ଛତ୍ରପୁର,୧ା୫(ଡି.ଏନ୍.ଏ.)- କରୋନା ମୁକାବିଲା କ୍ଷେତ୍ରରେ ଯେଉଁ ବ୍ୟକ୍ତି ବିଶେଷ କିମ୍ବା ସ୍ବେଚ୍ଛାସେବୀ ଅନୁଷ୍ଠାନ ସହାୟତା ଦେବାକୁ ଇଚ୍ଛୁକ ସେମାନେ ଗଞ୍ଜାମ ଜିଲା ପ୍ରଶାସନର କୋଭିଡ ସେଲ ସହିତ ଯୋଗାଯୋଗ କରି ଏହା କରିପାରିବେ ବୋଲି ଜିଲାପାଳ ବିଜୟ ଅମୃତା କୁଲାଙ୍ଗେ ଶୁକ୍ରବାର ପ୍ରକାଶ କରିଛନ୍ତି। ଏଥି ସହିତ ଯେଉଁମାନେ ସ୍ବଇଚ୍ଛାରେ ସହଯୋଗ କରିବାକୁ ଚାହାନ୍ତି ସେମାନେ ମଧ୍ୟ ଛତ୍ରପୁର ସ୍ଥିତ ଡିଆରଡିଏ କାର୍ଯ୍ୟାଳୟରେ ଖୋଲିଥିବା କୋଭିଡ ସେଲ୍ରେ ପଞ୍ଜିକରଣ କରିପାରିବେ। ଏହା ଉଭୟ ଅନ୍ଲାଇନ ଓ ଅଫ୍ଲାଇନରେ ହୋଇପାରିବ। ଅଦ୍ୟାବଧି ୩୧ ସ୍ବେଚ୍ଛାସେବୀ ଅନୁଷ୍ଠାନ ଅନ୍ଲାଇନରେ ପଞ୍ଜିକରଣ କରିଥିବା ସ୍ଥଳେ ୨୨ ଗୋଟି ଅଫ୍ଲାଇନରେ ପଞ୍ଜିକରଣ କରିଛନ୍ତି। ସେହିପରି ୭୮୭ ଜଣ ସହଯୋଗୀ ଅନ୍ଲାଇନରେ ପଞ୍ଜିକରଣ କରିଥିବା ସ୍ଥଳେ ୨୭୩୪ ଜଣ ଅଫ୍ଲାଇନ ପଞ୍ଜିକରଣ କରିଛନ୍ତି। ତହସିଲ ଅଫିସରେ ଭିଡ କମ କରିବାପାଇଁ ଜମିଜମା ପଟ୍ଟା ଲୋକ ମାନଙ୍କ ଘରେ ପ୍ରଦାନ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏଥି ସହିତ ବାହାର ରାଜ୍ୟ ଫେରନ୍ତା ଯେଉଁମାନଙ୍କୁ କ୍ବାରରାଣ୍ଟାଇନରେ ରଖାଯାଉଛି ସେମାନଙ୍କ ମଧ୍ୟରୁ ଯେଉଁମାନେ ନରେଗା କାମ ପାଇଁ ଇଚ୍ଛୁକ ତାଙ୍କର ମଷ୍ଟରରୋଲ ଉକ୍ତ କ୍ବାରାରଣ୍ଟାଇନ କେନ୍ଦ୍ରରେ ପ୍ରସ୍ତୁତ କରାଯିବ। ଗାଁ ଗହଳିରେ କୃଷି, ଉଦ୍ୟାନ କୃଷି, ମତ୍ସ୍ୟଚାଷ ଓ ପଶୁସମ୍ପଦ କାର୍ଯ୍ୟ ଆରମ୍ଭ କରିବାପାଇଁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
ପ୍ରବାସୀ ଫେରନ୍ତା ସମସ୍ତଙ୍କର ସ୍ବାବ ପରୀକ୍ଷା କରାଯିବ। ପଶ୍ଚିମ ବଙ୍ଗ ଫେରନ୍ତାଙ୍କ ଉପରେ ଅଧିକ ଧ୍ୟାନ ଦେବାକୁ ଜିଲାପାଳ କହିଛନ୍ତି। ବାଲେଶ୍ୱର, ଭଦ୍ରକ ଏବଂ ଯାଜପୁରରୁ ଯେଉଁମାନେ ଆସୁଛନ୍ତି ସେମାନଙ୍କର ସ୍ବାସ୍ଥ୍ୟ ଯାଞ୍ଚ କରାଯିବ। ଜିଲାର ବଡବଡ କ୍ବାରାଣ୍ଟାଇନ କେନ୍ଦ୍ର ଗୁଡିକ ସମ୍ପୂର୍ଣ୍ଣ ସଜାଗ ରହିବେ। ପ୍ରତ୍ୟେକ କ୍ବାରାଣ୍ଟାଇନ କେନ୍ଦ୍ରରେ ସମାନ ପ୍ରକାର ଖାଦ୍ୟ ପ୍ରଦାନ କରିବା ପାଇଁ ଜିଲାପାଳ କହିଛନ୍ତି।
ବୈଠକରେ ଅନ୍ୟମାନଙ୍କ ମଧ୍ୟରେ ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଇଂ. ସିଦ୍ଧାର୍ଥ ଶଙ୍କର ସ୍ବାଇଁ, ଅତିରିକ୍ତ ଜିଲାପାଳ କବିନ୍ଦ୍ର କୁମାର ସାହୁ, ସୁଦାମ ଚରଣ ମଣ୍ଡଳ, ଅମୀୟ କୁମାର ସାହୁ, ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତାତ୍ରେୟ ଭାଉ ସାହେବ, ଛତ୍ରପୁର ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟି ଓ ଅନ୍ୟାନ୍ୟ ଅଧିକାରୀମାନେ ଯୋଗଦେଇଥିଲେ।
