ପାରାଦୀପ,୧୮ା୬(ସ୍ବ.ପ୍ର.): ଦୀର୍ଘ ୨ ମାସ ଧରି ଜାରି ହୋଇଥିବା ସାମୁଦ୍ରିକ କଟକଣା ଗତ ୧୪ ତାରିଖ ରାତିରେ ହଟିବା ପରେ ଏବେ ସମୁଦ୍ରରେ ଜୋରଦାର ମାଛଧରା ଚାଲିଛି। ଶତାଧିକ ମାଛଧରା ଟ୍ରଲର ସମୁଦ୍ରରେ ଘୁରି ବୁଲୁଛନ୍ତି। ଏସବୁକୁ ଦୃଷ୍ଟିରେ ରଖି ସମୁଦ୍ରରେ ଚୋରା ତେଲ ବ୍ୟବସାୟୀମାନେ ମଧ୍ୟ ସକ୍ରିୟ ହୋଇପଡିଛନ୍ତି। ପାରାଦୀପ ମାଛଧରା ବନ୍ଦରରୁ ମତ୍ସ୍ୟଜୀବୀମାନେ ଶତାଧିକ ଟ୍ରଲର ଯୋଗେ ସମୁଦ୍ରକୁ ଯାଇ ମାଛ ଧରୁଛନ୍ତି। ଅନେକ ସମୟରେ ଟ୍ରଲରଗୁଡିକରେ ତେଲ ଅଭାବ ଦେଖାଦେଇଥାଏ। ତେଣୁ ସେଗୁଡିକୁ ଚୋରା ତେଲ ଯୋଗାଇ ବେଶ୍ ଲାଭବାନ ହେଉଛନ୍ତି ସମ୍ପୃକ୍ତ ଚୋରା ବ୍ୟବସାୟୀମାନେ। ବଜାର ଦରଠାରୁ ସେମାନେ ଲିଟର ପିଛା ୧୦ରୁ ୧୨ଟଙ୍କା କମ୍ରେ ବିକ୍ରି କରୁଛନ୍ତି। ଏଥିଯୋଗୁ ଅଧିକାଂଶ ଟ୍ରଲର ମାଲିକ ସେହି ତେଲକୁ ଅପେକ୍ଷା କରିଥାନ୍ତି। ୪ଟି ଡଙ୍ଗା ମହାନଦୀ ଓ ସମୁଦ୍ର ସୀମାରେ ଏପରି ଚୋରା ତେଲ ବ୍ୟବସାୟ କରୁଛନ୍ତି। କୌତୁହଳର କଥା ହେଲା ଏହି ଚୋରା ତେଲ ସମ୍ପୃକ୍ତ ବ୍ୟବସାୟୀଙ୍କୁ ସମୁଦ୍ରରେ ହିଁ ମିଳିଯାଉଛି। ପଣ୍ୟବାହୀ ଜାହାଜ, ବନ୍ଦରରେ ନିୟୋଜିତ ଅନେକ ଟଗ୍ବୋଟ, ଏସ୍ପିଏମ୍(ସିଙ୍ଗଲ ପଏଣ୍ଟ ମୋରିଂ ସିଷ୍ଟମ)କୁ ଯାତାୟାତ କରୁଥିବା ଘରୋଇ ବୋଟ୍ ଓ ପଣ୍ୟ କାରବାରରେ ସମ୍ପୃକ୍ତ ଅନ୍ୟ ବୋଟ୍ଗୁଡ଼ିକ ପ୍ରାୟତଃ ତେଲ ଚୋରାରେ ବିକ୍ରି କରିଥାନ୍ତି। ସେହି ତେଲ ଅଧା ମୂଲ୍ୟରେ କିଣି ସମ୍ପୃକ୍ତ ବ୍ୟବସାୟୀମାନେ ମାଛଧରା ଟ୍ରଲରକୁ ବିକ୍ରି କରିଥାନ୍ତି। ଏଥିସହିତ ବନ୍ଦର ସହିତ ସମ୍ପୃକ୍ତ ତୈଳ ପାଇପ୍ ଲାଇନ୍ରୁ ମଧ୍ୟ ଚୋରା ତେଲ ସଂଗ୍ରହ କରିଥାନ୍ତି। ଗତ ୨ ମାସ ମାଛଧରା ବନ୍ଦ ଥିବାରୁ ଚୋରା ବ୍ୟବସାୟୀମାନେ ନୀରବ ଥିଲେ। ସେମାନେ ଗଚ୍ଛିତ ରଖିଥିବା ତେଲ ଏବେ ପ୍ରଚୁର ମାତ୍ରାରେ ବିକ୍ରି କରି ଚାଲିଛନ୍ତି। ସେହିପରି ଏହି ବେପାରୀମାନେ ମୋବାଇଲ୍ ସିମ୍ କାର୍ଡ ଓ ସ୍କ୍ରାବ୍ ବେପାର ମଧ୍ୟ ଚଳାଇଛନ୍ତି। ପ୍ରକାଶ ଯେ, ସମୁଦ୍ରରେ ଆଙ୍କରେଜ ଏରିଆରେ ପଣ୍ୟବାହୀ ଜାହାଜଗୁଡ଼ିକ ବନ୍ଦରକୁ ପ୍ରବେଶ କରିବା ପାଇଁ ୨ରୁ ୧୦ ଦିନ ପର୍ଯ୍ୟନ୍ତ ଅପେକ୍ଷା କରିଥାନ୍ତି। ସେତେବେଳେ ଜାହାଜରେ ଥିବା ବିଦେଶୀ ନାବିକମାନେ ପରିବାର ଲୋକଙ୍କ ସହ କଥା ହେବା ପାଇଁ ଭାରତୀୟ ମୋବାଇଲ ସିମ୍ ଆବଶ୍ୟକ କରିଥାନ୍ତି। ସେହି ନାବିକମାନଙ୍କୁ ଚୋରା ବ୍ୟବସାୟୀମାନେ ସିମ୍ ଦେଇ ତେଲ, ସ୍କ୍ରାବ ଓ ଅବକାରୀ ସାମଗ୍ରୀ ସଂଗ୍ରହ କରିଥାନ୍ତି। ସେହି ତେଲ ଓ ଅନ୍ୟ ସାମଗ୍ରୀକୁ ବିକ୍ରି କରି ବେଶ୍ ଲାଭ ପାଇଥାନ୍ତି ବୋଲି ଜଣେ ଚୋରା ବ୍ୟବସାୟୀ କହିଛନ୍ତି। ଏହି ବ୍ୟବସାୟକୁ ରୋକିବା ପାଇଁ ମେରାଇନ ପୋଲିସ, କୋଷ୍ଟଗାର୍ଡ, ନୌସେନା, ସିଆଇଏସ୍ଏଫ୍ ଭଳି ସଂସ୍ଥା ଥିଲେ ହେଁ ଏହାର କୌଣସି ପ୍ରଭାବ ପଡ଼ୁନାହିଁ। ବେନାମୀ ମୋବାଇଲ ସିମ କାର୍ଡ ବିକିବା ଘଟଣା ଦେଶ ସୁରକ୍ଷା କ୍ଷେତ୍ରରେ ପ୍ରଶ୍ନବାଚୀ ସୃଷ୍ଟି କରିଛି।
