ମୁମ୍ବାଇ: ବଲିଉଡ୍ ଷ୍ଟାର ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ ଏପର୍ଯ୍ୟନ୍ତ ଅନେକେ ବିଶ୍ୱାସ କରିପାରୁ ନାହାନ୍ତି। ସୁଶାନ୍ତଙ୍କ ମୃତ୍ୟୁ ଖବର ପାଇବା ପରଠାରୁ ସମ୍ପୂର୍ଣ୍ଣ ଭାବେ ଭାଙ୍ଗି ପଡିଛନ୍ତି ତାଙ୍କ ପୂର୍ବତନ ପ୍ରେମିକା ଅଙ୍କିତା ଲୋଖଣ୍ଡେ। ଦିନ ରାତି କାନ୍ଦୁଥିବା ଅଙ୍କିତା ମଙ୍ଗଳବାର ସୁଶାନ୍ତ ଆତ୍ମହତ୍ୟା କରିଥିବା ଫ୍ଲାଟରେ ପହଞ୍ଚିଥିବା ଦେଖାଯାଇଛି। ଏହି ସମୟରେ ତାଙ୍କସହ ଆଉ କେତେଜଣଙ୍କୁ ମଧ୍ୟ ସେଠାରେ ଦେଖିବାକୁ ମିଳିଛି। ଅଙ୍କିତାଙ୍କ ବନ୍ଧୁ ସନ୍ଦିପ ସିଂ ତାଙ୍କୁ ଧରି ଧରି ସୁଶାନ୍ତଙ୍କ ଘର ଭିତରକୁ ନେଇ ଯାଉଥିବା ଏକ ଭିଡିଓରେ ଦେଖାଯାଇଛି। ଏପର୍ଯ୍ୟନ୍ତ ସୁଶାନ୍ତଙ୍କ ମୃତ୍ୟୁକୁ ନେଇ ଅଙ୍କିତା କିଛି ନ କହିଥିଲେ ମଧ୍ୟ ଏବେ ତାଙ୍କ ଅବସ୍ଥା ଠିକ୍ ନ ଥିବା କହିଛନ୍ତି ଅଙ୍କିତାଙ୍କ ଜଣେ ବନ୍ଧୁ। ଉଭୟ ଅଙ୍କିତା ଓ ସୁଶାନ୍ତ ଟେଲିଭିଜନ ଧାରାବାହିତ ‘ପବିତ୍ର ରିସ୍ତା’ରେ ନଜର ଆସିଥିବା ବେଳେ ଏହାପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ହେଲେ କିଛିଦିନ ହେବ ସେମାନଙ୍କର ବ୍ରେକ୍ ହୋଇଯାଇଥିଲା।
