ଦିବଂଗତ ଅଭିନେତ୍ରୀ ଶ୍ରୀଦେବୀ ବାଥ୍ଟବ୍ରେ ବୁଡ଼ି ପ୍ରାଣ ହରାଇଥିବା ଘଟଣାକୁ ତାଙ୍କ ପ୍ରଶଂସକମାନେ ସହଜରେ ଗ୍ରହଣ କରି ପାରି ନ ଥିଲେ। ଏନେଇ ସେତେବେଳେ ନାନା ପ୍ରଶ୍ନ ଉଙ୍କି ମାରିଥିଲା। କିନ୍ତୁ ଏବେ ଏହି ଘଟଣାର ପ୍ରକୃତ କାରଣ ସାମ୍ନାକୁ ଆସିଛି। ଶ୍ରୀଦେବୀଙ୍କ ଜୀବନୀ ଉପରେ ‘ଶ୍ରୀଦେବୀ: ଦ ଏଟର୍ନାଲ ଗଡେସ୍’ ଲେଖିଥିବା ପୁସ୍ତକର ଲେଖକ ସତ୍ୟାର୍ଥ ନାୟକ ଏ ସମ୍ପର୍କରେ ତାଙ୍କ କଲମମୁନରେ ଏହାର ପର୍ଦ୍ଦାଫାଶ କରିଛନ୍ତି।
ଶ୍ରୀଦେବୀଙ୍କର ଲୋ-ବ୍ଲଡ୍ପ୍ରେସର ଥିଲା। ଏ ସମ୍ପର୍କରେ ଲେଖକ ଶ୍ରୀଦେବୀଙ୍କ କେତେକ ସମ୍ପର୍କୀୟଙ୍କ ମତ ମଧ୍ୟ ନେଇଛନ୍ତି। ସେମାନେ କହିଛନ୍ତି, ତାଙ୍କର ଲୋ-ବ୍ଲଡ୍ପ୍ରେସର ଥିଲା। ସେ ବାଥରୁମ୍ ଯାଇଥିବା ସମୟରେ ବାଥ୍ଟବ୍ରେ ପଡ଼ିଯାଇଥିଲେ। ଏହା ପରେ ସ୍ବାମୀ ବୋନି କପୁର ତାଙ୍କୁ ଅଚେତ ଅବସ୍ଥାରେ ଦେଖିଥିଲେ। ମାତ୍ର କେରଳର ଡିଜିପି କହିଥିଲେ, ଶ୍ରୀଦେବୀଙ୍କ ମୃତ୍ୟୁ ସାଧାରଣ ନୁହେଁ, ଏହା ଏକ ହତ୍ୟାକାଣ୍ଡ। ସେହିପରି ମୃତ୍ୟୁ ପ୍ରମାଣପତ୍ରରେ ଆଘାତ ଲାଗି ମୃତ୍ୟୁ ଘଟିଥିବା ଡାକ୍ତର ଦର୍ଶାଇଥିଲେ। ଏ ସମସ୍ତ କଥା ପ୍ରଶଂସକଙ୍କୁ ଦ୍ୱନ୍ଦ୍ୱରେ ପକାଇଥିଲା। ତେଣୁ ଲେଖକଙ୍କ ଦ୍ୱାରା ଏହି ରହସ୍ୟ ଉପରୁ ପରଦା ହଟିଛି।
ଉଲ୍ଲେଖଯୋଗ୍ୟ, ଦୁବାଇର ଏକ ହୋଟେଲ ବାଥ୍ଟବ୍ରେ ଶ୍ରୀଦେବୀ ପଡ଼ି ଯାଇଥିଲେ। ତାଙ୍କ ମୁଣ୍ଡରେ ଆଘାତ ଲାଗି ପ୍ରଚୁର ରକ୍ତ ବହୁଥିଲା। ୫୪ ବର୍ଷ ବୟସରେ ୨୪ ଫେବୃୟାରୀ ୨୦୧୮ରେ ଶ୍ରୀଦେବୀଙ୍କ ମୃତ୍ୟୁ ଘଟିଥିଲା। ଏହି ଖବର ସେତେବେଳେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା।
