ପୁରୀ ଅଫିସ,୪।୬: ଶୁକ୍ରବାର ଦେବସ୍ନାନ ପୂର୍ଣ୍ଣିମା। ଏଥର ବିନା ଭକ୍ତରେ ସ୍ନାନଯାତ୍ରା ହେବା ନେଇ ଯଦିଓ ନିଷ୍ପତ୍ତି ହୋଇଛି, ତଥାପି ପୋଲିସ ପକ୍ଷରୁ ଶାନ୍ତିଶୃଙ୍ଖଳା ରକ୍ଷା ଲାଗି ସ୍ବତନ୍ତ୍ର ବ୍ୟବସ୍ଥା କରାଯାଇଛି। ସ୍ନାନ ଯାତ୍ରା ପାଇଁ ମୋଟ ୩୮ ପ୍ଲାଟୁନ୍ ଫୋର୍ସ ମୁତୟନ ହେବେ ବୋଲି ଗୁରୁବାର ପୋଲିସ ରିଜର୍ଭ ଅଫିସରେ ଆୟୋଜିତ ଖବରଦାତା ସମ୍ମିଳନୀରେ ଡିଆଇଜି ଆଶିଷ ସିଂହ ଏହି ସୂଚନା ଦେଇଛନ୍ତି। ସ୍ନାନଯାତ୍ରା ଲାଗି ୨ କମାଣ୍ଡାଣ୍ଟ, ୬ଜଣ ଏଏସ୍ପି, ୧୬ ଡିଏସ୍ପି, ୪୪ଜଣ ଇନ୍ସପେକ୍ଟର ଦାୟିତ୍ୱରେ ରହିବେ। ପୋଲିସ କର୍ମଚାରୀମାନେ ୨୪ ଘଣ୍ଟିଆ ଡ୍ୟୁଟି କରିବେ। ନିରବିଚ୍ଛିନ୍ନ ଡ୍ୟୁଟି କାର୍ଯ୍ୟ ଥିବାରୁ ସେମାନଙ୍କ ୪ଟା ସିଫ୍ଟ କରାଯାଇଛି। ଏହାଛଡ଼ା ୧୪୪ ଧାରାକୁ କଡ଼ାକଡ଼ି ପାଳନ କରାଯିବ ତାହା ଉପରେ ଗୁରୁତ୍ୱ ଦିଆଯିବ। ଏଥିପାଇଁ ସିସିଟିଭି ଲାଗିଥିବା ବେଳେ ୨୦ କ୍ୟାମେରାରେ ଭିଡିଓଗ୍ରାଫି କରାଯିବ ବୋଲି ସେ କହିଛନ୍ତି। ତେବେ ଗୁରୁବାର ରାତି ୧୦ଟାରୁ ଶନିବାର ଭୋର ୨ଟା ପର୍ଯ୍ୟନ୍ତ ଶ୍ରୀମନ୍ଦିର ଚତୁଃପାର୍ଶ୍ୱ ଅଞ୍ଚଳରେ ୧୪୪ ଧାରା ରହିବ।
