ନୂଆଦିଲ୍ଲୀ,୨୮-୭: କେନ୍ଦ୍ର ସରକାର ସୋମବାରଠାରୁ ସାରାଦେଶରେ ୭ମ ଅର୍ଥନୈତିକ ଜନଗଣନା ଆରମ୍ଭ କରିବେ। ଉତ୍ତର-ପୂର୍ବ ରାଜ୍ୟ ତ୍ରିପୁରାରୁ ଏହି ଜନଗଣନା କାର୍ଯ୍ୟ ଆରମ୍ଭ ହେବ। ଦେଶରେ କେତେ ସଂଖ୍ୟାରେ ବ୍ୟବସାୟିକ ପ୍ରତିଷ୍ଠାନ ରହିଛି, କିଏ କେଉଁପ୍ରକାର ବ୍ୟବସାୟ କରୁଛନ୍ତି ଆଦି ସମ୍ପର୍କରେ ତଥ୍ୟ ସଂଗ୍ରହ କରାଯିବ। ଦୀର୍ଘ ୫ ବର୍ଷ ପରେ ପରିସଂଖ୍ୟାନ ଏବଂ ଯୋଜନା କ୍ର୍ରିୟାନ୍ବୟନ ମନ୍ତ୍ରଣାଳୟ ପକ୍ଷରୁ ଏହି ଗଣନା କରାଯିବ। ଏଥିପାଇଁ ମନ୍ତ୍ରଣାଳୟ ସିଏସ୍ସି ଇ-ଗଭର୍ନାନ୍ସ ସର୍ଭିସେସ୍ ଇଣ୍ଡିଆ ଲିମିଟେଡକୁ ପାର୍ଟନର କରିଛି। ତ୍ରିପୁରା ଏକ ଛୋଟ ରାଜ୍ୟ ହୋଇଥିବାରୁ ସେଠାରୁ ଅର୍ଥନୈତିକ ଜନଗଣନା ଆରମ୍ଭ କରିବାକୁ ସିଏସ୍ସି ସମ୍ପୂର୍ଣ୍ଣ ଭାବେ ପ୍ରସ୍ତୁତ ଥିବା ଜଣେ ଅଧିକାରୀ କହିଛନ୍ତି। ତ୍ରିପୁରା ପରେ ପୁଡୁଚେରୀ ପାଳି ପଡିବ। ଘରକୁ ଘର ବୁଲି ସର୍ଭେ କରାଯିବା ସହିତ ତଥ୍ୟ ସଂଗ୍ରହ କରାଯିବ। କଲେକ୍ସନ ଅଫ୍ ଷ୍ଟାଟିଷ୍ଟିକ୍ସ ଆଇନ, ୨୦୦୮ ଅଧୀନରେ କେତେ ବାଣିଜ୍ୟ ପ୍ରତିଷ୍ଠାନ ରହିଛି, ତାହାର ତଥ୍ୟ ନିଆଯିବ। ଡିସେମ୍ବର ସୁଦ୍ଧା ସର୍ଭେ କାର୍ଯ୍ୟକୁ ଶେଷ କରାଯିବ ଏବଂ ଜାତୀୟ ସ୍ତରରେ ସର୍ଭେର ଫଳାଫଳ ୨୦୨୦ ମାର୍ଚ୍ଚ ସୁଦ୍ଧା ପ୍ରକାଶ କରାଯିବ ବୋଲି ସେ କହିଛନ୍ତି। ପ୍ରାୟ ୧୦ ଲକ୍ଷ ଲୋକଙ୍କୁ ଫିଲ୍ଡ ସର୍ଭେ କାର୍ଯ୍ୟରେ ନିୟୋଜିତ କରାଯିବ ବୋଲି ମନ୍ତ୍ରଣାଳୟ ପକ୍ଷରୁ ଏକ ବିବୃତି ଜାରି କରି କୁହାଯାଇଛି। ସୂଚନାଯୋଗ୍ୟ ଯେ, ୨୦୧୩ରେ ଶେଷ ଥର ପାଇଁ କରାଯାଇଥିବା ଅର୍ଥନୈତିକ ସର୍ଭେ ରିପୋର୍ଟ ଅନୁଯାୟୀ ଦେଶରେ ୫୮.୫ ମିଲିୟନ ବ୍ୟବସାୟିକ ପ୍ରତିଷ୍ଠାନ ଥିବା ବେଳେ ଏଥିରେ ୧୩୧ ମିଲିୟନ କର୍ମଚାରୀ କାର୍ଯ୍ୟ କରୁଥିଲେ।
