ବଡବିଲ, ୧୧।୯(ସ୍ବ.ପ୍ର.)-ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସ୍କୁଲ ବ୍ୟାଗର ଓଜନ କମାଇବାକୁ ଦିଆଯାଇଥିବା ନିର୍ଦ୍ଦେଶନାମା ପାଳନ ହେଉ ନ ଥିବା ଅଭିଯୋଗ ହୋଇଛି। ଖାସକରି କେନ୍ଦୁଝର ଜିଲା ଯୋଡା-ବଡବିଲ ଅଞ୍ଚଳରେ ଥିବା ଘରୋଇ ସ୍କୁଲ ଗୁଡିକ ଏହି ନିର୍ଦ୍ଦେଶନାମା ମାନିବାକୁ ଆଗଭର ହେଉନାହାନ୍ତି। ଫଳରେ ଆବଶ୍ୟକଠାରୁ ଅଧିକ ଓଜନର ବ୍ୟାଗ ବୋହି କୋମଳମତି ଛାତ୍ରୀଛାତ୍ରମାନଙ୍କର ଅବସ୍ଥା ବେହାଲ ହୋଇପଡୁଛି।
ସୂଚନା ଯୋଗ୍ୟ ଯେ, ସ୍କୁଲ ବ୍ୟାଗ୍ ଓଜନ ନିୟମକୁ କଡାକଡି କରିବାକୁ ଗତ ମାର୍ଚ୍ଚ ମାସରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ରାଜ୍ୟର ସମସ୍ତ ସ୍କୁଲ ଗୁଡିକ ନିମନ୍ତେ ନିର୍ଦ୍ଦେଶନାମା ଜାରି ହୋଇଥିବା ଜଣାପଡିଛି। ପ୍ରତ୍ୟେକ ଜିଲାର ଜିଲା ଶିକ୍ଷାଧିକାରୀ ଏବଂ ଜିଲା ପ୍ରକଳ୍ପ ସଂଯୋଜକଙ୍କ ନେତୃତ୍ୱରେ ଏକ ସ୍କ୍ବାଡ ନିର୍ମାଣ କରାଯିବ ଓ ଏହି ସ୍ବାଡରେ ବ୍ଲକ ଶିକ୍ଷାଧିକାରୀ ଓ ଥାନାଧିକାରୀ ପ୍ରମୁଖ ସଦସ୍ୟ ରହି ବିଭିନ୍ନ ସରକାରୀ ଓ ଘରୋଇ ସ୍କୁଲ ଗୁଡିକୁ ଗସ୍ତ କରି ଛାତ୍ରୀଛାତ୍ରଙ୍କ ସ୍କୁଲ ବ୍ୟାଗର ଓଜନ ଯାଂଚ କରିବେ। ତେବେ ବିଭାଗ ପକ୍ଷରୁ ହୋଇଥିବା ଏଭଳି ନିର୍ଦ୍ଦେଶନାମାସତ୍ତ୍ୱେ ନିୟମ କଡାକଡିଭାବେ ଲାଗୁ ହୋଇପାରିନାହିଁ। ଏହା ୍ଯଯତୀତ ସ୍କୁଲ ଗୁଡିକରେ ଏନସିଇଆରଟି(ନ୍ୟାଶନାଲ କାଉନସିଲ ଅଫ ଏଜୁକେଶନ ରିସର୍ଚ୍ଚ ଏଣ୍ଡ ଟ୍ରେନିଂ) ଏବଂ ଏସସିଇଆରଟି(ଷ୍ଟେଟ କାଉନସିଲ ଅଫ ଏଜୁକେଶନ ରିସର୍ଚ୍ଚ ଏଣ୍ଡ ଟ୍ରେନିଂ)ର ନିର୍ଦ୍ଧାରିତ ପୁସ୍ତକାନୁଯାୟୀ ପାଠ୍ୟକ୍ରମ ରହିବାକୁ ନିର୍ଦ୍ଦେଶ ରହିଥିଲେହେଁ ତାହା କେତେଦୂର କାର୍ଯ୍ୟକାରୀ ହେଉଛି ତାହାର ତଦାରଖ କିମ୍ବା ଯାଞ୍ଚ କରାଯାଉନାହିଁ ଫଳରେ ଘରୋଇ ସ୍କୁଲ ଗୁଡିକ ସରକାରୀ ନିର୍ଦ୍ଦେଶନାମାକୁ ଖାତିର କରୁନଥିବା ଅଭିଯୋଗ ହୋଇଛି। ଏ ନେଇ ଜିଲାପାଳ ନଚେତ୍ ଶିକ୍ଷା ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହୋଇଛି।
