ଶ୍ରୀଗଙ୍ଗାନଗର,୯।୧୨: ସୋସିଆଲ୍ ମିଡ଼ିଆ ଯୋଗୁ ଦୀର୍ଘ ୭୨ ବର୍ଷ ଧରି ପରସ୍ପରଠାରୁ ଅଲଗା ରହିଥିବା ଭଉଣୀ-ଭାଇ ପୁଣି ଏକାଠି ହୋଇଛନ୍ତି। ତେବେ ଏବେ ଭାଇ ରାଜସ୍ଥାନର ଶ୍ରୀଗଙ୍ଗାନଗରରେ ବାସ କରୁଥିବା ବେଳେ ଭଉଣୀ ପାକିସ୍ତାନ ଅଧିକୃତ କଶ୍ମୀର(ପିଓକେ)ରେ ବାସ କରୁଛନ୍ତି। ଭାଇ ରଣଜୀତ୍ ସିଂ ଭଉଣୀଙ୍କୁ ପାଇ ବେଶ୍ ଖୁସି। ମାତ୍ର ଭଉଣୀଙ୍କ ନାମ ପୂର୍ବରୁ ଭଜ୍ଜୋ ଥିବାବେଳେ ଏବେ ତାଙ୍କର ନାମ ଶକିନା ହୋଇଯାଇଛି। ଦୁହେଁ ରବିବାର ଭିଡ଼ିଓ କଲିଂରେ କଥାବାର୍ତ୍ତା ହୋଇଛନ୍ତି। ୧୯୪୭ରେ କଶ୍ମୀରରେ କବାୟଲୀମାନେ ଆକ୍ରମଣ କରିଥିଲେ। ସେତେବେଳେ କଶ୍ମୀରର ଦଦୁରବୈନା ଗାଁରେ ଲମ୍ବଦାର ମତଓ୍ବାଲ ସିଂଙ୍କ ପରିବାର ବାସ କରୁଥିଲେ। ଆକ୍ରମଣ ସମୟରେ ଲମ୍ବଦାରଙ୍କ ପୁଅ ରଣଜୀତ୍ ସିଂଙ୍କ ହାତରୁ ଖସି ୪ ବର୍ଷର ଭଉଣୀ ଭଜ୍ଜୋ କେଉଁଆଡ଼େ ଚାଲି ଯାଇଥିଲେ। ବହୁ ଖୋଜାଖୋଜି ପରେ ମଧ୍ୟ ଭଜ୍ଜୋଙ୍କର ପତ୍ତା ମିଳି ନ ଥିଲା। ରଣଜିତ୍ ସିଂ ଭଉଣୀଙ୍କୁ ଖୋଜିବା ଜାରି ରଖିଥିଲେ। ଇତିମଧ୍ୟରେ ତାଙ୍କର ଦେଖା ଆଇନଜୀବୀ ହରପାଲ ସିଂ ସୁଦନ୍ଙ୍କ ସହିତ ସାକ୍ଷାତ୍ ହୋଇଥିଲା। ସେ ପିଓକେରେ ବାସ କରୁଥିବା ଜୁବେରଙ୍କ ସହିତ ଯୋଗାଯୋଗ କରିଥିଲେ। ଏହା ସହିତ କଶ୍ମୀରରେ ବାସ କରୁଥିବା ରାନୀ ଶର୍ମା ନାମକ ଯୁବତୀ ମଧ୍ୟ ଭଉଣୀ-ଭାଇଙ୍କୁ ଏକାଠି କରିବା ଲାଗି ଯୋଗାଯୋଗ କରିଥିଲେ। ଏନେଇ ସୋସିଆଲ୍ ମିଡ଼ିଆ ହ୍ବାଟସଆପ୍ରେ ଏକ ଗ୍ରୁପ୍ ଗଠନ କରାଯାଇଥିଲା। ଏବେ ଭଉଣୀ-ଭାଇ କରତାରପୁରରେ ପରସ୍ପରକୁ ଦେଖା କରିବା ପାଇଁ ଯୋଜନା କରିଛନ୍ତି।
