ଦିଗପହଣ୍ଡି, ୧୦।୧(ଡି.ଏନ୍.ଏ.)- ଦିଗପହଣ୍ଡି ବ୍ଲକ ଘୋଡ଼ା ହାଡ଼ ଡ଼୍ୟାମ ସମେତ ଆଖପାଖ ପୋଖରୀରେ ଶୁକ୍ରବାର ବନବିଭାଗ ପକ୍ଷରୁ କୁମ୍ଭୀର ଗଣନା ସରିଛି। ଗତ ବର୍ଷ ଡ଼୍ୟାମରେ ୪୩ଟି ଗୋ ମୁହାଁ ପ୍ରଜାତିର କୁମ୍ଭୀର ଚିହ୍ନଟ କରାଯାଇଥିବା ବେଳେ ଚଳିତ ବର୍ଷ ୪୪ କୁମ୍ଭୀରଙ୍କୁ ଚିହ୍ନଟ କରାଯାଇଥିବା ଦିଗପହଣ୍ଡି ରେଞ୍ଜର ପ୍ରମୋଦ କୁମାର ଖଡ଼ଗ ରାୟ କହିଛନ୍ତି। ସେହିପରି ଡ୍ୟାମ ଇଲାକାରେ ଥିବା ବିଭିନ୍ନ ଗାଁ ପୋଖରୀ ଓ ଜଳାଶୟ ଗୁଡ଼ିକରେ ଗତ ବର୍ଷ ୧୫ କୁମ୍ଭୀର ଥିବା ବେଳେ ଚଳିତ ବର୍ଷ ସଂଖ୍ୟା ୨୨କୁ ବୃଦ୍ଧି ହୋଇଥିବା ରେକର୍ଡ କରାଯାଇଛି। ପୂର୍ବାହ୍ନ ପ୍ରାୟ ୯ଟାରୁ ଅପରାହ୍ନ ୨ଟା ଯାଏ ୧୦ଟି ତାଲିମ ପ୍ରାପ୍ତ ବନ କର୍ମଚାରୀ ଟିମ୍ ୧୦ ଡଙ୍ଗାରେ ଡ୍ୟାମ ଭିତରକୁ ଯାଇ କୁମ୍ଭୀର ଗଣନା କରିଥିଲେ। ଗଣନା କାର୍ଯ୍ୟରେ ସହକାରୀ ବନ ସଂରକ୍ଷକ ଏ. ମାଧବିଲତା, ସାମନ୍ତିଆ ପଲ୍ଲୀ ବନାଞ୍ଚଳ ଅଧିକାରୀ ରଜତ କୁମାର ମିଶ୍ର, ବନପାଳ ଅକ୍ଷୟ କୁମାର ତ୍ରିପାଠୀ, ସୀତାରାମ ପାତ୍ର, ଶିବରାମ ନାୟକ, କେ. କବିତା ରେଡ୍ଡୀ, ବିଜୟ କୁମାର ମାଝୀ ପ୍ରମୁଖ ୪୦ରୁ ଊର୍ଦ୍ଧ୍ୱ ବନ କର୍ମଚାରୀ ସାମିଲ ଥିଲେ।
