ଭୁବନେଶ୍ୱର/ବାଲେଶ୍ୱର ଅଫିସ,୧୨।୯ (ବ୍ୟୁରୋ): ବାଲେଶ୍ୱର ସହର ମଠସାହି ମହାବୀର ନୋଡାଲ ସ୍କୁଲରେ ପ୍ରଥମ ଶ୍ରେଣୀ ଛାତ୍ରଙ୍କୁ ତାଲା ପକାଇ ପଳାଇବା ଘଟଣାରେ ସ୍କୁଲ ଓ ଗଣଶିକ୍ଷା ବିଭାଗ ତଦନ୍ତ ନିର୍ଦ୍ଦେଶ ଦେଇଛନ୍ତି। ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଡିଇଓଙ୍କୁ ନିର୍ଦ୍ଦେଶ ଦିଆଯାଇଛି। ଏହାପରେ ଏକ ଟିମ୍ ସ୍କୁଲରେ ପହଞ୍ଚି ପଚରାଉଚରା କରିଥିବା ଜଣାପଡ଼ିଛି। ତେବେ ରିପୋର୍ଟ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଇଓ କହିଛନ୍ତି।
ପ୍ରକାଶଯୋଗ୍ୟ, ବୁଧବାର ସ୍କୁଲ ଛୁଟି ହେବାର କିଛି ସମୟ ପୂର୍ବରୁ ଛାତ୍ରଜଣଙ୍କ ପାଇଖାନା ଯାଇଥିଲେ। ସେ ପାଇଖାନାରେ ଥିବା ବେଳେ ସ୍କୁଲ ଛୁଟି ହୋଇଯାଇଥିଲା। କ୍ଲାସରୁମ୍ରେ ତାଙ୍କ ବ୍ୟାଗ୍ ଥିଲେ ହେଁ ପିଅନ ତାହା ନ ଦେଖି ତାଲା ପକାଇ ଦେଇଥିଲେ। ଏପରିକି ସ୍କୁଲ ଗେଟ୍ରେ ମଧ୍ୟ ତାଲା ପକାଇ ଶିକ୍ଷକ ଓ ପିଅନ ପଳାଇଥିଲେ। ପାଇଖାନାରୁ ବାହାରିବା ପରେ ଗେଟ୍ରେ ତାଲା ପଡ଼ିଥିବା ଦେଖି ପିଲାଟି କାନ୍ଦିଥିଲା। ଏହା ଶୁଣି ଗାଁ ଲୋକେ ପିଅନକୁ ଡାକିଥିଲେ। ଶେଷରେ ପିଅନ ଯାଇ ତାଲା ଖୋଲି ପିଲାଟିକୁ ବାହାର କରିଥିଲେ। ଏନେଇ ପଚରାଯିବାରେ ପ୍ରଧାନଶିକ୍ଷୟିତ୍ରୀ କହିଛନ୍ତି, ପ୍ରତିଦିନ ୨ ଜଣ ପିଲାଙ୍କୁ ତାଲା ପକାଇ ରଖାଯାଏ। ଅଭିଭାବକ ନ ଆସିଥିଲେ, ପିଲାମାନଙ୍କୁ ଏମିତି ରଖୁ। କାଲି ମଧ୍ୟ ଜାଣିଶୁଣି ଆମେ ପିଲାକୁ ସ୍କୁଲରେ ରଖିଥିଲୁ। ବାହାରେ ତାଲା ପକାଇ ପିଲାକୁ ଜଗିଥିଲୁ ବୋଲି ସେ ପ୍ରତିକ୍ରିୟା ଦେଇ ଦେଇଛନ୍ତି।
