ଦେଖିବାକୁ ମିଳୁଛି । ଶୁକ୍ରବାର ପିଲାଛୁଆଙ୍କ ସହିତ ୧୦ଜଣ ପ୍ରବାସୀ ଶ୍ରମିକ ଗାଇସିଲେଟ-ପଦ୍ମପୁର ରାସ୍ଥାରେ ଛତିଶଗଡ଼ ଅଭିମୁଖେ ଯାଉଥିଲେ । ସ୍ଥାନୀୟ ଲୋକେ ସେମାନଙ୍କୁ ଦେଖିବା ପରେ ବିଡ଼ିଓ ଏବଂ ତହସିଲଦାରଙ୍କୁ ଖବର ଦେଇଥିଲେ । ପରେ ବିଡ଼ିଓ ନିରଞ୍ଜନ ସା ଏବଂ ତହସିଲଦାର ପୁଷ୍ପକ ପ୍ରଧାନଙ୍କ ନିର୍ଦ୍ଦେଶକ୍ରମେ ତାଲପାଲି ସରପଞ୍ଚ ସୁଶାନ୍ତ ସାହୁ ସେମାନଙ୍କ ଖାଇବା ବ୍ୟବସ୍ଥା କରିଥିଲେ । ପରେ ପ୍ରଶାସନ ପକ୍ଷରୁ ସେମାନଙ୍କୁ ଏକ ଚାରିଚକିଆ ଗାଡ଼ିରେ ଛତିଶଗଡ଼ସ୍ଥିତ ସେମାନଙ୍କ ଘରେ ଛାଡ଼ିବାକୁ ନିଆଯାଇଥିଲା। ଏହି ଶ୍ରମିକମାନେ ସୋନପୁର ଜିଲାର ଏକ ଇଟାଭାଟିରେ କାମ କରୁଥିଲେ । ମାତ୍ର ଲକ୍ ଡାଉନ୍ ପରେ କାମଧନ୍ଦା ବନ୍ଦ ହୋଇଯିବାରୁ ସେମାନେ ଚାଲି ଚାଲି ଘରକୁ ଫେରୁଥିଲେ ।
