ଗୋପାଳପୁର,୬।୪: ଗଞ୍ଜାମ ଜିଲା ରଙ୍ଗେଇଲୁଣ୍ଡା ବ୍ଲକ ଗୋଳାବନ୍ଧସ୍ଥିତ ଆର୍ମି ଏଡି କଲେଜରେ ସୈନ୍ୟବାହିନୀରେ ଚାକିରି ପାଇଁ ଜାଲିଆତି କରିବା ଅଭିଯୋଗରେ ଗୋପାଳପୁର ଥାନା ପୋଲିସ ସୋମବାର ୭ ଯୁବକଙ୍କୁ କୋର୍ଟ ଚାଲାଣ କରିଛି। ସେମାନେ ହେଲେ ନରେନ୍ଦ୍ରପୁରର କେ.ଭିମରାଜୁ ରେଡ୍ଡୀ, ହୁମୁରିର କାହ୍ନୁ ଚରଣ ସାହୁ, ବାସନାପୁଟିର ଆର.ଲକ୍ଷ୍ମୀ ନାରାୟଣ ରେଡ୍ଡୀ, ହାତିପାଦୁର ରଙ୍ଗଲା ପ୍ରକାଶ, ନୂଆଗୋଳାବନ୍ଧର ସୁରକାଲା କଲ୍ୟାଣ କୁମାର, ବିକ୍ରମପୁରର ଏସ.ଧର୍ମରାଜୁ ଓ ଆର.ରଘୁନାଥ ରେଡ୍ଡୀ।
ପ୍ରକାଶ ଯେ, ଗତ ୨୫ ତାରିଖରୁ ଆର୍ମି ଏଡି କଲେଜ ସୈନ୍ୟବାହିନୀରେ ଭର୍ତ୍ତି ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିଲା। ଉକ୍ତ ୭ ଅଭିଯୁକ୍ତ ୧୦ମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ। କିନ୍ତୁ ସେମାନଙ୍କ ବୟସ ଅଧିକ ହୋଇଯାଇଥିବାରୁ ବ୍ରହ୍ମପୁରର ଦୁଇଟି ଘରୋଇ ଶିକ୍ଷାନୁଷ୍ଠାନରେ ବୟସ କମ୍ କରି ନାମ ଲେଖାଇଥିଲେ। ନ୍ୟାଶନାଲ ଇନଷ୍ଟିଚ୍ୟୁଟ୍ ଓପନ ସ୍କୁଲ ବୋର୍ଡ ଅନୁଯାୟୀ, ଆନ୍ଧ୍ରପ୍ରଦେଶରେ ୧୦ମ ଶ୍ରେଣୀ ପରୀକ୍ଷା ଦେଇ ଅଧିକ ମାର୍କ ରଖି ଉତ୍ତୀର୍ଣ୍ଣ ହୋଇଥିଲେ। ଗତ ୩ ତାରିଖରେ ଜିଡି ପଦବୀ ପାଇଁ ଅଭିଯୁକ୍ତମାନେ ଇଣ୍ଟରଭ୍ୟୁ ଦେଉଥିବା ବେଳେ ମିଲିଟାରୀ ଗୋଇନ୍ଦା ଅଧିକାରୀ ସନ୍ଦେହରେ ସେମାନଙ୍କୁ ଧରି ପୋଲିସ ଜିମା ଦେଇଥିଲେ। ତଦନ୍ତ ପରେ ଅଭିଯୁକ୍ତମାନେ ଜାଲ ସାର୍ଟିଫିକେଟ ହାତେଇଥିବା ଜଣାପଡ଼ିଥିଲା। ଥାନା ନଂ. ୬୦/୨୧ରେ ମାମଲା ରୁଜୁ କରି ପୋଲିସ ତଦନ୍ତ ଚଳାଇଥିଲା।
