ବ୍ରହ୍ମପୁର ଅଫିସ୍, ୯ା୮-ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ବ୍ରହ୍ମପୁରରୁ ଛତ୍ରପୁରକୁ ସ୍ଥାନାନ୍ତର ପାଇଁ ରାଜ୍ୟ ସରକାର ଏବଂ ଜିଲାପାଳଙ୍କ ପ୍ରସ୍ତାବକୁ ନେଇ ବିବାଦ ବଢ଼ିବାରେ ଲାଗିଛି। ବ୍ରହ୍ମପୁରର ବିଭିନ୍ନ ସଂଗଠନ ପକ୍ଷରୁ ଏହାକୁ ତୀବ୍ର ବିରୋଧ କରାଯାଉଛି। ଅନ୍ୟପଟେ ଏହି ପ୍ରସଙ୍ଗରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛି ଗଞ୍ଜାମ ଜିଲା ମିଳିତ କ୍ରିୟାନୁଷ୍ଠାନ କମିଟି। ଜିଲାପାଳଙ୍କ ପ୍ରସ୍ତାବକୁ ଚ୍ୟାଲେଞ୍ଜ କରି ହାଇକୋର୍ଟରେ ଡବ୍ଲୁପିସି ନଂ-୧୩୮୨୦/୧୯ରେ ଏକ ମାମଲା ରୁଜୁ କରାଯାଇଛି। ସ୍ଥିତାବସ୍ଥା ଜାରି କରିବା ପାଇଁ ପ୍ରାର୍ଥନା କରାଯାଇଛି। ଏଥିସହ ଜିଲାପାଳଙ୍କ ଚିଠି ରଦ୍ଦ କରିବା, ଡିପିସି କାର୍ଯ୍ୟାଳୟକୁ ଛତ୍ରପୁରରୁ ବ୍ରହ୍ମପୁରକୁ ସ୍ଥାନାନ୍ତର ସହ ଡିଇଓଙ୍କ କାର୍ଯ୍ୟାଳୟରେ ମିଶ୍ରଣ କରିବାକୁ ଆବେଦନ କରାଯାଇଥିବା ଗୁରୁବାର ଜିଲା ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ଏକ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି। କମିଟି ସମ୍ପାଦକ ସୁରେନ୍ଦ୍ର ପାଣିଗ୍ରାହୀ, ରାଜେନ୍ଦ୍ର ପଣ୍ଡା, ସୂର୍ଯ୍ୟନାରାୟଣ ଦାସ, ବାସୁଦେବ ସାହୁକାର, ଜଗନ୍ନାଥ ପାଢୀ, ରମେଶ ଚନ୍ଦ୍ର ସାହୁ, ଅବନୀ କୁମାର ଗୟା, ଶ୍ୟାମ ସୁନ୍ଦର ଖାଡ଼ଙ୍ଗା, ଗୁରୁ ଚରଣ ପାତ୍ର, ରଜନୀକାନ୍ତ ମଣ୍ଡଳ, ଗିରିଜା ଶଙ୍କର ଶତପଥୀ, କିଶୋର ପାତ୍ର, ହୃଷୀକେଶ ପାତ୍ର ଓ ସଞ୍ଜୀବ କୁମାର ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ। ଖବରଦାତା ସମ୍ମିଳନୀରେ କୁହାଯାଇଥିଲା, ଜିଲାର ଗ୍ରାମାଞ୍ଚଳଗୁଡ଼ିକରୁ ବ୍ରହ୍ମପୁରକୁ ବସ୍ ଯୋଗାଯୋଗ ସୁବିଧା ୮୫ପ୍ରତିଶତ ରହିଛି। ଛତ୍ରପୁରକୁ ମାତ୍ର ୧୫ପ୍ରତିଶତ ଯୋଗାଯୋଗ ସୁବିଧା ଅଛି। ଏଣୁ ବ୍ରହ୍ମପୁରରେ ହିଁ ଡିଇଓଙ୍କ କାର୍ଯ୍ୟାଳୟ ରହିବା ଉଚିତ। ଉକ୍ତ କାର୍ଯ୍ୟାଳୟ ଛତ୍ରପୁରକୁ ସ୍ଥାନାନ୍ତର ପାଇଁ ଜିଲାପାଳ ନିଜେ ସରକାରଙ୍କୁ ପ୍ରସ୍ତାବ ଦେଇଛନ୍ତି। ଏହାକୁ ବ୍ରହ୍ମପୁରର ବିଭିନ୍ନ ସଂଗଠନ ବିରୋଧ କରିଥିଲା। ଏଣୁ ଜିଲା ପ୍ରଶାସନର ବରିଷ୍ଠ ଅଧିକାରୀମାନେ ଛତ୍ରପୁରର କେତେକ ସଂଗଠନର କର୍ମକର୍ତ୍ତାଙ୍କୁ ପ୍ରବର୍ତ୍ତାଉଛନ୍ତି। ବ୍ରହ୍ମପୁରରୁ ଛତ୍ରପୁରକୁ କାର୍ଯ୍ୟାଳୟ ସ୍ଥାନାନ୍ତର ପାଇଁ ଦାବି କରିବାକୁ କୁହାଯାଉଛି। ପ୍ରଶାସନ ବର୍ତ୍ତମାନ ଜିଲାକୁ ଦୁଇଭାଗରେ ବିଭକ୍ତ କରିବାକୁ ଚେଷ୍ଟା କରୁଛିି। ଯଦି ୨୪ଘଣ୍ଟା ମଧ୍ୟରେ ଜିଲାପାଳ ନିଜ ପ୍ରସ୍ତାବକୁ ପ୍ରତ୍ୟାହାର ନ କରନ୍ତି, ତେବେ ଜିଲାପାଳ ଏବଂ ଜିଲା ଶିକ୍ଷା ଅଧିକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଆଶ୍ରୟ ନିଆଯିବ ବୋଲି ଖବରଦାତା ସମ୍ମିଳନୀରେ ଚେତାବନୀ ଦିଆଯାଇଛି।
