ମୁମ୍ବାଇ: ବରୁଣ ଧାଓ୍ବନ ଏବଂ ସାରା ଅଲି ଖାନ୍ଙ୍କ ଅପ୍କମିଂ ଫିଲ୍ମ ‘କୁଲି ନଂ-୧’ର ଶୁଟିଂ ଶେଷ ହୋଇଯାଇଛି। ଏହାପରେ ଏକଦମ୍ ସେଲିବ୍ରେଶନ ମୁଡ୍ରେ ଅଛନ୍ତି ଫିଲ୍ମର ପୂରା ଟିମ୍। ନିଶ୍ଚିତ ଭାବେ ଏକ ହିଟ୍ କମେଡି ଫିଲ୍ମର ରିମେକ୍ କରିବା ଏକ ବଡ଼ ଚ୍ୟାଲେଞ୍ଜ। ଏବେ ଫିଲ୍ମର ଶୁଟିଂ ସରିବା ପରେ ବରୁଣ ଖୁବ୍ ଖୁସି ଜଣାପଡ଼ୁଛନ୍ତି। ଏହାସହ ନିଜର ଟିକିନିିଖି ଅପଡେଟ୍ ସୋସିଆଲ ମିଡିଆରେ ଶେୟାର କରି ଫ୍ୟାନ୍ମାନଙ୍କ ସହ ଯୋଡ଼ିହୋଇ ରହିଛନ୍ତି। ଏହାରି ଭିତରେ ନିଜର ଆଇକନିକ୍ ଫିଲ୍ମର ରିମେକ୍ ପାଇଁ ଗୋବିନ୍ଦା ମଧ୍ୟ ବରୁଣ, ସାରା ଏବଂ ଫିଲ୍ମର ପୂରା ଟିମ୍କୁ ଶୁଭକାମନା ଜଣାଇଛନ୍ତି। ୧୯୯୫ରେ ଗୋବିନ୍ଦାଙ୍କ କମେଡି ଫିଲ୍ମ ‘କୁଲି ନଂ-୧’ ରିଲିଜ୍ ହୋଇଥିଲା, ଯାହାକୁ ଦର୍ଶକେ ଖୁବ୍ ପସନ୍ଦ କରିଥିଲେ। ଡେଭିଡ୍ ଧାଓ୍ବନଙ୍କ ନିର୍ଦ୍ଦେଶିତ ଏହି ଫିଲ୍ମରେ କରିସ୍ମା କପୁର ଗୋବିନ୍ଦାଙ୍କ ଅପୋଜିଟ୍ରେ ଅଭିନୟ କରିଥିଲେ। ଏବେ ଏହାର ରିମେକ୍ରେ ବରୁଣ-ସାରାଙ୍କୁ ଦେଖିବାକୁ ମିଳିବ। ନିକଟରେ ଫିଲ୍ମର ଶୁଟିଂ ଶେଷ ହୋଇଥିବା ବେଳେ ବରୁଣ ନିଜ ସୋସିଆଲ ମିଡିଆ ହ୍ୟାଣ୍ଡେଲ୍ରେ ଏନେଇ ଫ୍ୟାନ୍ମାନଙ୍କୁ ଅପ୍ଡେଟ୍ ଦେଇଛନ୍ତି। ବରୁଣ ଗୋଆରୁ ନିଜ ଅଫିିସିଆଲ୍ ଇନ୍ଷ୍ଟାଗ୍ରାମ ହ୍ୟାଣ୍ଡେଲ୍ରେ ଏକ ଶାର୍ଟ-ଲେସ୍ ଫଟୋ ଶେୟାର କରିଛନ୍ତି, ଯାହା ଏବେ ଭାଇରାଲ ହେଉଛି। ଫଟୋ ଶେୟାର କରି ସେ ଲେଖିଛନ୍ତି, “ପ୍ୟାନ୍କେକ୍, ଶୁକ୍ରବାର ଏକ ନଂ ବ୍ରେକ୍ଫାଷ୍ଟ। ଏବେ ଏବେ ଫିଲ୍ମ ‘କୁଲି ନଂ-୧’ର ଶୁଟିଂ ଶେଷ ହେଲା। ବର୍ତ୍ତମାନ ସୁଦ୍ଧା ଏହା ହେଉଛି ମୋ ଜୀବନର ସବୁଠାରୁ ମଜାଳିଆ ଫିଲ୍ମ। ଆଉ ଏଥିପାଇଁ ମୁଁ ଏଭଳି ସେଲିବ୍ରେଟ୍ କରିବାକୁ ନିଷ୍ପତ୍ତି ନେଲି।” ବରୁଣଙ୍କ ଏହି ପୋଷ୍ଟଟି ସୋସିଆଲ ମିଡିଆରେ ଏବେ ଲକ୍ଷ ଲକ୍ଷ ଲାଇକ୍, କମେଣ୍ଟ ସାଉଁଟୁଛି। ତେବେ ଯାହା ଜଣାପଡ଼ିଛି ବରୁଣ ଏବଂ ସାରା ଫିଲ୍ମର ଏକ ରୋମାଣ୍ଟିକ୍ ସିକ୍ୱେନ୍ସର ଶୁଟିଂ ପାଇଁ ଗୋଆ ଆସିଥିଲେ। ଏଠାରେ ଶୁଟିଂ କଲାବେଳେ ବରୁଣ ସାମାନ୍ୟ ଆହତ ମଧ୍ୟ ହୋଇଥିଲେ। ଏବେ ଗୋଆରୁ ତାଙ୍କ ସେଲିବ୍ରେଶନର ଅପ୍ଡେଟ୍ ପାଇବା ପରେ ଫ୍ୟାନ୍ମାନେ ଖୁସି ବ୍ୟକ୍ତ କରିଛନ୍ତି। ଫିଲ୍ମଟି ମେ’ ୧ରେ ରିଲିଜ୍ ହେବ।
