ଭୁବନେଶ୍ୱର(ବ୍ୟୁରୋ), ୨୧ା୪: କୋଭିଡ୍-୧୯ର ମୁକାବିଲା ଲାଗି ସହଯୋଗର ହାତ ବଢ଼ାଇଛି ଭୁବନେଶ୍ୱରସ୍ଥିତ ସେଣ୍ଟ୍ରାଲ ଟୁଲ୍ ରୁମ୍ ଆଣ୍ଡ୍ ଟ୍ରେନିଂ ସେଣ୍ଟର (ସିଟିଟିସି)। କରୋନା ସଂକ୍ରମିତଙ୍କ ଚିକିତ୍ସାରେ ଭେଣ୍ଟିଲେଟରର ଆବଶ୍ୟକତା ସର୍ବାଧିକ ରହିଥିବାବେଳେ ଦେଶ ଓ ରାଜ୍ୟରେ ଏହାର ଅଭାବ ଦେଖାଦେଇଛି। ଏହି ସମସ୍ୟା ଦୂର ପାଇଁ ସିଟିଟିସି ଭୁବନେଶ୍ୱର ପକ୍ଷରୁ ଏକ ଭିନ୍ନ ଧରଣର ଆମ୍ବୁବ୍ୟାଗ୍ ଭେଣ୍ଟିଲେଟର ବିକଶିତ କରାଯାଇଛି। ଏହି ଭେଣ୍ଟିଲେଟର ୧/୧ – ୧/୪ ଆଇ/ଇ ରେସିଓ ଏବଂ ୨୦୦ରୁ ୮୦୦ ମିଲିଲିଟର ଟାଇଡାଲ ଭଲ୍ୟୁମରେ ୮ରୁ ୪୦ ରେସ୍ପିରେଟୋରି ରେଟ୍ କ୍ଷମତାସମ୍ପନ୍ନ ବୋଲି କୁହାଯାଇଛି। ଏମ୍ଆଇଟି ଇ- ଭେଣ୍ଟ୍ ଓପନସୋର୍ସଠାରୁ ପ୍ରେରିତ ହୋଇ ଏହି ଭେଣ୍ଟିଲେଟର ନିର୍ମାଣ କରାଯାଇଥିଲେ ମଧ୍ୟ ଏହାକୁ ସ୍ବଳ୍ପ ମୂଲ୍ୟଯୁକ୍ତ କରିବାକୁ ଏଥିରେ ପାରମ୍ପରିକ ଉପକରଣ ଖଞ୍ଜାଯାଇଛି। ସିଟିଟିସିର ଏକ ସ୍ବତନ୍ତ୍ର ଟିମ୍ ସହ ଉଡିଏଟ୍ ଟେକ୍ନୋଲୋଜି ଷ୍ଟାର୍ଟଅପ୍ ମିଳିତଭାବେ ଏହି ଭେଣ୍ଟିଲେଟର ପ୍ରସ୍ତୁତ କରିଛନ୍ତି। ଏହି ଭେଣ୍ଟିଲେଟର ଖୁବ୍ଶୀଘ୍ର ଉପଲବ୍ଧ ହେବା ସହ ବଜାର ଦାମ୍ ମାତ୍ର ୩୦ ହଜାର ଟଙ୍କା ରହିବ, ଯାହାକି ଅନ୍ୟ ଭେଣ୍ଟିଲେଟର ଦାମ୍ ତୁଳନାରେ ଅପେକ୍ଷାକୃତ କମ୍। ଏହାସହ ନିର୍ମାତା ଏହାର ମେଣ୍ଟେନାନ୍ସ ଗ୍ୟାରେଣ୍ଟି ମଧ୍ୟ ପ୍ରଦାନ କରିବେ। ଆଗାମୀ ଦିନରେ ଏହି ଭେଣ୍ଟିଲେଟରକୁ କିଭଳି ଅଧିକ ଉନ୍ନତ କରିହେବ ତାହା ଉପରେ ଟିମ୍ ଏବେ ଗୁରୁତ୍ୱ ଦେଉଥିବାବେଳେ ଏଥିରେ ମଲ୍ଟିପୁଲ୍ ବ୍ୟାଗ୍ ବ୍ୟବସ୍ଥା ରଖିବା ଉପରେ ଗବେଷଣା ଜାରି ରହିଛି। ଫଳରେ ଏକାସଙ୍ଗେ ଅଧିକ ରୋଗୀଙ୍କୁ ଏହି ଭେଣ୍ଟିଲେଟର ସେବା ଯୋଗାଇ ପାରିବ ବୋଲି ସିଟିଟିସି ପକ୍ଷରୁ କୁହାଯାଇଛି।
