ସରିଲା ନିର୍ବାଚନ : ଚାଲିଛି ଅଙ୍କକଷା
4:12 amMay 1, 2019June 11, 2020 / 21

ପାରାଦୀପ,୧ା୫(ସ୍ବ.ପ୍ର.): ଚଳିତ ନିର୍ବାଚନର ଶେଷ ପର୍ଯ୍ୟାୟ ସୋମବାର ଶେଷ ହୋଇଯାଇଛି। ଏବେ ପ୍ରାର୍ଥୀ ଓ ସେମାନଙ୍କ ସମର୍ଥକମାନେ ଅଙ୍କ କଷୁଛନ୍ତି। ହାରିବା ଜିତିବାକୁ ନେଇ ଆକଳନ ଚାଲିଛି। କେଉଁ ଓ୍ବାର୍ଡରୁ କେତେ ପ୍ରତିଶତ ମତଦାନ ହୋଇଛି, ସେଥିରେ କେତେଜଣ ତାଙ୍କ ସମର୍ଥକ ଥିଲେ, କେତେ ଭୋଟ୍‌ ତାଙ୍କ ସପକ୍ଷରେ ଯାଇଥିବ, ମତଦାନ କରିଥିବା ଭୋଟରଙ୍କ ମନୋଭାବ, ପୋଲିଂ ବୁଥ୍‌ରେ ବସିଥିବା ଏଜେଣ୍ଟମାନଙ୍କ ରିପୋର୍ଟ ଆଦି ତର୍ଜମା କରାଯାଉଛି। ପାରାଦୀପ ନିର୍ବାଚନମଣ୍ଡଳୀରେ ଏବେ ଏଭଳି ସ୍ଥିତି ଦେଖିବାକୁ ମିଳୁଛି। ତେବେ ବିଜେଡି, କଂଗ୍ରେସ ଓ ଭାଜପା ମଧ୍ୟରେ ହୋଇଥିବା ତ୍ରିମୁଖୀ ଲଢେଇରେ କିଏ ବାଜି ମାରୁଛି, ତାହା ମେ ୨୩ରେ ସ୍ପଷ୍ଟ ହେବ। ସେପଟେ ସୋସିଆଲ ମିଡିଆରେ ପ୍ରାର୍ଥୀଙ୍କ ହାରଜିତକୁ ନେଇ ଚାଲିଛି ବିତର୍କ। ଏପରିକି କେତେଜଣ ଦଳୀୟ ପ୍ରାର୍ଥୀ ଖୋଲାଖୋଲି କହିଲେଣି ଆମେ ନିର୍ଦ୍ଧିଷ୍ଟ ଭୋଟ୍‌ ବ୍ୟବଧାନରେ ଜିତି ସାରିଛୁ। ଏମିତିରେ ଦେଖିବାକୁ ଗଲେ ମତଦାନ ହୋଇଥିବା ପରିସଂଖ୍ୟାନ ଗୋଳମାଳିଆ ରହିଛି। ଅର୍ଥାତ ପାରାଦୀପ ନିର୍ବାଚନମଣ୍ଡଳୀର ମୋଟ ୨,୧୧,୬୦୦ ଭୋଟରଙ୍କ ମଧ୍ୟରୁ ସୋମବାର ସନ୍ଧ୍ୟା ୭ଟା ସୁଦ୍ଧା ୭୩.୪୬ ପ୍ରତିଶତ ମତଦାନ ହୋଇଛି। ଅର୍ଥାତ ୧,୫୫,୦୦୦ ଭୋଟର ମତଦାନ କରିଛନ୍ତି। ୨୦୦୯ ଓ ୨୦୧୪ ନିର୍ବାଚନରେ କଂଗ୍ରେସ ୪୫ରୁ ୪୭ ହଜାର ମଧ୍ୟରେ ଭୋଟ୍‌ ପାଇଥିଲା। ଗତ ପଞ୍ଚାୟତ ନିର୍ବାଚନରେ ଯଦିଓ ଦଳ କିଛି ଭୋଟ ହରାଇଥିଲା, ତେବେ ବିଧାନ ସଭା ନିର୍ବାଚନରେ ସେପରି ହୋଇ ନ ଥିବ ବୋଲି ଦଳୀୟ କର୍ମୀମାନେ ଆଶାବ୍ୟକ୍ତ କରୁଛନ୍ତି। ତେଣୁ କଂଗ୍ରେସ ପ୍ରାର୍ଥୀ ୪୫ରୁ ୫୦ହଜାର ଭିତରେ ଭୋଟ୍‌ ପାଇଥିବେ ବୋଲି ଚର୍ଚ୍ଚା ହେଉଛି। ସେହିପରି ଭାଜପା ଗତ ପଞ୍ଚାୟତ ନିର୍ବାଚନରେ ୪୫ ହଜାରରୁ ଊର୍ଦ୍ଧ୍ୱ ଭୋଟ ପାଇଥିଲା। ସେହି ଅନୁଯାୟୀ ଚଳିତ ନିର୍ବାଚନରେ ଦଳ ସେତିକି କିମ୍ବା ତା’ଠାରୁ ଅଧିକ ଭୋଟ୍‌ ପାଇଥାଇପାରେ। ଅବଶିଷ୍ଟ ଭୋଟ୍‌ ମଧ୍ୟରୁ ଯଦି ସ୍ବାଧୀନ ପ୍ରାର୍ଥୀମାନେ ୫ ହଜାର ଭୋଟ୍‌ ହାତେଇଥିବେ ତେବେ ବିଜେଡି ଭୋଟ୍‌ ମଧ୍ୟ ସେହି ୫୦ ହଜାର ପାଖାପାଖି ରହିବ। ଏହି ହିସାବରେ ୩ ପ୍ରାର୍ଥୀଙ୍କ ଭୋଟ୍‌ ପ୍ରାୟତଃ ପାଖାପାଖି ରହୁଥିବା କୁହାଯାଉଛି। ଯଦି ଏହି ଧାରାରେ ମତଦାନ ହୋଇଥାଏ, ତେବେ ହାରଜିତ ବ୍ୟବଧାନ ଖୁବ୍‌ କମ୍‌ ରହିପାରେ।