ପର୍ଲା, ୧୦ା୯ (ଡି.ଏନ୍.ଏ.):
କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲର ଧଅଁରପୁର ପଁଚେତ୍ ଅଧୀନ ଭାଲୁଚୁଆ ଗଁାରେ ଗୁଟେ ପରିବାରର ୪ ଭାଇବହେନ୍ ଭିନ୍ନକ୍ଷମ ଥିବାର ଜନାଯାଇଛେ।
ସୂଚନା ଅନ୍ସାରେ ଧଅଁରପୁର ଗଁାର ଦୁଷ୍ମନ୍ତ ଜାଲକଁର ଦୁଇ ଭାଇ ରାଜସିଂ ଜାଲ ଆର କ୍ଷୀତିରାମ ଜାଲ। ତିନ୍ହିଁ ଭାଇ ଏକ୍ଠାନିଆ ମିଶିଗୁଲି ଗୁଟେ ଜାଗାରେ ରହୁଛନ୍। ଦୁଷ୍ମନ୍ତକଁର ୩ ଝି’ପୁଓ ଭିତ୍ରୁ ଝି’ ଦେବକୀ(୭), ରେବତୀ(୨) ଭିନ୍ନକ୍ଷମ ଆଏ। ସେନ୍ତା ମଝିଅଁା ଭାଇ ରାଜସିଂ ଜାଲକଁର ୩ ଝି’ପୁଓ ଭିତ୍ରୁ ମଝିଅଁା ଝି’ ସୁଭଦ୍ରା(୨) ଜନ୍ମୁ ଅଁଧ୍ ଆଏ। ସାନ୍ ଭାଇ କ୍ଷୀତିରାମ ଜାଲକଁର ୨ ଝି’ପୁଓ ଭିତରୁ ସାନ ପୁଓ ତେଜେଶ୍ୱର(୩) ବି ଜନ୍ମୁ ଅଁଧ୍ ଥିବାର ଜନାଯାଇଛେ। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ସଭେ କୁଲିମଜୁରି କରି କୁଟୁମ୍ ପୁଷୁଛନ୍। ଏନ୍ତାଥି ଘରେ ସବୁବେଲେ ଅଭାବ ଅନାଟନ ଲାଗିରହିଛେ। ଯେନ୍ଥିରଲାଗି ତିନ୍ହିଁ ଭାଇ ଟଁକା ପଏସା ଅଭାବୁ ଛୁଆପିଲାକର ଉଚ ଚିକିଛା କରେଇ ନାଇଁପାରବାର। ପରିବାର ଲୋକ୍ ଘରର ବାସନ୍କୁସନ, ଗହନାଗଁାଠି ବିକି ଛୁଆକୁ ଚିକିଛା ଲାଗି ଜିଲା ମୁଖିଆ ଡାକ୍ତରଖାନା ଭବାନୀପାଟଣାକେ ନେଇଥିଲେ। ହେଲେ ସେଠାନେ ଡାକ୍ତର ଛୁଆକର ଉଚ ଚିକିଛା ଦରକାର ଅଛେ, ସେଥିରଲାଗି ବଡ଼ ଡାକ୍ତରଖାନାକେ ନେଇ ଚିକିଛା କରାବାକେ ପରାମଶ୍ ଦେଇଥିଲେ। ଇଆଡ଼େ ଯେ ସରକାର ଦିବ୍ୟାଙ୍ଗମାନକୁଁ ଅନେକ ପରକାର ସୁବିଧା ସୁଯୋଗ ଯୁଗେଇ ଦେଉଛନ୍। ହେଲେ ଇ ଅସାହା ପରିବାରର ୪ ଭିନ୍ନକ୍ଷମ ଭାଇବହେନ୍ ସବୁପରକାର ସରକାରୀ ଯୋଜନାରୁ ବଁଚିତ୍ ହେଇ ରହିଛନ୍। ଇଆଡ଼େ ଅଙ୍ଗନଓ୍ବାଡି କେନ୍ଦ୍ର ଜରିଆରେ ସର୍ଭେ କରି ଦିବ୍ୟାଙ୍ଗମାନକୁ ପରମାନପତର ଯୁଗେଇ ଦିଆଯାଉଛେ। ହେଲେ ଦୁଖର କଥା ଇ ୪ ଦିବ୍ୟାଙ୍ଗ ଭାଇବହେନ୍ ଦିବ୍ୟାଙ୍ଗ ପରମାନପତର ପାଏବାରୁ ବି ବଁଚିତ୍ ହେଇ ରହିଛନ୍। ଏହେଦେ ପରିବାର ଲୋକ୍ ୪ ଦିବ୍ୟାଙ୍ଗ ଛୁଆପିଲାକର ଚିକିଛା, ଭବିଷତ୍ ନେଇ ଚିନ୍ତାରେ ପଡ଼ିଛନ୍। ଜିଲା ପରଶାସନ ଇ ଦୁଖି ପରିବାର ଉପରେ ଖାସ୍ ଦୁରୁଷ୍ଟି ଦେଇ ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ବୁଧିଜୀବୀ ମହଲରେ ଦାବି ହେଉଛେ। ଇ ବାବ୍ଦେ ଧର୍ମଗଡ଼ ବିଡିଓ ଅଶୋକ କୁମାର ଭୋଇକୁଁ ପଚରାଲାରୁ ସରକାରୀ ନିୟମ ହିସାବେ ଛୁଆମାନକୁ ଆର ପରିବାରକେ ସାହାଯ୍ ଯୁଗେଇ ଦିଆଯିବା ବଲି କହିଥିଲେ।
