ଢେଙ୍କାନାଳ ଅଫିସ, ୧୨।୮: ଢେଙ୍କାନାଳ ଜିଲା ଦେଇ ପ୍ରବାହିତ ବ୍ରାହ୍ମଣୀ ନଦୀ ଉପରେ ନିର୍ମିତ ସାରଙ୍ଗଧର ସେତୁ ଏବଂ ବାଜି ରାଉତ ସେତୁ ଉପରେ ଆଲୋକୀକରଣ ବ୍ୟବସ୍ଥା ଫଳକରେ ସୀମିତ ରହିଛି। ଜିଲାବାସୀଙ୍କ ଲାଇଫ୍ ଲାଇନ କୁହାଯାଉଥିବା ଉକ୍ତ ଦୁଇ ବ୍ରିଜ୍ ଉପରେ ସଞ୍ଜ ଗଡ଼ିଲେ ରାଜୁତି କରୁଛି ଅନ୍ଧାର। ଅସାମାଜିକମାନେ ଦୌରାତ୍ମ୍ୟ ସୃଷ୍ଟି କରୁଛନ୍ତି। ଭୟ ଆତଙ୍କରେ ଜୀବନକୁ ବାଜି ଲଗାଇ ପଥଚାରୀମାନେ ଯାତାୟାତ କରୁଥିବାବେଳେ ଏହାକୁ ନେଇ ଅସନ୍ତୋଷ ବଢ଼ିବାରେ ଳାଗିଛି।
ଢେଙ୍କାନାଳ-କାମାକ୍ଷାନଗର ପୂର୍ତ୍ତ ବିଭାଗ ରାସ୍ତାର ବାହ୍ମଣୀ ନଦୀ ଉପରେ ନିର୍ମିତ ହୋଇଛି ସାରଙ୍ଗଧର ସେତୁ। ୧ କିମି ୩୩୫ ମିଟର ଦୈର୍ଘ୍ୟ ବିଶିଷ୍ଟ ଉକ୍ତ ବ୍ରିଜ୍ରେ ଉଜ୍ଜ୍ୱଳ ଆଲୋକ ବ୍ୟବସ୍ଥା ପାଇଁ ୪୮ ଲକ୍ଷ ଟଙ୍କା ବ୍ୟୟବରାଦ ହୋଇଛି। ୨୦୧୯ ମାର୍ଚ୍ଚ ୩ରେ ଏହାର ଭିତ୍ତିପ୍ରସ୍ତର ସ୍ଥାପନ କରିଥିଲେ କାମାକ୍ଷାନଗର ବିଧାୟକ ତଥା ପୂର୍ତ୍ତମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ। ସେହିପରି ଗଁଦିଆ ବ୍ଲକ ମନ୍ଦାର ଏବଂ ଭୁବନ ବ୍ଲକ ମଧ୍ୟରେ ଯାତାୟାତ ବ୍ୟବସ୍ଥା ସୁଗମ କରିବାକୁ ଲୋକାର୍ପିତ ହୋଇଛି ବାଜି ରାଉତ ସେତୁ, ଯାହାର ଦୈର୍ଘ୍ୟ ୧କିମି ୨୨୫ ମିଟର। ଏଥିରେ ଆଲୋକୀକରଣ ବ୍ୟବସ୍ଥା ପାଇଁ ୪୬ ଲକ୍ଷ ଟଙ୍କା ଅଟକଳ କରାଯାଇଛି। ଭିତ୍ତିପ୍ରସ୍ତର ସ୍ଥାପନର ୩ମାସ ମଧ୍ୟରେ ପ୍ରକଳ୍ପ କାର୍ଯ୍ୟ ସମ୍ପୂର୍ଣ୍ଣ କରାଯିବାକୁ ପୂର୍ତ୍ତ ବିଭାଗ ପକ୍ଷରୁ ସମୟ ସୀମା ଧାର୍ଯ୍ୟ କରାଯାଇଥିଲା। ଏହାପରେ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଥିଲା। ତେବେ ବିଭାଗୀୟ ଯନ୍ତ୍ରୀ ଏବଂ ଅଧିକାରୀଙ୍କ ହାତବାରିସି ସାଜିଥିବା ଏକ ଠିକାସଂସ୍ଥା ଟେଣ୍ଡର ସମୟରେ ପ୍ରମୁଖ କମ୍ପାନୀର ଜାଲ କୋଟେଶନ ଦାଖଲ କରିଥିଲା। ଘଟଣା ପ୍ରଘଟ ହେବାପରେ ଏହାକୁ ନେଇ ପ୍ରତିବାଦର ସ୍ବର ଉଠିଥିଲା। ପୂର୍ତ୍ତ ବିଭାଗ ପକ୍ଷରୁ ଘଟଣାର ତଦନ୍ତ ବେଳେ କୋଟେଶନ ଜାଲ୍ ଥିବା ସ୍ପଷ୍ଟ ହୋଇଥିଲା ଏବଂ ଟେଣ୍ଡର ପ୍ରକ୍ରିୟା ବାତିଲ କରିଦିଆଯାଇଥିଲା। ଏହାପରେ ଆଲୋକୀକରଣ ପ୍ରସଙ୍ଗକୁ ସମ୍ପୂର୍ଣ୍ଣ ଭୁଲିଯାଇଛି ପୂର୍ତ୍ତ ବିଭାଗ। ଏ ନେଇ ଜିଲା ପ୍ରଶାସନଠାରୁ ଆରମ୍ଭ କରି ପୂର୍ତ୍ତ ବିଭାଗ ବରିଷ୍ଠ ଅଧିକାରୀଙ୍କୁ ଅବଗତ କରାଯାଇଥିଲେ ମଧ୍ୟ ଗୁରୁତ୍ୱ ଦିଆଯାଉ ନ ଥିବା ଅଭିଯୋଗ ହେଉଛି। ଉଲ୍ଲେଖଯୋଗ୍ୟ, ସାରଙ୍ଗଧର ସେତୁ ଲୋକାର୍ପଣକୁ ୨୬ବର୍ଷ ପୂରଣ ହୋଇସାରିଥିବାବେଳେ ୨୦୧୬ରେ କାର୍ଯ୍ୟକ୍ଷମ ହୋଇଛି ବାଜି ରାଉତ ସେତୁ।
ଏ ସଂକ୍ରାନ୍ତରେ ନିର୍ବାହୀଯନ୍ତ୍ରୀ ମନୋରଞ୍ଜନ ବିଶ୍ୱାଳ କୁହନ୍ତି, ଜାଲ କୋଟେଶନ ଧରାପଡ଼ିବା ପରେ ଟେଣ୍ଡର ବାତିଲ କରିଦିଆଯାଇଥିଲା। ଏହାପରେ ନିର୍ବାଚନ ଆଚରଣ ବିଧି ଲାଗୁ ହୋଇଗଲା। ଫଳରେ କାମ ଆଉ ଆଗେଇ ପାରିନାହିଁ। ଏବେ ପୁଣିଥରେ ଟେଣ୍ଡର ପ୍ରକ୍ରିୟା ଶେଷ ହୋଇଛି। ଖୁବଶୀଘ୍ର କାମ ଆରମ୍ଭ ହେବ ବୋଲି ସେ ସୂଚନା ଦେଇଛନ୍ତ।
