ଡେରାଡୁନ,୧୪ା୬: ଉତ୍ତରାଖଣ୍ଡର ଡେରାଡୁନ୍ସ୍ଥିତ ଭାରତୀୟ ମିଲେଟାରୀ ଏକାଡେମୀ (ଆଇଏମ୍ଏ)ରେ ପାସିଂ ଆଉଟ୍ ପରେଡ୍ ଶନିବାର ଅନୁଷ୍ଠିତ ହୋଇଯାଇଛି। ପ୍ରଶିକ୍ଷଣ ଶେଷ ପରେ ସେନାରେ ସାମିଲ ହୋଇଛନ୍ତି ୩୩୩ ଅଧିକାରୀ। ଏହି ପରେଡ୍ରେ ୯ ମିତ୍ର ଦେଶର ୯୦ଜଣ କ୍ୟାଡେଟ୍ ମଧ୍ୟ ସାମିଲ ହୋଇଥିଲେ। କରୋନା ପାଇଁ ଆଇଏମ୍ଏର ୮୭ ବର୍ଷର ଇତିହାସରେ ପ୍ରଥମ ଥର ପାଇଁ ପାସିଂ ଆଉଟ୍ ପରେଡ କାର୍ଯ୍ୟକ୍ରମରେ କ୍ୟାଡେଟ୍ଙ୍କ ଅଭିଭାବକମାନେ ଉପସ୍ଥିତ ନ ଥିଲେ। ଚଳିତବର୍ଷ ଉତ୍ତର ପ୍ରଦେଶରୁ ସର୍ବାଧିକ ୬୬ଜଣ ପାସ୍ ହୋଇଛନ୍ତି। ଏହିକ୍ରମରେ ହରିୟାଣାରୁ ୩୯, ବିହାର ଏବଂ ଉତ୍ତରାଖଣ୍ଡରୁ ୩୧ ଜଣ ଲେଖାଏ ଅଛନ୍ତି। ଆର୍ମି ଚିଫ୍ ଜେନେରାଲ ମନୋଜ ମୁକୁନ୍ଦ ନରଓ୍ବଣେ ପରେଡର ସମୀକ୍ଷା କରିବା ସହ କ୍ୟାଡେଟ୍ଙ୍କୁ ଶପଥ ପାଠ କରାଇଥିଲେ। ସାଧାରଣତଃ ପାସିଂ ଆଉଟ୍ ପରେଡ ପରେ ଅଧିକାରୀଙ୍କୁ ୧୫ରୁ ୨୦ ଦିନ ଛୁଟି ମିଳୁଥିଲା। ହେଲେ କରୋନା ସଙ୍କଟ ଯୋଗୁ ଅଧିକାରୀମାନେ ଘରକୁ ଯିବେନାହିଁ। ୨୪ ଘଣ୍ଟା ମଧ୍ୟରେ ସେମାନଙ୍କୁ ନିଯୁକ୍ତିସ୍ଥଳରେ ରିପୋର୍ଟ କରିବାକୁ କୁହାଯାଇଛି।
ସଂଯୋଗବଶତଃ ଦୁଇ ସହପାଠୀ ସାଥୀ ହୋଇ ଶତ୍ରୁ ପକ୍ଷରୁ ଦମନ କରିବାକୁ ମୋର୍ଚ୍ଚା ସମ୍ଭାଳିବେ। ପାସିଂ ଆଉଟ୍ ପରେଡ୍ରେ ଏପରି ଦୁଇ ଦେଶପ୍ରେମୀ ସାଙ୍ଗଙ୍କ କାହାଣୀ ସାମ୍ନାକୁ ଆସିଛି। ଲ୍ୟୁଟ୍ନାଣ୍ଟ ଶୁଭମ୍ ବେଉଣ୍ଠିଆଲ ଏବଂ ଲ୍ୟୁଟନାଣ୍ଟ ଭିନୀତ ଖାନ୍ନା ୭ମ ଶ୍ରେଣୀରେ ଆର୍ମି ପବ୍ଲିକ୍ ସ୍କୁଲରେ ସାଥୀ ହୋଇ ଗୋଟିଏ ସେକ୍ସନରେ ପାଠ ପଢୁଥିଲେ। ଦୁଇଜଣଙ୍କ ସ୍ବପ୍ନ ଥିଲା ଭାରତୀୟ ସେନାରେ ଅଧିକାରୀ ହେବା। ସ୍ନାତକ ଶେଷ କରିବା ପରେ ସେମାନେ ପରୀକ୍ଷାରେ ଉତ୍ତୀର୍ଣ୍ଣ ହୋଇ ସୈନ୍ୟବାହିନୀରେ ଯୋଗଦେଇଥିଲେ।
