ଭୁବନେଶ୍ୱର,୨୯।୧୧(ବ୍ୟୁରୋ): ରାଜ୍ୟର ଆର୍ଥିକ ସ୍ଥିତି ଭଲ ରହିଛି। ବିତ୍ତୀୟ ପରିଚାଳନା ଠିକ ଢଙ୍ଗରେ କରାଯାଉଛି। ଟିକସ ଆଦାୟ ବଢ଼ିଛି। ରାଜସ୍ବ ପୂର୍ବ ବର୍ଷ ତୁଳନାରେ ସନ୍ତୋଷଜନକ ରହିଛି। ତେବେ ରାଜ୍ୟ ସରକାରଙ୍କ ବିଭିନ୍ନ ବିଭାଗ କେନ୍ଦ୍ରରୁ ପାଇଥିବା ଅନୁଦାନର ବିନିଯୋଗ ପ୍ରମାଣ ପତ୍ର (ୟୁସି) ଦେବାରେ ଟାଳଟୁଳ ନୀତି ଅବଲମ୍ବନ କରୁଛନ୍ତି। ପରିଚାଳନା ଅଭାବରୁ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଗୁରୁବାର ବିଧାନସଭାରେ ଉପସ୍ଥାପନ କରିଥିବା ରାଜ୍ୟର ଆର୍ଥିକ ସ୍ଥିତି-୨୦୧୮ର କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ(ସିଏଜି) ରିପୋର୍ଟରୁ ଏହି ସୂଚନା ମିଳିଛି। ସିଏଜି ତାଙ୍କ ରିପୋର୍ଟରେ ଉଲ୍ଲେଖ କରିଛନ୍ତି ଯେ ବିିଭିନ୍ନ ବିଭାଗକୁ ଦିଆଯାଉଥିବା ଅର୍ଥର ବିନିଯୋଗ ପ୍ରମାଣ ପତ୍ର(ୟୁସି) ଠିକ୍ ସମୟରେ ପ୍ରଦାନ କରାଯାଉ ନାହିଁ। ୨୦୧୭-୧୮ରେ ସରକାର ୨୧,୭୮୦.୩୦ କୋଟି ଟଙ୍କା ଅନୁଦାନ ରୂପେ ପାଇଥିବା ବେଳେ ସେଥିରୁ ୧୬,୩୯୧.୧୬ କୋଟି ଟଙ୍କାର ୟୁସି ଦେଇ ନାହାନ୍ତି। ୨୦୧୮ ମାର୍ଚ୍ଚ ସୁଦ୍ଧା ସରକାରଙ୍କ ୩୫ଟି ବିଭାଗର ୩୮,୪୨୭.୯୧ କୋଟି ଟଙ୍କାର ବିନିଯୋଗ ପ୍ରମାଣ ପତ୍ର ଦାଖଲ କରି ନ ଥିଲେ।
ରାଜ୍ୟ ସରକାର ଆଳୁର ଅଭାବ ଦୂର କରିବାକୁ ଆଳୁ ମିଶନ ଗଠନ କରିଥିଲେ। ଏଥିସହିତ ପର୍ଯ୍ୟାପ୍ତ ଶୀତଳଭଣ୍ଡାର କରିବାକୁ ନିଷ୍ପତ୍ତି କରିଥିଲେ। ପାଣ୍ଠିର ଉପଯୁକ୍ତ ବିନିଯୋଗ ହୋଇ ନ ପାରିବା, ଉନ୍ନତମାନର ଆଳୁ ବିହନ ଉପଲବ୍ଧ ନ ହେବା, ଅଧିକ ଟଙ୍କାରେ ବିହନ କ୍ରୟ କରିବା, ଚାଷୀଙ୍କୁ ଉପଯୁକ୍ତ ପ୍ରୋତ୍ସାହନ ନ ମିଳିବା ଯୋଗୁ ଆଳୁ ମିଶନ ଫେଲ୍ ମାରିଛି ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ଗତ ୩ ବର୍ଷ ମଧ୍ୟରେ ରାଜ୍ୟ ସରକାର ରାଜ୍ୟରେ ୫୫ଟି ଶୀତଳଭଣ୍ଡାର ସ୍ଥାପନ କରିବାକୁ ଲକ୍ଷ୍ୟ ରଖିଥିବା ବେଳେ ମାତ୍ର ୨୩ଟି ସ୍ଥାପନ ହୋଇ ପାରିଥିଲା। ଶୀତଳ ଭଣ୍ଡାର ସ୍ଥାପନ ପାଇଁ ଘରୋଇ ସଂସ୍ଥା ଆଗ୍ରହ ଦେଖାଇ ନ ଥିଲେ। କେନ୍ଦ୍ରୀୟ ଅନୁଦାନ ନ ମିଳିବାରୁ ରାଜ୍ୟ ସରକାର ୨୦୧୫-୧୬ରୁ ୨୦୧୭-୧୮ ମଧ୍ୟରେ ଯକ୍ଷ୍ମା ନିୟନ୍ତ୍ରଣ ଓ ମ୍ୟାଲେରିଆ ନିୟନ୍ତ୍ରଣ ପାଇଁ ଉଦ୍ଦିଷ୍ଟ ୩୦ କୋଟି ଟଙ୍କା ଖର୍ଚ୍ଚ କରାଯାଇ ପାରି ନାହିଁ।
ଅନ୍ୟପକ୍ଷରେ ରାଜସ୍ବ ପରିଚାଳନା ଓ ଟିକସ ବୃଦ୍ଧିରେ ସରକାର ସଫଳ ଅଛନ୍ତି। ରିପୋର୍ଟରେ କୁହାଯାଇଛି ଯେ ରାଜ୍ୟ ୧୩ ହଜାର ୩୬୭ କୋଟି ଟଙ୍କାର ବଳକା ରାଜସ୍ବ ହାସଲ କରିଛି। ସରକାର ୮୫,୨୦୪ କୋଟି ଟଙ୍କା ରାଜସ୍ବ ପାଇଛନ୍ତି ଯାହାକି ସାମଗ୍ରିକ ରାଜ୍ୟ ଘରୋଇ ଉତ୍ପାଦ(ଜିଏସ୍ଡିପି)ର ୨୦.୪୮ ପ୍ରତିଶତ । ପୂର୍ବ ବର୍ଷ ତୁଳନାରେ ୧୪.୬୭ ପ୍ରତିଶତ ଅଧିକ ହୋଇଛି। ୨୦୧୭-୧୮ରେ ରାଜସ୍ବ ଖର୍ଚ୍ଚ (୭୧,୮୩୭ କୋଟି ଟଙ୍କା) ଅନୁରୂପ ବୃଦ୍ଧି ଘଟିଥିଲା। ୨୦୧୬-୧୭ ତୁଳନାରେ ୧୦.୪୫ ପ୍ରତିଶତ, ଯାହାକି ଜିଏସଡିପିର ୧୭.୨୭ ପ୍ରତିଶତ ଥିଲା। ପୂର୍ବ ବର୍ଷ ତୁଳନାରେ ପୁଞ୍ଜିଗତ ଖର୍ଚ୍ଚ ୧୪.୨୮ ପ୍ରତିଶତ ବୃଦ୍ଧି ପାଇଛି। ରିପୋର୍ଟରେ ଉଲ୍ଲେଖ କରାଯାଇଛି ଯେ ଏସବୁ ସତ୍ତ୍ୱେ ବିତ୍ତୀୟ ନିଅଣ୍ଟ ୧,୩୬୦ କୋଟି ଟଙ୍କା ରହିଛି, ଯାହା ୨.୨୫ ପ୍ରତିଶତ। ଏଫଆର ବିଏମ(ସଂଶୋଧନ) ଧାରା ୨୦୧୬ରେ ନିର୍ଦ୍ଧାରିତ ବିତ୍ତୀୟ ଧାର୍ଯ୍ୟଲକ୍ଷ୍ୟକୁ ଏହା ପୂରଣ କରିପାରିଛି। ୨୦୧୫-୧୬ରୁ ୨୦୧୯-୨୦ ମଧ୍ୟରେ ଋଣ ଓ ଜିଏସଡିପିର ଅନୁପାତ ୨୫ ପ୍ରତିଶତଠାରୁ କମ ଥିଲା। ତେବେ ବକେୟା ଦେୟ ୨୦୧୩-୧୪ ଠାରୁ (୧୫.୦୮%) ବୃଦ୍ଧି ପାଇ ୨୩.୩୬ ପ୍ରତିଶତରେ ପହଞ୍ଚିଛି।
