ସହରରେ ସୀମିତ ବରିଷ୍ଠ ନାଗରିକ ସୁରକ୍ଷା ସେଲ୍‌: ଗ୍ରାମାଞ୍ଚଳ ଥାନା ଇଲାକାରେ ହୋଇନି କାର୍ଯ୍ୟକ୍ଷମ
7:37 amJuly 3, 2019 / 21

ବ୍ରହ୍ମପୁର ଅଫିସ,୩ା୭-ବରିଷ୍ଠ ନାଗରିକଙ୍କ ସୁରକ୍ଷା ପାଇଁ ବ୍ରହ୍ମପୁର ପୋଲିସ ପକ୍ଷରୁ ଗୁରୁତ୍ୱ ଦିଆଯାଇଛି। ବିଭିନ୍ନ ଥାନାରେ ବରିଷ୍ଠ ନାଗରିକ ସେଲ ଗଠନ କରାଯାଇଛି। ଏକୁଟିଆ ରହୁଥିବା ବରିଷ୍ଠ ନାଗରିକଙ୍କୁ ଚିହ୍ନଟ କରାଯାଇ ସେମାନଙ୍କୁ ପରିଚୟ ପତ୍ର ବଣ୍ଟନ କରାଯାଉଛି। ପ୍ରତ୍ୟେକ ଥାନାରେ ଜଣେ ଲେଖାଏ ନୋଡାଲ ଅଫିସରଙ୍କୁ ଏହି ସେକ୍ଟର ଦାୟିତ୍ୱ ଦିଆଯାଇଛି। ସମ୍ପୃକ୍ତ ଅଧିକାରୀ ଜଣଙ୍କ ନିରନ୍ତର ବ୍ୟବଧାନରେ ବରିଷ୍ଠ ନାଗରିକଙ୍କ ଘରକୁ ଯାଇ ତାଙ୍କର ସୁବିଧା ଅସୁବିଧା କଥା ବୁଝିବାକୁ ନେଇ ନିର୍ଦ୍ଦେଶ ରହିଛି। କିନ୍ତୁ ଏହି ଯୋଜନା କେବଳ ସହରରେ ଆରମ୍ଭ ହୋଇଥିବା ବେଳେ ପରବର୍ତ୍ତୀ ସମୟରେ ତାହା ବନ୍ଦ ହୋଇଯାଇଛି। ଏବେ କୌଣସି ଥାନାର ନୋଡାଲ ଅଫିସର ସହରରେ ଥିବା କୌଣସି ବରିଷ୍ଠ ନାଗରିକଙ୍କ ଘରକୁ ଯାଇ ସେମାନଙ୍କ ସୁବିଧା ଅସୁବିଧା ସମ୍ପର୍କରେ ବୁଝୁନାହାନ୍ତି ବୋଲି ଅଭିଯୋଗ ହେଉଛି। ଅନ୍ୟପଟେ ଏବେ ସୁଦ୍ଧା ଗ୍ରାମାଞ୍ଚଳ ଥାନା ଇଲାକାରେ ଏହି ବରିଷ୍ଠ ନାଗରିକ ସୁରକ୍ଷା ସେଲ କାର୍ଯ୍ୟକ୍ଷମ ହୋଇନାହିଁ। ଏଣୁ ବ୍ରହ୍ମପୁର ପୋଲିସ ଜିଲାର ଗ୍ରାମାଞ୍ଚଳ ଇଲାକାରେ ଏକୁଟିଆ ରହୁଥିବା ବୃଦ୍ଧା ବୃଦ୍ଧଙ୍କୁ ଚିହ୍ନଟ କରିବା ପାଇଁ ବିଭିନ୍ନ ମହଲରେ ଦାବି ହେଉଛି। ସରକାରଙ୍କ ନିର୍ଦ୍ଦେଶକ୍ରମେ ୨୦୧୬ ସେପ୍ଟେମ୍ବର ମାସରେ ବରିଷ୍ଠ ନାଗରିକ ସୁରକ୍ଷା ସେଲ୍‌ ଗଠନ କରାଯାଇଛି। ଏହି ସେଲ୍‌ ହେବା ପରେ ୩ଟି ପର୍ଯ୍ୟାୟରେ ୭୪୦ ବରିଷ୍ଠ ନାଗରିକଙ୍କୁ ପରିଚୟ ପତ୍ର ବଣ୍ଟନ କରାଯାଇଛି । ସେହିପରି ଯାନବାହନ ଚଳାଚଳ କରୁଥିବା ବରିଷ୍ଠ ନାଗରିକଙ୍କୁ ଏକ ସ୍ବତନ୍ତ୍ର ଷ୍ଟିକର ପ୍ରଦାନ କରାଯାଇଛି। ଯେଉଁ ଷ୍ଟିକରରେ ସମ୍ପୃକ୍ତ ବରିଷ୍ଠ ନାଗରିକଙ୍କ ଫଟୋ ରହିଥିବା ବେଳେ ତାହା ଗାଡ଼ିରେ ଲଗାଇବେ। ଫଳରେ ଟ୍ରାଫିକ ସମସ୍ୟା କିମ୍ବା ଯାଞ୍ଚ ସମୟରେ ବରିଷ୍ଠ ନାଗରିକଙ୍କୁ ଚିହ୍ନଟ କରାଯାଇପାରିବ। ପ୍ରଥମ ପର୍ଯ୍ୟାୟରେ ବୈଦ୍ୟନାଥପୁର ଥାନା, ଟାଉନ ଥାନା, ବଡ଼ବଜାର ଥାନା ଓ ଗୋଷାଣୀ ନୂଆଗଁା ଥାନା ଇଲାକାରେ ରହୁଥିବା ନାଗରିକଙ୍କୁ ଏଥିରେ ସାମିଲ କରାଯାଇଥିଲା। ବୈଦ୍ୟନାଥପୁର ଥାନା ଇଲାକାରେ ପ୍ରଥମ, ଦ୍ୱିତୀୟ ଓ ତୃତୀୟ ପର୍ଯ୍ୟାୟରେ ସମୁଦାୟ ୨୫୯ଜଣଙ୍କୁ ସାମିଲ କରାଯାଇଛି।
ସେହିପରି ଗୋଷାଣୀନୂଆଗଁା ଥାନା ଇଲାକାରେ ପ୍ରଥମ, ଦ୍ୱିତୀୟ ଓ ତୃତୀୟ ପର୍ଯ୍ୟାୟରେ ୧୧୨ଜଣଙ୍କୁ ସାମିଲ କରାଯାଇଛି । ଟାଉନ ଥାନା ଇଲାକାରେ ପ୍ରଥମ, ଦ୍ୱିତୀୟ ଓ ତୃତୀୟ ପର୍ଯ୍ୟାୟରେ ୧୪୮ ଜଣଙ୍କୁ ସାମିଲ କରାଯାଇଛି। ସେହିପରି ବଡ଼ବଜାର ଥାନା ଇଲାକାରେ ପ୍ରଥମ, ଦ୍ୱିତୀୟ ଓ ତୃତୀୟ ପର୍ଯ୍ୟାୟରେ ୧୨୧ ଜଣଙ୍କୁ ସାମିଲ କରାଯାଇଥିଲା।
ଅନ୍ୟପକ୍ଷରେ ସଦର ଥାନା ଇଲାକାରେ ରହୁଥିବା ବୃଦ୍ଧାବୃଦ୍ଧଙ୍କୁ ପ୍ରଥମ ୨ଟି ପର୍ଯ୍ୟାୟରେ ସାମିଲ ହେବାକୁ ଥିବା ବେଳେ ତୃତୀୟ ପର୍ଯ୍ୟାୟରେ ୧୦୦ ଜଣଙ୍କୁ ସାମିଲ କରାଯାଇଛି। ହେଲେ ସଦର ଥାନା ଇଲାକାରେ ଯାଉଥିବା ସହର ଓ ଅଞ୍ଚଳଗୁଡ଼ିକୁ ଏଥିରେ ସାମିଲ କରାଯାଇଥିବା ବେଳେ ଗ୍ରାମାଞ୍ଚଳ ଗୁଡ଼ିକରେ ଏକୁଟିଆ ରହୁଥିବା ବୃଦ୍ଧାବୃଦ୍ଧଙ୍କୁ ସାମିଲ କରାଯାଇପାରିବ ନାହିଁ। ଏବେ ବି ଅନେକ ଗ୍ରାମାଞ୍ଚଳରେ ବରିଷ୍ଠ ନାଗରିକମାନେ ଏକୁଟିଆ ରହୁଛନ୍ତି।
ଏନେଇ ଅତିରିକ୍ତ ଏସ୍‌ପି ପ୍ରଭାତ ରାଉତରାୟଙ୍କୁ ପଚାରିବାରୁ ଆଗାମୀ ଦିନରେ ଗ୍ରାମାଞ୍ଚଳର ବରିଷ୍ଠ ନାଗରିକଙ୍କ ପାଇଁ ସୁରକ୍ଷା ସେଲଗୁଡ଼ିକ କାର୍ଯ୍ୟକ୍ଷମ ହେବ।