ରାଜ୍ୟ ସରକାର ହକି ଖେଳାଳିମାନଙ୍କୁ ପ୍ରୋତ୍ସାହନ ଦେବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି। ଗ୍ରାମାଞ୍ଚଳରେ ମିନି ଷ୍ଟାଡିୟମ ଓ ଖେଳ ପଡିଆ ଉନ୍ନତୀକରଣ କରାଯାଉଛି। ଏହି ପରିପ୍ରେକ୍ଷୀରେ ସମ୍ବଲପୁର ଜିଲାରେ ଏକ ମିନି ଷ୍ଟାଡିୟମ ନିର୍ମାଣ କରାଯାଇ ସେଠାରେ ହକି ଟର୍ଫ ପକାଇବାକୁ ସ୍ଥିର କରାଯାଇଥିଲା। ଯାହା ଜିଲାରେ ହକି ଖେଳାଳିଙ୍କ ପାଇଁ ଖୁସିର ଖବର ଥିଲା। ଜିଲାର ଅଧିକାଂଶ ହକି ଖେଳାଳି ଯୁଯୁମୁରା ବ୍ଲକରୁ ଆସିଛନ୍ତି। ସେଠାରେ ପଡିଆ ଓ ଗମନାଗମନ ସୁବିଧା ରହିଛି। ଆବଶ୍ୟକ ପଡିଲେ ଆଗାମୀ ଦିନରେ ସେଠାରେ ଟୁର୍ନାମେଣ୍ଟର ଆୟୋଜନ କରିହେବ। ସେଥିପାଇଁ ଯୁଯୁମୁରା ହାଇସ୍କୁଲ ପଡିଆରେ ଏକ ମିନିଷ୍ଟାଡିୟମ ନିର୍ମାଣ କରି ଟର୍ଫ ପକାଇବାକୁ ପ୍ରକ୍ରିୟା ଆରମ୍ଭ ହୋଇଥିଲା। ତତ୍କାଳୀନ ଜିଲାପାଳ ସମର୍ଥ ବର୍ମା ଓ ସରକାରୀ ଦଳ ଉପମୁଖ୍ୟ ସଚେତକ ତଥା ରେଢ଼ାଖୋଲ ବିଧାୟକ ଇଂ. ରୋହିତ ପୂଜାରୀ ଏଥିପାଇଁ ଉଦ୍ୟମ କରିଥିଲେ। ୨୦୧୮ରେ ହକି ବିଶ୍ୱ କପ୍ ରାଜ୍ୟରେ ଆୟୋଜନ କରାଯାଇଥିଲା। ସେତେବେଳେ ଭୁବନେଶ୍ୱର କଳିଙ୍ଗ ଷ୍ଟାଡିୟମରୁ ଗୋଟିଏ ହକି ଟର୍ଫ ସମ୍ବଲପୁର ଜିଲାକୁ ଅଣାଯାଇଥିଲା। ହେଲେ ପ୍ରାୟ ୧ ବର୍ଷ ହେଲା ଯୁଯୁମୁରା ବ୍ଲକ କାର୍ଯ୍ୟାଳୟ ପରିସରରେ ତାହା ପଡିରହିଛି। ଖରା,ବର୍ଷାରେ ଏହି ଟର୍ଫ ନଷ୍ଟ ହେବାକୁ ବସିଲାଣି। ଏଣେ ସ୍କୁଲ ପଡ଼ିଆରେ ମିନି ଷ୍ଟାଡିୟମ କାମ ଧୀମେଇ ଚାଲିଛି। ସରକାରଙ୍କ ପକ୍ଷରୁ ଏହି ଷ୍ଟାଡିୟମ ପାଇଁ ୪ କୋଟି ଟଙ୍କା ଅନୁଦାନ ମଞ୍ଜୁର ହୋଇଛି। ସେହି ଟଙ୍କାରେ ସ୍କୁଲ ପଡିଆରେ ମାଟି ପକାଯାଇ ସମତୁଲ କରାଯିବା ସହ ଚାରିପାଖରେ ପ୍ରାଚୀର ନିର୍ମାଣ ହେବ। ଗ୍ୟାଲେରି ନିର୍ମାଣ ସହିତ ଲାଇଟ ବ୍ୟବସ୍ଥା କରାଯିବା ପରେ ହକି ଟର୍ଫ ପକାଯିବ। ଜିଲା ପ୍ରଶାସନ ଏ ସଂକ୍ରାନ୍ତରେ ଗୁରୁତ୍ୱ ଦେବାକୁ କ୍ରୀଡାପ୍ରେମୀମାନେ ଦାବି କରିଛନ୍ତି। ସମ୍ବଲପୁର ଜିଲାରୁ ଅନେକ ହକି ଖେଳାଳି ଭଲ ପ୍ରଦର୍ଶନ କରିଛନ୍ତି। ନୂଆ ପ୍ରତିଭାଙ୍କୁ ସୁଯୋଗ ଦେବାକୁ ଏଠାରେ ମଧ୍ୟ ଏକ ଉନ୍ନତ ହକି ଷ୍ଟାଡିୟମ ନିର୍ମାଣ ଉପରେ ସମସ୍ତ ଗୁରୁତ୍ୱାରୋପ କରିଛନ୍ତି।
