ନୂଆଦିଲ୍ଲୀ,୨୫।୫: କୋଭିଡ୍-୧୯ ଯୋଗୁ ଭାରତୀୟ ଫାର୍ମାସ୍ୟୁଟିକାଲ ଶିଳ୍ପ ପାଇଁ ନୂଆ ସୁଯୋଗ ସୃଷ୍ଟି ହୋଇଛି। ଏ କ୍ଷେତ୍ରରେ ପ୍ରାୟ ୭୦ ହଜାର କୋଟି ଟଙ୍କାର ନିବେଶ ସମ୍ଭାବନା ଉପୁଜିଛି। ଭାରତ ବର୍ତ୍ତମାନ ଫାର୍ମାସ୍ୟୁଟିକାଲ ଏବଂ ମେଡିକାଲ ଡିଭାଇସ ଶିଳ୍ପ ଉପରେ ଫୋକସ କରିଥିବା ଜଣାପଡିଛି। ଏହି କ୍ଷେତ୍ରରେ ବିଶେଷ ଯୋଗଦାନ ଦ୍ୱାରା ଭାରତ ଜାପାନ ସମେତ ଅନ୍ୟ ଦେଶରୁ ନିବେଶ ଆକୃଷ୍ଟ କରିବା ଲାଗି ଆଗଭର ହୋଇଛି। ନୂଆ ମାନୁଫାକ୍ଚରିଂ ଫାସିଲିଟି ସ୍ଥାପନ ହେଉ କିମ୍ବା ଯୌଥ ଉଦ୍ୟୋଗ ହେଉ ବିଭିନ୍ନ ପ୍ରସଙ୍ଗ ଉପରେ ଏବେ କାର୍ଯ୍ୟକ୍ରମ ଜାରି କରାଯାଉଥିବା ଶିଳ୍ପ ପ୍ରତିନିଧିମାନେ ମତବ୍ୟକ୍ତ କରିଛନ୍ତି। ଆଗାମୀ ୫ ବର୍ଷରେ ଭାରତରେ ଏଭଳି ନିବେଶ ହେବାର ବିଶେଷ ସୁଯୋଗ ରହିଛି।
ଜାପାନ ସମେତ ଅନ୍ୟ ଦେଶଗୁଡିକରୁ ୧୨୦୦ ଟେକ୍ନିକାଲ ସହଯୋଗିତା ହେବା ନେଇ ଅନୁମାନ କରାଯାଇଛି। ଏହି ବାବଦରେ ୪୨ ହଜାର କୋଟି ଟଙ୍କାର ନିବେଶ, ପ୍ରାୟ ୨୦୦ ଯୌଥ ଉଦ୍ୟୋଗରୁ ୧୪ ହଜାର କୋଟି ନିବେଶ ଏବଂ ବହୁ ଦେଶୀୟ କମ୍ପାନୀଗୁଡିକ ପକ୍ଷରୁ ୧୪ ହଜାର କୋଟି ଟଙ୍କାର ନିବେଶ ସମ୍ଭାବନା ରହିଥିବା ସୂଚନା ରହିଛି। ଟୋକିଓ ଦୂତାବାସ ସହ ଆଲୋଚନା କରାଯାଇଥିବା ଫାର୍ମାସ୍ୟୁଟିକାଲ ବିଭାଗ ସଚିବ ପି.ଡି.ବାଘେଲା ସୂଚନା ଦେଇଛନ୍ତି। ଜାପାନର କମ୍ପାନୀଗୁଡିକ ଭାରତରେ ନିବେଶ କଲେ ଏହା ରପ୍ତାନି ଦିଗରେ ସହାୟକ ହେବ ବୋଲି ଇଣ୍ଡିଆନ ଫାର୍ମାସ୍ୟୁଟିକାଲ ଆଲାଏନ୍ସର ମହାସଚିବ ସୁଦର୍ଶନ ଜୈନ କହିଛନ୍ତି।
