ଫୁଲବାଣୀ ଅଫିସ, ୨୮ା୩: କରୋନା ସଂକ୍ରମଣକୁ ପ୍ରତିହତ କରିବା ପାଇଁ କନ୍ଧମାଳ ଜିଲା ପ୍ରଶାସନ ପ୍ରୟାସ ଜାରି ରଖିଛି। ସାମାଜିକ ଦୂରତ୍ୱ ବଜାୟ ରଖିବା ପାଇଁ ପୋଲିସ ପ୍ରଶାସନ ମଧ୍ୟ ଜାଗ୍ରତ ଅଛି। ରାଜ୍ୟ ଏବଂ ଜିଲା ବାହାରୁ ଆସିଥିବା ଲୋକଙ୍କ ଉପରେ ନଜର ରଖାଯାଇଛି। ସୂଚନା ଅନୁସାରେ ଏ ପର୍ଯ୍ୟନ୍ତ ମୋଟ ୪,୭୭୭ ଜଣ ବାହାରୁ କନ୍ଧମାଳ ଜିଲାକୁ ଆସିଛନ୍ତି। ସେମାନଙ୍କ ମଧ୍ୟରୁ ୪,୭୭୩ ଜଣଙ୍କୁ ହୋମ କ୍ୱାରାଣ୍ଟାଇନ୍ରେ ରହିଥିବା ବେଳେ ଜିଲା ମୁଖ୍ୟ ଚିକିିତ୍ସାଳୟ ଆଇସୋଲେଶନରେ ୪ ଜଣ ଅଛନ୍ତି। ଜିଲାରେ ମୋଟ ୭ଟି ସ୍ଥାନରେ ଯଥା ବାଲିଗୁଡା ଟାଉନହଲ, କଲ୍ୟାଣ ମଣ୍ଡପ, ଜି.ଉଦୟଗିରି ଟାଉନହଲ ଓ କଲ୍ୟାଣ ମଣ୍ଡପ, ଫୁଲବାଣୀ ବସ୍ଷ୍ଟାଣ୍ଡ ଓ କଲ୍ୟାଣ ମଣ୍ଡପ, ପିଅନପଡା ପ୍ରାଥମିକ ବିଦ୍ୟାଳୟରେ ଅସ୍ଥାୟୀ ଆଇସୋଲେଶନ ସେଣ୍ଟର ଖୋଲାଯାଇଛି। ସେହିପରି କୋଟଗଡ ସରକାରୀ ଉଚ୍ଚ ବିଦ୍ୟାଳୟ, ଦାରିଙ୍ଗିବାଡି ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ, ସରକାରୀ ବାଳିକା ଉଚ୍ଚ ବିଦ୍ୟାଳୟ, ରାଇକିଆ ସରକାରୀ ବାଳିକା ଉଚ୍ଚ ବିଦ୍ୟାଳୟ, ବଡଗାଁ ସରକାରୀ ଉଚ୍ଚ ବିଦ୍ୟାଳୟ, ଶଙ୍କରାଖୋଲ ସରକାରୀ ବାଳିକା ଉଚ୍ଚ ବିଦ୍ୟାଳୟ ଓ ଫୁଲବାଣୀ ଅନ୍ବେଶା ହଷ୍ଟେଲ ଏପରି ମୋଟ ୭ ସ୍ଥାନରେ ଅସ୍ଥାୟୀ ଚିକିତ୍ସା ଶିବିର ହୋଇଛି। ଜିଲାର ୭ ପ୍ରବେଶ ପଥକୁ ସିଲ୍ କରାଯାଇଛି। ଅହୋରାତ୍ର ପୋଲିସ ପଇଁତରା ବ୍ୟବସ୍ଥା ହୋଇଛି। ଲକ୍ଡାଉନ ଅବମାନନା ପାଇଁ ୫୭ ଜଣଙ୍କୁ ଗିରଫ କରାଯାଇଥିବା ବେଳେ ୧୧ ଗାଡିକୁ ଅଟକ ରଖାଯାଇଛି।
