ମେଲବୋର୍ନ,୨୯।୩(ପି.ଟି.)- ବିଶ୍ୱସ୍ତରୀୟ ସ୍ପିନ୍ ବୋଲିଂ ବିପକ୍ଷରେ ପୂର୍ବତନ ଅଷ୍ଟ୍ରେଲିଆ ଅଧିନାୟକ ଇଆନ ଚାପେଲ ତାଙ୍କ ଦୁଇଟି ସର୍ବକାଳୀନ ଶ୍ରେଷ୍ଠ ତଥା ଫେଭରାଇଟ୍ ଇନିଂସ ସମ୍ପର୍କରେ ଉଲ୍ଲେଖ କରିଛନ୍ତି। ଏଥିରେ ସେ ଭାରତୀୟ ମିଡିଲ ଅର୍ଡର ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ ୨୦୦୧ରେ ଇଡେନ ଗାର୍ଡେନରେ ଖେଳିଥିବା ୨୮୧ ରନର ଟେଷ୍ଟ ଇନିଂସକୁ ସାମିଲ କରିଛନ୍ତି। ଲକ୍ଷ୍ମଣଙ୍କ ସହ ରାହୁଲ ଡ୍ରାଭିଡ୍ ମଧ୍ୟ ଅଷ୍ଟ୍ରେଲିଆ ବିପକ୍ଷ ଏହି ଦ୍ୱିତୀୟ ଟେଷ୍ଟରେ ୧୮୦ ରନର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ଲକ୍ଷ୍ମଣ ଓ ଡ୍ରାଭିଡ ୩୭୬ ରନର ଭାଗୀଦାରି ସ୍ଥାପନ କରି ଅଷ୍ଟ୍ରେଲିଆକୁ ନିରାଶ କରି ଭାରତକୁ ବିଜୟୀ କରାଇଥିଲେ। ଏହି ବିଜୟ ସହ ଭାରତ ସିରିଜକୁ ପ୍ରତ୍ୟାବର୍ତ୍ତନ କରିଥିଲା। ଶେନ୍ ଓ୍ବାର୍ନ ଓ ଅନ୍ୟ ବିଶ୍ୱସ୍ତରୀୟ ସ୍ପିନରଙ୍କ ବିପକ୍ଷରେ ଲକ୍ଷ୍ମଣ ଦୃଷ୍ଟାନ୍ତମୂଳକ ବ୍ୟାଟିଂ ପ୍ରଦର୍ଶନ କରିଥିଲେ ବୋଲି ଚାପେଲ କହିଛନ୍ତି। ଲକ୍ଷ୍ମଣ ୪୫୨ଟି ବଲ୍ ଖେଳିଥିଲେ ଓ ୪୪ଟି ବାଉଣ୍ଡାରୀ ମାରିଥିଲେ। ଏହି ଐତିହାସିକ ଇନିଂସରେ ଲକ୍ଷ୍ମଣ ନିୟମିତ ଭାବେ ବଲ୍କୁ ପ୍ରହାର କରୁଥଲେ। ଲକ୍ଷ୍ମଣଙ୍କ ସ୍ବାଭବ ମଧ୍ୟ ଅନୁରୂପ ଭାବେ ପ୍ରଶଂନୀୟ ବୋଲି ସେ କହିଛନ୍ତି।
ସ୍ପିନ୍ ବୋଲିଂକୁ ବେଶ୍ ଭଲ ଭାବେ ଖେଳୁଥିବା ନିଜ ସାଥି ବ୍ୟାଟ୍ସମ୍ୟାନ ଡଗ୍ ଓ୍ବାଲ୍ଟର୍ସକୁ ମଧ୍ୟ ସେ ପ୍ରଶଂସା କରିଛନ୍ତି। ସ୍ପିନ୍ ବିପକ୍ଷରେ ଓ୍ବାଲ୍ଟର୍ସ ଜଣେ ଶ୍ରେଷ୍ଠ ବ୍ୟାଟ୍ସମ୍ୟାନ ବୋଲି ଚାପେଲ କହିଛନ୍ତି। ଗୋଟିଏ ସେସନରେ ୩ଥର ଓ୍ବାଲ୍ଟର୍ସ ଗୋଟିଏ ଲେଖାଏ ଟେଷ୍ଟ ଶତକ ହାସଲ କରିଛନ୍ତି। ୧୯୯୬ରେ ମାଡ୍ରାସର ମାଇନ୍ଫିଲ୍ଡରେ ଭାରତ ବିପକ୍ଷରେ ଓ୍ବାଲ୍ଟର୍ସ ଏକ ଲଢୁଆ ଶତକ ଅର୍ଜନ କରିଥିଲେ। ସ୍ପିନ୍ କିମ୍ବଦନ୍ତୀ ଏରାପଲ୍ଲୀ ପ୍ରସନ୍ନାଙ୍କ ସ୍ପିନ୍ ବୋଲିଂକୁ ସେ ସଫଳତାର ସହ ମୁକାବିଲା କରିଥିଲେ। ଏହି ଇନିଂସରେ ସେ ୧୪ଟି ଚୌକା ଓ ୨ ଛକା ମାରିଥିଲେ। ସ୍ପିନ୍ ବିପକ୍ଷରେ ଏହା ଅନ୍ୟତମ ଶ୍ରେଷ୍ଠ ଇନିଂସ ବୋଲି ଚାପେଲ କହିଛନ୍ତି।
ସାରା ବିଶ୍ୱରେ କୋଭିଡ-୧୯ ସଂକ୍ରମଣ ନେଇ ଆତଙ୍କ ଦେଖାଦେଇଥିବା ବେଳେ କ୍ରିକେଟ ମ୍ୟାଚ୍ ଆୟୋଜନ ପୂରା ବନ୍ଦ ହୋଇଛି। ଫଳରେ ସ୍ପିନ୍ ବିପକ୍ଷରେ ଶ୍ରେଷ୍ଠ ଇନିଂସ ଚୟନ କରିବା ନେଇ ମୋତେ ସମୟ ତଥା ସୁଯୋଗ ମିଳିଛି। ଟପ୍ କ୍ଲାସ୍ ସ୍ପିନ୍ ବୋଲିଂ ବିପକ୍ଷରେ ଲକ୍ଷ୍ମଣ ଓ ଓ୍ବାଲ୍ଟର୍ସଙ୍କ ମଧ୍ୟରେ ସାମଞ୍ଜସ୍ୟ ରହିଛି ବୋଲି ଚାପେଲ ଇଏସ୍କ୍ରିକ୍ଇନଫୋ ସ୍ତମ୍ବରେ ଉଲ୍ଲେଖ କରିଛନ୍ତି।
