ବନ୍ତ,୧୧।୯ (ସ୍ବ.ପ୍ର.)-ପିଲାଦିନୁ ଅଭିନୟ କଳା ପ୍ରତି ଥିବା ରୁଚି ତାଙ୍କୁ ଲକ୍ଷ୍ୟପଥରେ ଆଗେଇ ନେଇ ଚାଲିଛି। ପ୍ରଥମେ ରଙ୍ଗମଞ୍ଚରେ ଅଭିନୟ ଓ ନୃତ୍ୟ ପରିବେଷଣ କରି ନିଜର ଏକ ପରିଚୟ ସୃଷ୍ଟି କରିଥିଲେ। ପରେ ୨୦୧୮ରେ ମାଡ୍ରାସ ଇନ୍ଷ୍ଟିଚ୍ୟୁଟରେ ଅଭିନୟରେ ଡିପ୍ଲୋମା କୋର୍ସ ସମ୍ପୂର୍ଣ୍ଣ କରିବା ପରେ ଜଣେ ସମ୍ପର୍କୀୟା ମାଉସୀଙ୍କ ପ୍ରେରଣାରେ ସେ ସିନେ ଜଗତରେ ପ୍ରବେଶ କରି ନିଜ ପ୍ରତିଭା ଦେଖାଇ ପାରିଛନ୍ତି। ଫୁଲ୍ ଗଡବଡ, ଲୋକାଲ ଟୋକା ଲଭ ଚୋଖା ଧାରାବାହିକ (ଟେଲି)ରେ ଅଭିନୟ କରି ସଫଳ ହେବା ପରେ ସେ ଅଶୋକ ପତିଙ୍କ ନିର୍ଦ୍ଦେଶିତ ଓଡିଆ ଚଳଚ୍ଚିତ୍ର ‘ଅଜବ ସଞ୍ଜୁର ଗଜବ ଲଭ’ରେ ଅଭିନୟ କରିବା ସୁଯୋଗ ପାଇଛନ୍ତି। ଆଗକୁ ସିନେ ଜଗତରେ ଅଭିନୟ କ୍ଷେତ୍ରରେ ସେ ନିଜର ଏକ ସ୍ବତନ୍ତ୍ର ପରିିଚୟ ସୃଷ୍ଟି କରିବା ଲକ୍ଷ୍ୟରେ ରହିଛନ୍ତି। ନିରନ୍ତର ସାଧନା ଓ ଆତ୍ମବିଶ୍ୱାସ ଯେ କୌଣସି କାମରେ ସଫଳତା ଆଣିଦିଏ ବୋଲି ସେ କହିଛନ୍ତି ।
ତାଙ୍କୁ ବୟସ ୨୨। ଘର ଭଦ୍ରକ ଜିଲା ବନ୍ତ ଥାନା ସିଲନ୍ଦି ଗ୍ରାମରେ । ତାଙ୍କ ମାତା ଜ୍ୟୋତ୍ସ୍ନାରାଣୀ ସାହ ୁଓ ପିତା ପଦ୍ମନାଭ ସାହୁ । ପରିବାରରେ ସେ ସବା ସାନପୁଅ । ୨୦୧୩ ରେ ମାଟ୍ରିକ ପାସ ପରେ ଭୁବନେଶ୍ୱରରେ ଯୁକ୍ତ ୨ ପଢିବା ପରେ ହୋଟେଲ ମ୍ୟାନେଜମେଣ୍ଟ ପାଠ୍ୟକ୍ରମ ଶେଷ କରିଥିଲେ। ଚାକିରି ମୋହ ତାଙ୍କୁ ଅଭିନୟ କଳାଠାରୁ ଦୂରେଇ ରଖି ପାରି ନ ଥିଲା। ସେହିପରି ସମାଜସେବା କାର୍ଯ୍ୟପ୍ରତି ଛାତ୍ର ଜୀବନରୁ ସେ ରୁଚିରଖି ଆସିଛନ୍ତି। ସମାଜ ସେବାରେ ତାଙ୍କୁ ଆନନ୍ଦ ମିଳିଥାଏ। ଭବିଷ୍ୟତରେ ସେ ଅଭିନୟ ସହିତ ସମାଜସେବା କାର୍ଯ୍ୟ ଜାରି ରଖିବେ ବୋଲି କହିଛନ୍ତି ମାନସ।
