ଛତ୍ରପୁର,୧୩ା୩(ଡି.ଏନ.ଏ)- ଛତ୍ରପୁରଠାରେ ଦୋଳଯାତ୍ରା ଚାଲିଥିବାବେଳେ ଜଣେ ମହିଳାଙ୍କ ବେକରୁ ସୁନାଚେନ୍ ଛିଣ୍ଡାଇ ନେଇଥିବା ଅଭିଯୋଗରେ ଗୁରୁବାର ଏକ ଦମ୍ପତିଙ୍କୁ ପୋଲିସ ଗିରଫ କରିଛି। ସେମାନେ ହେଲେ କଟକ ମାଲଗୋଦାମ ଥାନା ଜୋବ୍ରା ଚୁନାଭାଟି ଅଞ୍ଚଳର ପି. ରବି ରାଓ ଓ ତାଙ୍କ ସ୍ତ୍ରୀ ଏସ୍. ସୁନ୍ଦରୀ। ଚୋରି ହୋଇଥିବା ୧୩ ଗ୍ରାମ ଓଜନର ସୁନା ଚେନ୍ ସେମାନଙ୍କଠାରୁ ଜବତ କରାଯାଇଛି। ଗିରଫ ଦମ୍ପତିଙ୍କୁ କୋର୍ଟ ଚାଲାଣ କରାଯାଇଥିବା ଛତ୍ରପୁର ଥାନା ଅଧିକାରୀ ପ୍ରିୟସ ରଞ୍ଜନ ଛୋଟରାୟ ସୂଚନା ଦେଇଛନ୍ତି। ୧୦ ତାରିଖ ସନ୍ଧ୍ୟାରେ ଛତ୍ରପୁରରେ ଦୋଳଯାତ୍ରା ଚାଲିଥିବାବେଳେ ବଜାର ମୁଖ୍ୟ ରାସ୍ତାରେ ବଡଆର୍ଯ୍ୟପଲ୍ଲୀ ଗାଁର ଜି. କାମନାଙ୍କ ବେକରୁ ଅଭିଯୁକ୍ତ ରବି ସୁନାଚେନ୍ ଛିଣ୍ଡାଇ ସ୍ତ୍ରୀ ସୁନ୍ଦରୀଙ୍କୁ ଦେଇଥିଲେ। କାମନା ଚିତ୍କାର କରିବାରୁ ସେଠାରେ ଥିବା ଲୋକେ ରବିଙ୍କୁ କାବୁ କରିନେଇଥିଲେ ମଧ୍ୟ ସୁନ୍ଦରୀ ଚେନ୍ ଧରି ଚମ୍ପଟ ମାରିଥିଲେ। ଛତ୍ରପୁର ଥାନା ପୋଲିସ ପହଞ୍ଚତ୍ ରବିଙ୍କୁ ଥାନାକୁ ଆଣି ପଚରାଉଚୁରା କରିଥିଲେ। ସୁନ୍ଦରୀ ଚେନ୍ ନେଇ କଟକସ୍ଥିତ ତାଙ୍କ ଘରକୁ ଚାଲିଯାଇଥିବା ଜାଣିବା ପରେ ବୁଧବାର ରାତିରେ ଛତ୍ରପୁର ପୋଲିସ କଟକ ଯାଇ ରବିଙ୍କ ଘରେ ଚଢାଉ କରି ସୁନ୍ଦରୀଙ୍କୁ ଗିରଫ କରିଥିଲା। ଏ ନେଇ ଛତ୍ରପୁର ଥାନାରେ ମାମଲା (ନଂ.୬୫/୨୦) ରୁଜୁ ହୋଇଛି।
